ក្រសួងសុខាភិបាលបានដាក់ចេញវិធានការសុខាភិបាលថ្មី ដោយតម្រូវឱ្យម្ចាស់ពិធីមង្គលការឬកម្មវិធីបុណ្យនៅទូទាំង២៥រាជធានី-ខេត្ត ឱ្យរៀបចំតុសម្រាប់ភ្ញៀវអង្គុយតែ៥នាក់ក្នុងមួយតុៗដើម្បីចូលរួមក្នុងការបង្ការនិងទប់ស្កាត់ការចម្លងនៃជំងឺកូវីដ១៩។
ក្នុងសេចក្តីជូនដំណឹងចុះថ្ងៃទី២៦ ខែមករានេះ រដ្ឋមន្រ្តីក្រសួងសុខាភិបាល លោក ម៉ម ប៊ុនហេង បានស្នើដល់អាជ្ញាធរមូលដ្ឋានទូទាំងប្រទេស ត្រូវណែនាំម្ចាស់ពិធីអាពាហ៍ពិពាហ៍និងអ្នករៀបចំកម្មវិធីបុណ្យផ្សេងៗឱ្យកាត់បន្ថយចំនួនកៅអីភ្ញៀវពី១០មកនៅ៥កៅអីក្នុងមួយតុៗ ដើម្បីរក្សាគម្លាតសុវត្ថិភាពបញ្ចៀសការឆ្លងរាលដាលជំងឺកូវីដ១៩។
ក្នុងលិខិតដដែល ក្រសួងក៏ណែនាំឱ្យអាជ្ញាធរត្រូវចាត់កម្លាំងសមត្ថកិច្ចតាមដាននិងណែនាំភ្ញៀវដែលចូលរួមក្នុងពិធីបន្ថែមទៀត ដើម្បីធានាការអនុវត្តវិធានការរបស់ក្រសួងសុខាភិបាលមានប្រសិទ្ធភាព។
ក្នុងលិខិតជូនដំណឹងនោះសរសេរថា៖ «រៀបចំទីតាំងឈរឬអង្គុយសម្រាប់ភ្ញៀវនិងអ្នកបម្រើសេវាកម្មក្នុងពិធី ដោយរក្សាគម្លាតសុវត្ថិភាពបុគ្គលបានយ៉ាងតិច១,៥ម៉ែត្រឡើងទៅពីបុគ្គលម្នាក់ទៅបុគ្គលម្នាក់។ រៀបតុអាហារដោយកំណត់ចំនួនភ្ញៀវអង្គុយត្រឹមប្រាំនាក់ក្នុងមួយតុដែលទម្លាប់ពីមុនអង្គុយ១០នាក់»។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន លើកឡើងថា ការដែលក្រសួងប្រកាសពីវិធានការនេះ គឺដោយសារខាងក្រសួងសង្កេតឃើញពលរដ្ឋកម្ពុជាទូទៅ និងនៅតាមពិធីមង្គលការឬពិធីជួបជុំផ្សេងៗ ហាក់ភ្លេចខ្លួន ដោយមិនបានគោរពនិងអនុវត្តវិធីរស់ក្នុងគន្លងថ្មីដែលត្រូវរក្សាគម្លាតសុវត្ថិភាពយ៉ាងហោច១ម៉ែត្រកន្លះ ពាក់ម៉ាស់មុខ និងឧស្សាហ៍លាងដៃនឹងទឹកអាល់កុលជាដើម ក្រោយ«ព្រឹត្តិការណ៍២៨វិច្ឆិកា»ត្រូវបានប្រកាសបិទបញ្ចប់។
លោកស្រី ឱ វណ្ណឌីន មានប្រសាសន៍ថា៖ «អ៊ីចឹងវាជាការព្រួយបារម្ភមួយសម្រាប់ក្រសួងសុខាភិបាល បើសិនមានករណីឆ្លងនូវវីរុសកូវីដ១៩។ អ៊ីចឹងយើងនឹងមានការលំបាកហើយ។ វានឹងអាចមានការផ្ទុះការចម្លងហ្នឹងនៅក្នុងសហគមន៍ នៅក្នុងទ្រង់ទ្រាយមួយដែលយើងពិបាកនឹងប៉ាន់ប្រមាណបាន»។
អ្នកនាំពាក្យរដ្ឋបាលសាលារាជធានីភ្នំពេញ លោក ម៉េត មាសភក្តី ប្រាប់ថា សេចក្តីណែនាំនេះមិនមែនជារឿងថ្មីនោះទេ។ លោកថា អាជ្ញាធរបានចុះផ្សព្វផ្សាយនិងណែនាំឱ្យពលរដ្ឋ ក៏ដូចជាម្ចាស់ពិធីការផ្សេងៗឱ្យអនុវត្តតាមនាពេលកន្លងមករួចមកហើយ។ យ៉ាងណា លោកបន្ថែមថា សម្រាប់ការជូនដំណឹងជាថ្មីនេះ អាជ្ញាធររាជធានីនឹងបន្តពង្រឹងបន្ថែមទៀត។
លោក ម៉េត មាសភក្តី មានប្រសាសន៍ថា៖ «យើងនឹងគិតគូរតាមជំនាញរបស់យើងបន្តទៀត។ ខ្ញុំអត់ទាន់អាចជម្រាបជូនថាយើងនឹងត្រូវធ្វើយ៉ាងម៉េច ប៉ុន្តែប្រាកដណាស់ថា ធ្វើយ៉ាងណាដើម្បីសំដៅទៅលើការអនុវត្តតាមការណែនាំរបស់ក្រសួងហ្នឹងឱ្យមានប្រសិទ្ធភាព»។
ចុងភៅទទួលរៀបចំម្ហូបការនៅភ្នំពេញមួយរូបឈ្មោះ សៀង រ៉ានី ឱ្យដឹងថា ចាប់ពីករណីឆ្លងកូវីដ១៩ក្នុងប្រទេសស្ងប់ស្ងាត់ឡើងវិញ អ្នកស្រីបានទទួលការកក់សេវារៀបចំម្ហូបសម្រាប់ពិធីមង្គលការជាបន្តបន្ទាប់ ដោយជ្រើសរើសតម្លៃម្ហូបមួយតុសម្រាប់មនុស្ស១០នាក់តាមធម្មតា និងមានភ្ញៀវបានកក់ទុកពី១០ទៅ១៥រោងក្នុង១ខែ។
អ្នកស្រីបន្ថែមថា ចាប់ពីក្រសួងចេញសេចក្តីប្រកាសជាថ្មីនេះ ពុំទាន់មានភ្ញៀវណាម្នាក់បានទាក់ទងអ្នកស្រីដើម្បីកែប្រែចំនួនកៅអីក្នុងតុនីមួយៗតាមការណែនាំរបស់ក្រសួងសុខាភិបាលនៅឡើយ។
អ្នកស្រី សៀង រ៉ានី ប្រាប់បន្ថែមថា៖ «ដោយសារយើងត្រូវការកាត់បន្ថយម្ហូប អ៊ីចឹងតម្លៃគាត់យកទៅតាមការបន្ថយម្ហូបរបស់គាត់។ ឧទាហរណ៍ថា គាត់ញ៉ាំធ្លាប់៨មុខ អ៊ីចឹងដល់ពេលគាត់បន្ថយយក៦មុខវិញ អ៊ីចឹងគាត់ត្រូវមកពិភាក្សាតម្លៃសារថ្មី ហើយតម្លៃរបស់យើងដាក់ទៅតាមមុខម្ហូបដែលគាត់កម្ម៉ង់នីមួយៗ»។
លោក សុផា រស់នៅខេត្តតាកែវ បានស្នើសុំការអនុញ្ញាតពីអាជ្ញាធរមូលដ្ឋាន ដើម្បីរៀបចំពិធីមង្គលការកូននៅគេហដ្ឋាននៅដើមខែមីនា និងបានកក់តុការចំនួន៣០ សម្រាប់ភ្ញៀវចំនួន៣០០នាក់រួចរាល់ហើយ។ លោកថា លោកមិនទាន់មានគម្រោងថានឹងកាត់បន្ថយចំនួនកៅអីមកនៅត្រឹម៥ក្នុងមួយតុតាមការកំណត់របស់ក្រសួងនៅឡើយ ប៉ុន្តែលោកថា លោកនឹងអនុវត្តតាមបើមិនមានការផ្លាស់ប្តូរទេនោះ។
លោកគ្រូ សុផា មានប្រសាសន៍ថា៖ «ខ្ញុំតាម ដឹងតែតាមហើយ! អត់តាមម៉េចកើត! គ្រាន់តែថា មិនទាន់ប្រាកដទេ ក្រែងលោក្រសួងសុខាភិបាលប្រែយ៉ាងម៉េចទៀត។ ទាល់តែតាមអ៊ីចឹងដែរបានគេឱ្យធ្វើ ហើយបើមិនតាម រដ្ឋអំណាចគេមិនឱ្យធ្វើទេ»។
សេចក្តីជូនដំណឹងដដែល ក្រសួងសុខាភិបាលក៏តម្រូវឱ្យអ្នករៀបចំកម្មវិធីបំពាក់ឧបករណ៍វាស់កម្តៅស្វ័យប្រវត្តិ ដាក់ទឹកអាកុលឬជែលលាងដៃ ដាក់បង្ហាញស្លាកសញ្ញាណែនាំពីវិធីបង្ការនិងទប់ស្កាត់ការចម្លងរបស់មេរោគកូវីដ១៩ និងចៀសវាងការប៉ះប្រាស្រ័យគ្នាជាដើម៕