មន្ត្រីទូតកម្ពុជា ឱ្យដឹងថា ស្ថានកុងស៊ុលកម្ពុជាប្រចាំប្រទេសថៃនិងម៉ាឡេស៊ី បានជួយសម្របសម្រួលជាមួយអាជ្ញាធរថៃនិងម៉ាឡេស៊ី ដើម្បីជួយពលរដ្ឋខ្មែរជាង៤០នាក់ដែលបានធ្វើចំណាកស្រុកដោយខុសច្បាប់ទៅកាន់ប្រទេសទាំងនោះ ឱ្យបានត្រឡប់មកកម្ពុជាវិញ។
កាលពីថ្ងៃម្សិលមិញ មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) បានលើកឡើងនៅក្នុងទំព័រហ្វេសប៊ុកថា ទាហានថៃបានឃាត់ខ្លួនពលករខ្មែរខុសច្បាប់ចំនួន៣៧នាក់ ដែលបានឆ្លងដែនខុសច្បាប់ចូលក្នុងប្រទេសថៃ តាមច្រករបៀងនៃព្រំដែនកម្ពុជា-ថៃ ក្នុងតំបន់ ភូមិខៅឌីន ស្រុកក្លងហាត ខេត្តស្រះកែវ ប្រទេសថៃ ដើម្បីស្វែងរកការងារធ្វើ។
ប្រភពដដែលបន្ថែមថា កងទាហានថៃបានបញ្ជូនពលករខ្មែរទាំង៣៧នាក់ទៅប៉ុស្តិ៍ប៉ូលិសអន្តោប្រវេសន៍ខេត្តស្រះកែវ ដើម្បីបន្តដំណើរតាមច្បាប់នៃប្រទេសថៃ។
អ្នកនាំពាក្យក្រសួងការបរទេស និងកិច្ចសហប្រតិបត្តិការអន្តរជាតិកម្ពុជា លោក កុយ គួង មានប្រសាសន៍នៅថ្ងៃពុធនេះថា ក្រោយពីទទួលបានដំណឹងពីអាជ្ញាធរថៃជុំវិញករណីនេះ ស្ថានអគ្គកុងស៊ុលកម្ពុជាដែលមានទីតាំងនៅក្បែរនោះ បានសម្របសម្រួលជាមួយអាជ្ញាធរថៃ ដើម្បីជួយពលករខ្មែរចំនួន៣៧នាក់នោះ ឱ្យបានត្រលប់មកកម្ពុជាវិញនៅថ្ងៃដដែល។
លោកបញ្ជាក់ថា៖ «[ពលករខ្មែរ] ៣៧នាក់នោះ គឺគាត់ចូលទៅ [ប្រទេសថៃ] ដោយខុសច្បាប់ តាមច្រករបៀង ហើយខាងភាគីថៃគេឃាត់ខ្លួន ហើយគេបានទាក់ទងទៅអគ្គកុងស៊ុលយើងនៅក្បែរនោះ ហើយអគ្គកុងស៊ុលបានសម្របសម្រួលជាមួយអាជ្ញាធរថៃ ហើយបានបញ្ជូនពួកគាត់ត្រលប់មកវិញតាំងពីពេលឃាត់ខ្លួនភ្លាមៗនោះដែរ»។
លោក កុយ គួង បានឱ្យដឹងបន្ថែមថា ស្ថានទូតខ្មែរប្រចាំនៅប្រទេសម៉ាឡេស៊ី ក៏បានជួយសម្របសម្រួលជាមួយអាជ្ញាធរម៉ាឡេស៊ី ដើម្បីជួយទារិកាម្នាក់ និងពលករ-ពលការិនីខ្មែរចំនួន៦នាក់ ដែលធ្វើការខុសច្បាប់នៅប្រទេសនោះ ឱ្យវិលត្រឡប់មកកម្ពុជាវិញដែរ។
លោកបន្តថា ពលករ-ពលការិនីខ្មែរចំនួន៦នាក់ និងទារិកាម្នាក់នោះ បានមកដល់ប្រទេសកម្ពុជា នៅម៉ោង៥និង៣៥នាទីល្ងាច ថ្ងៃទី២៧ ខែមករា ឆ្នាំ២០២១នេះ តាមជើងយន្តហោះអាកាសចរណ៍សិង្ហបុរី។
ពាក់ព័ន្ធនឹងករណីនេះដែរ ឯកអគ្គរាជទូតកម្ពុជាប្រចាំប្រទេសម៉ាឡេស៊ី បានអំពាវនាវដល់ប្រជាពលរដ្ឋខ្មែរឱ្យបញ្ឈប់ការធ្វើចំណាកស្រុកដោយខុសច្បាប់។
លោក លឹង សុផុន មន្ត្រីកម្មវិធីទេសន្តោប្រវេសន៍ប្រចាំប្រទេសថៃ នៃអង្គការសង់ត្រាល់ មានប្រសាសន៍ថា កន្លងមក អាជ្ញាធរថៃមានការរឹតបន្តឹងខ្លាំងចំពោះពលករបរទេសដែលឆ្លងដែនចូលទៅធ្វើការខុសច្បាប់នៅប្រទេសនេះ ដោយមានការចាប់ខ្លួននិងដាក់ពន្ធនាគារ ដើម្បីឱ្យថៅកែឬសាច់ញាតិទៅដោះស្រាយ។
ប៉ុន្តែលោកថា ចាប់តាំងពីពាក់កណ្តាលឆ្នាំ២០២០មក និងស្របពេលដែលករណីឆ្លងជំងឺកូវីដ១៩ខ្លាំង អាជ្ញាធរថៃហាក់មានការយោគយល់ច្រើន ដោយពុំមានការចាប់ឃុំខ្លួនពលករបរទេសខុសច្បាប់ដូចមុនទេ។
លោក មឿន តុលា នាយកប្រតិបត្តិអង្គការសង់ត្រាល់ មានប្រសាសន៍ថា តាមការសង្កេតកន្លងមក ឃើញថា ពលករខ្មែរដែលចំណាកស្រុកទៅធ្វើការខុសច្បាប់នៅក្រៅប្រទេស កើតឡើងដោយសារកត្តាជីវភាពនិងការអូសទាញរបស់មេខ្យល់ ខណៈប្រាក់ឈ្នួលនៅប្រទេសថៃនិងប្រទេសផ្សេងទៀតមានកម្រិតខ្ពស់ជាងនៅកម្ពុជា។
លោកបន្តថា ដើម្បីដោះស្រាយបញ្ហាឆ្លងដែនខុសច្បាប់នេះ រដ្ឋាភិបាលគួរតែដោះស្រាយកត្តាទាំងនេះឱ្យមានប្រសិទ្ធភាព ជាពិសេសការធ្វើឱ្យប្រជាពលរដ្ឋមានការងារពិតប្រាកដមួយ។
លោកបន្ថែមថា រដ្ឋាភិបាលគួរតែពង្រឹងលើវិស័យកសិកម្ម ក្នុងការផ្ដល់បចេ្ចកទេស ដើមទុន និងការរកទីផ្សារ ជូនពលរដ្ឋ ដោយលោកអះអាងថា ពលករខ្មែរធ្វើការនៅប្រទេសថៃភាគច្រើនជាកសិករ។
លោក មឿន តុលា មានប្រសាសន៍ថា៖ «ប្រាកដណាស់ គឺគាត់ពិបាកទ្រាំក្នុងស្រុកហ្នឹងប្រហែលជាគាត់អត់មានមុខរបរពិតប្រាកដ រកការងារមិនបានធ្វើ ឬមានការងារដែរតែមិនប្រាកដប្រជាអ៊ីចឹងទៅ។ ហើយមួយទៀត គឺគាត់ត្រូវសងបំណុលនៅធនាគារ គ្រឹះស្ថានមីក្រូហិរញ្ញវត្ថុហ្នឹង ត្រង់នេះហើយដែលធ្វើឱ្យគាត់ប្រថុយប្រថាន»។
ជាមួយគ្នានេះដែរ លោកក៏បានជំរុញឱ្យរដ្ឋាភិបាលគួរតែពង្រឹងវិធានការអនុវត្តច្បាប់បន្ថែមទៀតនៅតាមបណ្ដោយខ្សែបន្ទាត់ព្រំដែន ដើម្បីតាមចាប់មេខ្យល់ដែលនាំពលករឆ្លងដែនដោយខុសច្បាប់៕
