អង្គការតម្លាភាពអន្តរជាតិ (TI) បានចាត់ថ្នាក់កម្ពុជាស្ថិតក្នុងស្ថានភាពអាក្រក់ដដែលនៃអំពើពុករលួយសម្រាប់ឆ្នាំ២០២០ ហើយបើប្រៀបធៀបជាមួយប្រទេសទាំង១០នៅក្នុងតំបន់អាស៊ាន គឺកម្ពុជានៅបន្តពុករលួយខ្លាំងជាងគេ។
យោងតាមសេចក្តីថ្លែងការណ៍ព័ត៌មាននៅថ្ងៃទី២៨ ខែមករា ឆ្នាំ២០២១ របស់អង្គការតម្លាភាពអន្តរជាតិ ដែលមានមូលដ្ឋាននៅទីក្រុងប៊ែរឡាំង ប្រទេសអាល្លឺម៉ង់ បង្ហាញថា លទ្ធផលសន្ទស្សន៍នៃការយល់ឃើញអំពើពុករលួយក្នុងឆ្នាំ២០២០ បង្ហាញថា ប្រទេសកម្ពុជាឈរនៅចំណាត់ថ្នាក់ទី១៦០ ក្នុងចំណោមប្រទេសនិងដែនដីសរុប១៨០ ដែលបានដាក់បញ្ចូលក្នុងការវាយតម្លៃអំពីបញ្ហាអំពើពុករលួយ។
សេចក្តីថ្លៃងការណ៍ដដែលឱ្យដឹងថា កម្ពុជាទទួលបានពិន្ទុ២១ប៉ុណ្ណោះលើពិន្ទុអតិបរមា១០០ពិន្ទុ ដែលជាការកើនឡើង១ពិន្ទុ ចាប់តាំងពីឆ្នាំ២០១៨។
នៅក្នុងកម្រិតតំបន់ លទ្ធផលសន្ទស្សន៍របស់អង្គការ TI បង្ហាញថា កម្ពុជាបន្តស្ថិតនៅក្នុងចំណោមប្រទេសមានពិន្ទុតិចជាងគេទី៣ នៅតំបន់អាស៊ីប៉ាស៊ីហ្វិក ហើយក៏ជាប្រទេសមានពិន្ទុទាបជាងគេបំផុតក្នុងតំបន់អាស៊ាន។
សេចក្តីថ្លែងការណ៍បញ្ជាក់ថា ប្រទេសនៅតំបន់អាស៊ានដែលមានចំណាត់ថ្នាក់មិនល្អដែរនោះ ប៉ុន្តែស្ថិតនៅលើកម្ពុជា គឺប្រទេសមីយ៉ានម៉ា បានធ្លាក់ចុះពិន្ទុពី ២៩ មក ២៨, ប្រទេសវៀតណាមធ្លាក់ចុះពិន្ទុពី ៣៧ មក ៣៦, ម៉ាឡេស៊ី ធ្លាក់ចុះពិន្ទុពី ៥៣ មក ៥១ និងឥណ្ឌូនេស៊ី ធ្លាក់ចុះពិន្ទុពី ៤០ មក ៣៧ ខណៈប្រទេសថៃ ឡាវ ព្រុយណេ និងហ្វីលីពីន ពិន្ទុនៅដដែលបើប្រៀបធៀបនឹងឆ្នាំមុន។
បើតាមសេចក្តីថ្លៃការណ៍ដដែលនេះ នៅក្នុងតំបន់អាស៊ាន ប្រទេសសិង្ហបុរីទទួលបានចំណាត់ថ្នាក់ល្អជាងគេ គឺទទួលបានពិន្ទុ៨៥ ដែលជាចំណាត់ថ្នាក់ល្អលេខ៣លើពិភពលោក និងលេខ១នៅតំបន់អាស៊ាន។
ទោះយ៉ាងណា អង្គការតម្លាភាពអន្តរជាតិ បានលើកឡើងថា លទ្ធផលរបស់ប្រទេសកម្ពុជានេះ បានឆ្លុះបញ្ចាំងពីភាពប្រសើរឡើងមួយចំនួន ដូចជា ការខិតខំកាត់បន្ថយអំពើពុករលួយក្នុងវិស័យឯកជន កំណែទម្រង់ការគ្រប់គ្រងហិរញ្ញវត្ថុសាធារណៈ តាមរយៈការកៀរគរធនធាន ការជំរុញឱ្យមានរដ្ឋាភិបាលតាមប្រព័ន្ធអេឡិចត្រូនិច និងការលើកម្ពស់សេវាសាធារណៈ ជាពិសេសការឆ្លើយតបនឹងវិបត្តិកូវីដ១៩។
ប៉ុន្តែអង្គការនេះថា ភាពប្រសើរឡើងនេះគឺមានតិចតួចប៉ុណ្ណោះ ខណៈកំណែទម្រង់រចនាសម្ព័ន្ធនិងប្រព័ន្ធ ជុំវិញបញ្ហាអំពើពុករលួយទ្រង់ទ្រាយធំ អំពើពុករលួយផ្នែកនយោបាយ និងការពង្រឹងនីតិរដ្ឋ នៅមិនទាន់មានភាពប្រសើរឡើងនៅឡើយ។
នាយកប្រតិបត្តិ នៃអង្គការតម្លាភាពកម្ពុជា លោក ប៉ិច ពិសី ដែលបានស្រង់សម្តីដាក់ក្នុងសេចក្តីថ្លៃងការណ៍នេះបានលើកឡើងថា ការដែលកម្ពុជាបន្តទទួលបានពិន្ទុទាបនេះ បង្ហាញថា កម្ពុជាមានបញ្ហាសំខាន់ៗជាច្រើនទៀតដែលត្រូវដោះស្រាយ។
អង្គការតម្លាភាពកម្ពុជា បានអំពាវនាវទៅរដ្ឋាភិបាលពន្លឿនរបៀបវារៈកែទម្រង់មួយចំនួន ដូចជា ធ្វើវិសោធនកម្មមាត្រាមួយចំនួនក្នុងច្បាប់ប្រឆាំងអំពើពុករលួយ ជាពិសេសពាក់ព័ន្ធការប្រកាសទ្រព្យសម្បត្តិ, ពន្លឿនការអនុម័តសេចក្តីព្រាងច្បាប់ស្តីពីសិទ្ធិទទួលបានព័ត៌មាន ច្បាប់ការពារបុគ្គលរាយការណ៍ និងច្បាប់ការពារសាក្សី អ្នកជំនាញ និងជនរងគ្រោះដែលស្របទៅតាមបទដ្ឋានអន្តរជាតិ បង្កើតយន្តការធានាគណនេយ្យភាពនិងបញ្ហាផ្សេងៗទៀត។
វីអូឌី ពុំអាចសុំការអត្ថាធិប្បាយជុំវិញលទ្ធផលសន្ទស្សន៍នេះពីប្រធានអង្គភាពប្រឆាំងអំពើពុករលួយ លោក ឱម យិនទៀង និងប្រធានអង្គភាពអ្នកនាំពាក្យរាជរដ្ឋាភិបាល លោក ផៃ ស៊ីផាន បានទេ នៅថ្ងៃនេះ។
ប៉ុន្តែតាមរយៈលទ្ធផលសន្ទស្សន៍កាលពីឆ្នាំមុនដែលមានលទ្ធផលដូចគ្នានេះ មន្ត្រីជាន់ខ្ពស់រដ្ឋាភិបាលបានច្រានចោលរបាយការណ៍នោះ និងចាត់ទុកថា ការចេញរបាយការណ៍បែបនេះ គ្រាន់តែជាការផ្សព្វផ្សាយពាណិជ្ជកម្មដើម្បីផលប្រយោជន៍ផ្ទាល់របស់ពួកគេ និងគ្មានតម្លៃផ្លូវច្បាប់នៅកម្ពុជាទេ៕
