អ្នកប្រកបរបរសេវាដឹកជញ្ជូនភ្ញៀវមួយចំនួន បានត្អូញត្អែរពីផលលំបាកក្នុងការរកទទួលទាន ក្រោយពីតម្លៃប្រេងឥន្ធនៈនិងឧស្ម័នអិលភីជី (ឬហ្គាស) ឡើងថ្លៃ ខណៈស្ថានភាពជំងឺកូវីដ១៩ នៅបន្តកើតមាន។
អ្នករត់ម៉ូតូកង់បីឥណ្ឌានៅម្តុំផ្សារអូរឫស្សី រាជធានីភ្នំពេញ លោក ខឿន ហៀប និយាយថា មុនពេលមានជំងឺកូវីដ១៩ឆ្លងរាលដាលមកដល់កម្ពុជា ហ្គាសក្នុង១លីត្រតម្លៃប្រហែលជា២២០០រៀល ប៉ុន្តែក្រោយមក នៅអំឡុងឆ្នាំ២០២០ ដែលជំងឺកូវីដ១៩បានឆ្លងរាលដាលដល់សហគមន៍នោះ តម្លៃហ្គាសបានធ្លាក់ចុះមកនៅត្រឹម១៥០០រៀលក្នុង១លីត្រ។
ប៉ុន្តែអ្វីដែលគួរឱ្យកត់សម្គាល់នោះ លោកអះអាងថា នៅដើមឆ្នាំ២០២១នេះ ក្រោយពីស្ថានភាពកូវីដ១៩ ធូរស្រាលបន្តិច បែរជាតម្លៃហ្គាសឡើងរហូតដល់២១០០រៀលវិញក្នុង១លីត្រ ធ្វើឱ្យពួកគេជួបបញ្ហាប្រឈមច្រើនក្នុងការរកចំណូលមកទ្រទ្រង់ជីវភាពគ្រួសារ។
លោកនិយាយថា៖ «ប្រឈមច្រើន ព្រោះខ្ញុំរកស៊ីឥលូវជំពាក់គេដែរ ឥលូវត្រូវបង់ការធនាគារមួយខែ៥០០ដុល្លារ យើងពិបាកទប់ទល់ ណាមួយស្ទះចរាចរណ៍ ដឹកអ្នកដំណើរក៏មិនបានច្រើនជើងដែរ ព្រោះឥលូវវាស្ទះពេក ផ្លូវឥលូវ ដឹងស្រាប់ហើយ ហើយទើបងើបពីកូវីដទៀត និយាយរួមទៅ អញ្ចឹងវាពិបាកក្នុងការរកស៊ី»។
រីឯអ្នកបើកបររថយន្តឈ្នួលពីភ្នំពេញទៅខេត្តកំពត ដែលសំចតនៅម្តុំផ្សារដើមគ រាជធានីភ្នំពេញ លោក ប៉ែន សាវឿន បានលើកឡើងស្រដៀងគ្នានេះដែរថា ក្នុងអំឡុងពេលមានវិបត្តិកូវីដ១៩នេះ ការរកទទួលទានប្រចាំថ្ងៃរបស់លោកបានធ្លាក់ចុះខ្លាំង ដោយសារពុំមានភ្ញៀវធ្វើដំណើរច្រើនដូចមុន។
អ្នកបើកបររថយន្តឈ្នួលម្នាក់ទៀត លោក សេង វឌ្ឍនា និយាយថា តម្លៃប្រេងសាំងនិងហ្គាស រួមនឹងទំនិញមួយចំនួន បានឡើងថ្លៃជាបន្តបន្ទាប់នៅដើមឆ្នាំ២០២១នេះ ធ្វើឱ្យគាត់ត្រូវចំណាយច្រើន ខណៈការរកចំណូលបានតិចតួចដោយសារតែពុំសូវមានអ្នកធ្វើដំណើរក្នុងអំឡុងពេលមានវិបត្តិកូវីដ។
លោកនិយាយដូច្នេះថា៖ «សម្រាប់ពួកខ្ញុំតាក់ស៊ីនេះ ចៀសមិនរួចទេ ទោះបីជាប្រេងឬហ្គាសឡើងថ្លៃម៉េច ក៏នៅតែរកដែរ គ្រាន់តែប្រឈមមុខនឹងការលំបាក រាល់ថ្ងៃយើងរកមួយថ្ងៃហូបមួយថ្ងៃ វាមិនបានរាល់ថ្ងៃ»។
ក្រុមអ្នកប្រកបរបរសេវាដឹកជញ្ជូនភ្ញៀវទាំងនេះបានស្នើដូចៗគ្នាដល់រដ្ឋាភិបាល ជួយអន្តរាគមន៍ឱ្យតម្លៃហ្គាសនៅត្រឹម១៥០០រៀលក្នុង១លីត្រដដែល ទើបធ្វើឱ្យពួកគេអាចរកប្រាក់មកទ្រទ្រង់ជីវភាពគ្រួសារសមរម្យបាន។
លោក លឿង តៃសេង អ្នករត់ម៉ូតូកង់បីឥណ្ឌាម្នាក់ទៀត បានស្នើថា៖ «សូមឱ្យរដ្ឋាភិបាលជួយឱ្យ[តម្លៃ]ហ្គាសចុះថោក ឱ្យនៅតម្លៃ១លីត្រ១៥០០រៀលដដែល។ ហ្គាសថោក វាជួយឱ្យយើងរកលុយបានច្រើន ហើយធូរថ្លៃ។ បើហ្គាសថ្លៃ វាពិបាក ណាមួយសេដ្ឋកិច្ចកំពុងពិបាកដែរ កូវីដមិនទាន់ធូរស្រាល យើងពិបាករកលុយ ហើយភ្ញៀវគេជិះរកតែធូរៗថ្លៃ ដល់ពេលហ្គាសឡើងថ្លៃ វាពិបាក»។
យោងតាមតម្លៃប្រេងឥន្ធនៈដែលផ្សព្វផ្សាយដោយក្រសួងពាណិជ្ជកម្ម ឱ្យដឹងថា តម្លៃលក់រាយប្រេងឥន្ធនៈសម្រាប់ការអនុវត្ត ចាប់ពីថ្ងៃទី១៦ ដល់ថ្ងៃទី៣១ ខែមករា ឆ្នាំ២០២១នេះ សាំងធម្មតា១លីត្រ តម្លៃ៣៣៥០រៀល ប្រេងម៉ាស៊ូត១លីត្រ តម្លៃ៣០០០រៀល ខណៈសាំងស៊ុពពែ១លីត្រ តម្លៃ៣៩០០រៀល។
អ្នករត់ម៉ូតូកង់បីនៅម្តុំគុកទួលស្លែង លោក សៅ លឿន និយាយថា កាលពីអំឡុងឆ្នាំ២០២០ តម្លៃប្រេងឥន្ធនៈចុះនៅត្រឹមប្រហែលជា៣០០០រៀល ធ្វើឱ្យពួកគាត់ងាយស្រួលរកចំណូលទ្រទ្រង់ជីវភាពគ្រួសារ។ ប៉ុន្តែលោកថា ក្រោយពីស្ថានភាពកូវីដ១៩ ធូរស្រាលបន្តិច តម្លៃប្រេងឥន្ធនៈឡើងថ្លៃដល់ជាង៣០០០រៀលទៅជិត៤០០០រៀលវិញ ដែលធ្វើឱ្យពួកគេជួបបញ្ហាប្រឈមច្រើន ស្របពេលមិនសូវមានភ្ញៀវធ្វើដំណើរច្រើនដូចមុន។
លោកមានប្រសាសន៍ថា៖ «ពីមុន ដឹកភ្ញៀវខ្មែរ ភ្ញៀវបរទេសខ្លះ ឥលូវភ្ញៀវបរទេសអត់មាន ខ្មែរមិនសូវមាន តាមផ្សងព្រេងហើយឥលូវ គេហៅជិះតែភ្ញៀវស្គាល់គ្នាមួយៗ ដល់ភ្ញៀវប្លែកៗ អត់ជិះ គេហៅតែកង់បីឥណ្ឌា គេហៅតាមទូរសព្ទ»។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ មានប្រសាសន៍ថា ក្រសួងរ៉ែ ក្រសួងហិរញ្ញវត្ថុ និងក្រសួងពាណិជ្ជកម្ម បានធ្វើការកំណត់តម្លៃប្រេងឥន្ធនៈជារៀងរាល់១៥ថ្ងៃម្តង ស្របតាមទីផ្សារអន្តរជាតិ។ លោកបន្តថា តម្លៃប្រេងឥន្ធនៈឡើងថ្លៃឬធ្លាក់ចុះ គឺអាស្រ័យទៅលើតម្លៃប្រេងឥន្ធនៈទីផ្សារអន្តរជាតិ ដោយក្រុមហ៊ុនប្រេងឥន្ធនៈមិនអាចលក់តម្លៃចុះជាងតម្លៃទីផ្សារអន្តរជាតិបាននោះទេ។
លោកថា៖ «សព្វថ្ងៃយើងយកតម្លៃប្រេងជាមធ្យមពីទីផ្សារអន្តរជាតិ នៅប្រទេសសិង្ហបុរី បើចង់បានតម្លៃធ្លាក់ចុះដូចសម័យកូវីដ យើងដឹងហើយសម័យកូវីដ ផលិតកម្មទាំងអស់ ជាពិសេសការដឹកជញ្ជូន យើងឃើញយន្តហោះឈប់សម្រាកអស់ហើយ ការដឹកជញ្ជូនផ្សេងទៀតក៏ដោយ ផលិតកម្មក៏មានការថមថយដែរ ដូច្នេះប្រេងបានន័យថា ការផលិតមកច្រើនជាងតម្រូវការ ធ្វើឱ្យតម្លៃប្រេងធ្លាក់ចុះ ប៉ុន្តែឥលូវធ្វើឱ្យតម្លៃប្រេងឡើងថ្លៃបន្តិចមកវិញ»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គឹមអេង មានប្រសាសន៍ថា ក្នុងស្ថានភាពកូវីដ១៩នេះ រដ្ឋាភិបាលត្រូវយកចិត្តទុកដាក់រក្សានូវតម្លៃប្រេងឥន្ធនៈ រួមមាន ប្រេងសាំងនិងហ្គាស ឱ្យនៅតម្លៃទាប ដើម្បីជួយដល់ប្រជាពលរដ្ឋដែលប្រកបរបររត់រថយន្តឈ្នួល និងម៉ូតូកង់បី ឬម៉ូតូឌុបជាដើម ដើម្បីជួយសម្រួលឱ្យពួកគាត់មានលទ្ធភាពដោះស្រាយបញ្ហាប្រឈមនានាក្នុងគ្រួសារបាន។
លោកមានប្រសាសន៍ថា៖ «រាជរដ្ឋាភិបាលគាត់គួរតែមានមធ្យោបាយដោះស្រាយនូវបញ្ហាប្រេងឥន្ធនៈ វានៅក្នុងកម្រិតមួយនៅនឹង ហើយអាចឱ្យចុះទាបជាងនេះ វាអាចជួយបង្កើនប្រាក់ចំណូលសម្រាប់ពួកគាត់ដែរ បើមិនអញ្ចឹងទេ វាធ្វើឱ្យប៉ះពាល់ដល់ជីវភាពរបស់ពួកគាត់ដែរ»៕