ក្រសួងទេសចរណ៍ ឱ្យដឹងថា ក្នុងឆ្នាំ២០២០ កម្ពុជាទទួលបានភ្ញៀវទេសចរអន្តរជាតិតែ១,៣១ លាននាក់ ដែលចំនួននេះមានការថយចុះ៨០% និងភ្ញៀវទេសចរផ្ទៃក្នុង៩លាននាក់ ថយចុះ២០% បើធៀបនឹងឆ្នាំ២០១៩។
នៅក្នុងវេទិកាជាតិអេកូទេសចរណ៍លើកទី២ នៅខេត្តសៀមរាប កាលពីថ្ងៃម្សិលមិញ រដ្ឋមន្ត្រីក្រសួងទេសចរណ៍ លោក ថោង ខុន ត្រូវបានស្រង់សម្តីមកផ្សព្វផ្សាយដោយទំព័រហ្វេសប៊ុករបស់ក្រសួងថា ការថយចុះនូវចំនួនភ្ញៀវទេសចរជាតិនិងអន្តរជាតិនេះ ដោយសារតែពិភពលោក ក៏ដូចជាកម្ពុជា បាននិងកំពុងជួបនូវវិបត្តិជំងឺកូវីដ-១៩។
លោកបានថ្លែងថា៖ «ស្ថិតក្នុងបរិការណ៍ប្រឈមខាងលើ [វិបត្តិកូវីដ១៩] ធ្វើឱ្យកម្ពុជាទទួលបានភ្ញៀវទេសចរអន្តរជាតិ ត្រឹមតែប្រមាណ១,៣១លាននាក់ ក្នុងឆ្នាំ២០២០ ថយចុះ៨០% ធៀបនឹងឆ្នាំ២០១៩»។
តែយ៉ាងណា លោកថា សកម្មភាពទេសចរណ៍ផ្ទៃក្នុង បានបង្ហាញសញ្ញានៃការងើបឡើង ដោយទទួលបានភ្ញៀវទេសចរផ្ទៃក្នុងប្រមាណ៩លាននាក់ ថយចុះ២០% ដែលនិន្នាការនេះបានជួយទ្រទ្រង់វិស័យទេសចរណ៍កម្ពុជាមួយផ្នែក ពិសេសបានជួយឱ្យមូលដ្ឋានអាជីវកម្មទេសចរណ៍មួយចំនួនបើកដំណើរការឡើងវិញ ស្របតាមវិធានសុវត្ថិភាពទេសចរណ៍ និងបានបង្កើតប្រាក់ចំណូលដោយផ្ទាល់ជូនប្រជាពលរដ្ឋមូលដ្ឋានផងដែរ។
យោងតាមទិន្នន័យរបស់ក្រសួងទេសចរណ៍ កាលពីឆ្នាំ២០១៩ កម្ពុជាទទួលបានភ្ញៀវទេសចរអន្តរជាតិ សរុបចំនួន៦,៦១លាននាក់ កើនឡើង៦,៦ភាគរយ និងភ្ញៀវទេសចរក្នុងស្រុកមានជាង១១,៥លាននាក់ កើនឡើងប្រមាណ២ភាគរយ បើធៀបនឹងឆ្នាំ២០១៨។
បើតាមក្រសួងទេសចរណ៍ វិបត្តិនៃជំងឺកូវីដ-១៩ បានបង្កផលប៉ះពាល់ធ្ងន់ធ្ងរជាសកល ទាំងអាយុជីវិរបស់មនុស្សជាតិ វិបត្តិសង្គម និងសេដ្ឋកិច្ចរបស់ពិភពលោក ក្នុងនោះប្រទេសកម្ពុជាក៏រងផលប៉ះពាល់ធ្ងន់ធ្ងរផងដែរ។
ក្រសួងបន្តថា ក្រៅពីបង្កការឆ្លងរីករាលដាលដល់ប្រជាពលរដ្ឋ ផលប៉ះពាល់នៃជំងឺនេះក៏បង្កជាវិបត្តិដល់វិស័យមួយចំនួនផងដែរ ពិសេសគឺវិស័យការងារនិងវិស័យទេសចរណ៍ដែលរងផលប៉ះពាល់ធ្ងន់ជាងគេ ទើបរាជរដ្ឋាភិបាលសម្រេចបញ្ចេញកញ្ចប់ថវិកានិងចំណាត់ការគ្រប់រូបភាព ដើម្បីជួយទ្រទ្រង់ដល់វិស័យទាំងពីរនេះ៕
