បុរសជាកម្មករចំនួន២នាក់បានស្លាប់ក្នុងគ្រោះអគ្គិភ័យឆេះឃ្លាំងស្តុកទំនិញរបស់ក្រុមហ៊ុនឡុងភឿង ស្ថិតនៅសង្កាត់ទួលស្វាយព្រៃ១ ខណ្ឌបឹងកេងកង រាជធានីភ្នំពេញ។
អធិការរងនគរបាលខណ្ឌបឹងកេងកង លោក កុយ ខាន់ណារិទ្ធ បានឱ្យដឹងថា ហេតុការណ៍គ្រោះអគ្គិភ័យនេះបានកើតឡើងកាលពីយប់រំលងអធ្រាត្រឈានចូលថ្ងៃទី២៩ ខែមករា ឆ្នាំ២០២១ បណ្តាលឱ្យឆេះផ្ទះចំនួន៤ល្វែង ក្នុងនោះមានផ្ទះមួយល្វែងជាទីតាំងឃ្លាំងរបស់ក្រុមហ៊ុនឡុងភឿង បណ្តាលឱ្យបុរសពីរនាក់ដែលធ្វើការនិងស្នាក់នៅក្នុងឃ្លាំងនោះបានស្លាប់បាត់បង់ជីវិត។
លោកថា៖ «មានមនុស្សពីរនាក់ដែលជាកម្មករឃ្លាំង ត្រូវបានស្លាប់»។
លោកបន្តថា ឃ្លាំងដាក់អីវ៉ាន់របស់ក្រុមហ៊ុននោះមានផ្ទុកអីវ៉ាន់ជាច្រើនដែលសុទ្ធសឹងតែនាំចូលពីប្រទេសវៀតណាម ដូចជា ថង់ប្លាស្ទិក និងខ្នងកង់ ជាដើម។
អធិការរងខណ្ឌបឹងកេងកងរូបនេះបានឱ្យដឹងទៀតថា អាជ្ញាធរកំពុងសាកសួរនាំម្ចាស់ឃ្លាំងជុំវិញមូលហេតុនៃការឆេះនេះ ដោយសមត្ថកិច្ចនៅមិនទាន់អាចសន្និដ្ឋានបានថាយ៉ាងណានៅឡើយ។
អ្នកស្រី ឡាយ សូហ្គិច អាយុ៥០ឆ្នាំ ជាប្រជាពលរដ្ឋម្នាក់ទៀតដែលមានផ្ទះនៅក្បែរឃ្លាំងដែលឆេះនោះ បាននិយាយថា អគ្គិភ័យបានឆាបឆេះប្រហែលជាម៉ោង១ភ្លឺ ដែលពេលនោះ គ្រួសាររបស់អ្នកស្រីកំពុងសម្រាន្តលង់លក់នៅឡើយ។ អ្នកស្រីបន្តថា អ្នកស្រីបានភ្ញាក់ដឹងខ្លួននៅពេលអ្នកជិតខាងស្រែកប្រាប់ថាមានអគ្គិភ័យកើតឡើង។
អ្នកស្រីមានប្រសាសន៍ថា៖ «ភ័យណាស់ ភ័យឡើងបាត់ព្រលឹង ខ្ញុំចេញមក ខ្ញុំឃើញភ្លើងឆេះ […] បាត់ព្រលឹងអស់រលីង ចេញមកដល់នឹង[មុខផ្ទះ] ភ្លើងវាមានខ្យល់ វាបក់មក និយាយពីថាក្ដៅ ឆេះលឿនមែនទែនហ្មង ឆេះលឿនណាស់ ភ័យណាស់ គួរឱ្យខ្លាច»។
ស្នងការរងទទួលផែនការងារគ្រប់គ្រងអាវុធជាតិផ្ទុះ និងអគ្គិភ័យ លោក ឈាង ផាន់ណារ៉ា មានប្រសាសន៍ថា នាយកដ្ឋាននគរបាលពន្លត់អគ្គិភ័យ បានប្រើប្រាស់រថយន្តចំនួន២០គ្រឿង ស្មើនឹង១០០ជើង និងចំណាយពេលជិត៦ម៉ោង ដើម្បីពន្លត់អគ្គិភ័យនេះ៕
