ស្រ្តីខ្មែររងគ្រោះដែលបង្ហោះសាររកជំនួយលើបណ្តាញសង្គមហ្វេសប៊ុក កាលពីខែធ្នូ ត្រូវបានអាជ្ញាធរជួយបញ្ជូនមកដល់ប្រទេសកម្ពុជាវិញហើយ បន្ទាប់ពីរូបគាត់ត្រូវបានឃាត់ទុកនៅប៉ុស្តិ៍ប៉ូលិសចិន អស់រយៈពេលជាង១ខែ។
ស្រ្តីរងគ្រោះម្នាក់ដែលមានស្រុកកំណើតក្នុងខេត្តក្រចេះ និងបានសម្រេចចាកចេញពីកម្ពុជាទៅប្រទេសចិន តាមការអូសទាញរបស់មេខ្យល់នៅឆ្នាំ២០១៨ ក្នុងវ័យ១៧ឆ្នាំ ប្រាប់ VOD ឱ្យដឹងនៅថ្ងៃនេះថា នាងបានមកដល់កម្ពុជាវិញហើយ ជាមួយស្រ្តីខ្មែរម្នាក់ផ្សេងទៀត កាលពីថ្ងៃពុធ ទី២៧ ខែមករា ឆ្នាំ២០២១នេះ បន្ទាប់ពីអាជ្ញាធរចិនឃុំទុកនៅទីស្នាក់ការរបស់ប៉ូលិសក្នុងតំបន់អស់រយៈពេលប្រមាណ៩០ថ្ងៃ។
ស្រ្តីរងគ្រោះដដែល ប្រាប់ថា ប៉ូលិសចិនបានជូនគាត់ដល់ព្រលានយន្តហោះនៅប្រទេសចិន ហើយពេលនាងដល់ព្រលានយន្តហោះអន្តរជាតិពោធិ៍ចិនតុង មានអាជ្ញាធរកម្ពុជាទៅទទួលនិងជូននាងឱ្យមកស្នាក់នៅក្នុងស្នាក់ការប៉ូលិសមួយកន្លែងក្នុងរាជធានីភ្នំពេញ ដើម្បីធ្វើចត្តាឡីស័ក។
ជនរងគ្រោះរូបនេះប្រាប់ថា៖ «ដូចបានកើតម្តងទៀតអ៊ីចឹង! ប៉ុណ្ណឹងរំភើប! មកដល់ខ្មែររំភើបប៉ុណ្ណឹងហើយ ប្រសិនបានទៅដល់ផ្ទះជួបគ្រួសារទៀត មិនដឹងរំភើបប៉ុណ្ណាទេ»។
ម្តាយស្រ្តីរងគ្រោះ ប្រាប់ថា គាត់គេងមិនលក់ពេញមួយយប់ ដោយសារត្រេកអរពេលឮដំណឹងថា កូនស្រីត្រូវបានជួយសង្គ្រោះមកដល់កម្ពុជាវិញ។ អ្នកស្រីបន្តថា កូនស្រីរបស់គាត់បានផ្តាំឱ្យគាត់ផ្ញើខោអាវសម្រាប់ទុកឱ្យនាងផ្លាស់ប្តូរ ដោយថា អំឡុងពេលនៅក្នុងប្រទេសចិន រយៈពេល៤ឆ្នាំ គ្រួសារបុរសចិនមិនបានទិញខោអាវឱ្យនាងស្លៀក និងមិនបានផ្តល់លុយឱ្យនាងនោះទេ។
អ្នកស្រីបន្ថែមថា គាត់ចង់ទៅជួបកូនស្រីណាស់ ប៉ុន្តែគាត់សោកស្តាយដែលមិនទាន់មានលទ្ធភាពចំណាយលើការធ្វើដំណើរ និងម្យ៉ាងកូនស្រីរបស់គាត់កំពុងឋិតក្នុងការធ្វើចត្តាឡីស័ក១៤ថ្ងៃ ដែលមិនអនុញ្ញាតឱ្យសាច់ញាតិជួបសួរសុខទុក្ខដោយផ្ទាល់នៅឡើយ។
អ្នកស្រីប្រាប់ថា៖ «ចង់លោកគ្រូ! ប៉ុន្តែអត់លុយ ហើយឮគេថាអត់បានជួបផ្ទាល់ទៀត។ ទាល់គេឃុំ[ធ្វើចត្តាឡីស័ក]បានពីរអាទិត្យ បានយើងបានទៅយកកូនមកផ្ទះហ្មង»។
អ្នកនាំពាក្យក្រសួងការបរទេសកម្ពុជា លោក កុយ គួង ប្រាប់ VOD ឱ្យដឹងតាមសារប្រព័ន្ធតេឡេក្រាម(Telegram)ថា ក្រសួងបានជួយសម្របសម្រួលបញ្ជូនស្រ្តីរងគ្រោះខាងលើ រួមជាមួយស្រ្តីរងគ្រោះម្នាក់ផ្សេងទៀត ឱ្យបានមកដល់កម្ពុជា នៅល្ងាចថ្ងៃពុធ ទី២៧ ខែមករា។
លោកឱ្យដឹងបន្ថែមថា ស្ថានទូតកម្ពុជាក៏បានជួយស្រ្តីរងគ្រោះ៨នាក់ផ្សេងទៀតមកដល់ព្រលានយន្តហោះភ្នំពេញ នៅយប់ថ្ងៃជាមួយគ្នានេះដែរ តាមជើងហោះហើរមួយផ្សេងទៀតពីព្រលានយន្តហោះខេត្តហ្វូជាន ប្រទេសចិន។
ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន លោក ជាវ ផល្លី មិនទាន់អាចផ្តល់ព័ត៌មានជុំវិញជនរងគ្រោះដែលសង្គ្រោះបាននៅឡើយ ដោយសារពួកគេត្រូវឆ្លងកាត់វិធានការធ្វើចត្តាឡីស័ក១៤ថ្ងៃជាមុនសិន ខណៈជនរងគ្រោះកំពុងត្រូវបានជួយសង្គ្រោះជាបន្តបន្ទាប់។
លោក ជាវ ផល្លី ប្រាប់ថា៖ «យើងសង្គ្រោះជាបន្តបន្ទាប់ហ្នឹង ត្រឡប់មកវិញជាបន្តបន្ទាប់ហ្នឹង ហើយកំពុងតែរង់ចាំវិធានចត្តាឡីស័ក។ ក្រោយចត្តាឡីស័ក យើងនឹងចាត់ការបន្ត។ យើងនឹងសម្ភាសស្វែងរកមេខ្យល់ ចាត់ការតាមផ្លូវច្បាប់»៕
