ក្រសួងទេសចរណ៍ រកឃើញថា ក្នុងឆ្នាំ២០២០ ភោជនីយដ្ឋាន ផ្ទះសំណាក់ និងសណ្ឋាគារ ប្រហែលជា៣០% ក្នុ្ងចំណោមប្រមាណ១ម៉ឺនទីតាំង បានបិទទ្វារឬផ្អាកដំណើរការបណ្តោះអាសន្ន ដោយសារបញ្ហាជំងឺកូវីដ១៩។
អ្នកនាំពាក្យក្រសួងទេសចរណ៍ លោក តុប សុភ័ក ប្រាប់វីអូឌីនៅថ្ងៃសុក្រនេះថា ការឆ្លងរាលដាលនៃជំងឺកូវីដ១៩ បានធ្វើឱ្យប៉ះពាល់ខ្លាំងដល់វិស័យទេសចរណ៍ ក្នុងនោះក៏បានប៉ះពាល់ដល់អាជីវកម្មមួយចំនួនដូចជា សណ្ឋាគារ ផ្ទះសំណាក់ និងភោជនីយដ្ឋានផងដែរ។
លោកបន្តថា ក្នុងឆ្នាំ២០២០ សណ្ឋាគារ ផ្ទះសំណាក់ និងភោជនីយដ្ឋាន ប្រហែលជាង២ពាន់ទីតាំង ឬស្មើប្រមាណ៣០% នៃចំនួនសរុបប្រមាណ១ម៉ឺនទីតាំងនៅទូទាំងប្រទេស បានបិទទ្វារឬផ្អាកដំណើរការបណ្តោះអាសន្ន ខណៈ៧០%ទៀតនៅដំណើរការធម្មតាដើម្បីទទួលភ្ញៀវទេសចរក្នុងស្រុក។
ទោះជាបែបនេះក្តី អ្នកនាំពាក្យរូបនោះអះអាងថា ក្រោយពីជួបបញ្ហាប្រឈមនឹងជំងឺកូវីដ១៩ ធ្វើឱ្យម្ចាស់ហាង និងម្ចាស់សណ្ឋាគារ ឬម្ចាស់ផ្ទះសំណាក់ បិទទ្វារនោះ រដ្ឋាភិបាលបានជួយដោះស្រាយបញ្ហានានាជូនបុគ្គលិកក្នុងវិស័យនេះនិងម្ចាស់អាជីវកម្មទាំងនោះទៀតផង។
លោក តុប សុភ័ក មានប្រសាសន៍ដូច្នេះថា៖ «រដ្ឋាភិបាលមានការលើកលែងការបង់ពន្ធ ក៏ដូចជាការផ្តល់នូវប្រាក់ឧបត្ថម្ភជាគោលនយោបាយជូនដល់កម្មករនិយោជិតដែលបាត់បង់ការងារចំនួន៥ទៅ៦ជុំហើយ។ ចូលដល់ខែមករា ឆ្នាំ២០២១នេះ ចូលដល់៧ជុំហើយ ៣ខែទៀតក្នុងឆ្នាំ២០២១ ជាយន្តការរបស់រាជរដ្ឋាភិបាលបានជួយបន្ធូរបន្ថយ មានន័យថា បង់ពន្ធជំនួសដល់ប្រតិបត្តិករអាជីវកម្មទេសចរណ៍ទាំងអស់»។
បន្ថែមពីនេះ លោក សុភ័ក បញ្ជាក់ថា ក្រោយពីស្ថានភាពកូវីដ១៩ធូរស្រាលឡើងវិញ ក្រសួងបានត្រៀមរៀបចំយុទ្ធសាស្ត្រផ្សេងៗសម្រាប់អនាគតថ្មី ដើម្បីស្តារទេសចរណ៍នៅកម្ពុជាឱ្យល្អឡើងវិញផងដែរ។
អ្នកគ្រប់គ្រងសណ្ឋាគារមួយនៅក្នុងខេត្តសៀមរាប សុំមិនបញ្ចេញឈ្មោះ បានឱ្យដឹងថា សណ្ឋាគាររបស់គាត់ រួមទាំងសណ្ឋាគារក្បែរនោះ ភាគច្រើនត្រូវបានបិទនិងផ្អាកអាជីវកម្មបណ្តោះអាសន្ន ដោយសារមិនមានភ្ញៀវទៅស្នាក់នៅអំឡុងពេលមានវិបត្តិជំងឺកូវីដ១៩។
លោបន្តថា បច្ចុប្បន្ននេះ សណ្ឋាគារគាត់បើកដំណើរការធម្មតា ប៉ុន្តែមិនសូវមានភ្ញៀវចូលស្នាក់នៅនោះទេ ដែលធ្វើឱ្យសណ្ឋាគារនេះមានការខាតបង់ច្រើន។
លោកថា៖ «បើយើងគិតទៅ អូតែលនៅតាមផ្លូវបិទជិតអស់ហើយ យើងទុកនៅគ្រាន់តែសម្រាប់មើលថែ បោសសម្អាតកន្លែង។ ជាក់ស្តែង បើកដើម្បីចំណេញក៏មិនមែនដើម្បីចំណេញ បើកដើម្បីខាតក៏មិនមែនដើម្បីខាត គ្រាន់តែថា បើកកុំឱ្យខូចសម្ភារ។ បើនិយាយខាត វាខាតពេកហើយ»។
ប្រធានសមាគមទេសចរណ៍កម្ពុជា លោកស្រី ឆាយ ស៊ីវលីន មានប្រសាសន៍ថា ម្ចាស់សណ្ឋាគារ ផ្ទះសំណាក់ និងភោជនីយដ្ឋាន ដែលបិទទ្វារ អាចមានច្រើនរហូតដល់៤០%ឯណោះ ព្រោះនៅមានម្ចាស់អាជីវកម្មមួយចំនួនមិនបានជូនដំណឹងទៅក្រសួងទេសចរណ៍ ដោយសារមិនបានបំពេញលក្ខខណ្ឌគ្រប់គ្រាន់ ដូចជា ម្ចាស់អាជីវកម្មខ្លះមានអាជ្ញាបណ្ណស្របច្បាប់តែមិនបានបំពេញលក្ខខណ្ឌគ្រប់គ្រាន់ និងខ្លះទៀតមិនមានអាជ្ញាបណ្ណស្របតាមច្បាប់ការងារ ជាដើម។
ទោះជាបែបនេះក្តី លោកស្រីអះអាងថា ដំណាក់កាលកូវីដនេះ រដ្ឋាភិបាលត្រូវយកចិត្តទុកដាក់ធ្វើយ៉ាងណាបង្កើតការងារដល់កម្មករដែលធ្វើការលើវិស័យទេសចរណ៍ សណ្ឋាគារ ផ្ទះសំណាក់ និងភោជនីយដ្ឋាន ដើម្បីកុំឱ្យពួកគេផ្លាស់ប្តូរការងារថ្មីខុសពីជំនាញរបស់ខ្លួន។
លោកស្រីបញ្ជាក់ថា បើរដ្ឋាភិបាលមិនបង្កើតការងារនិងរកការងារឱ្យត្រូវជំនាញពួកគេ ឬផ្តល់កម្ចីអត្រាការប្រាក់ទាបជាងវិស័យធនាគារដល់ម្ចាស់អាជីវកម្មទេ នៅពេលស្ថានភាពកូវីដល្អឡើងវិញ នឹងធ្វើឱ្យកម្ពុជាខ្វះធនធានមនុស្ស ពិបាកក្រកួតប្រជែងទីផ្សារជាមួយប្រទេសដែលជាសមាជិកអាស៊ាន។
លោកបញ្ជាក់ដូច្នេះថា៖ «វិស័យទេសចរណ៍របស់យើង ត្រូវការប្រកួតប្រជែងក្នុងតំបន់អាស៊ាន បើយើងខ្វះធនធានមនុស្ស […] កន្លងមក យើងខ្វះរួចហើយ គ្រាន់តែយើងទទួលបានជា៦លាននាក់កាលពីមុខកូវីដ យើងខ្វះបាត់ទៅហើយ[នូវ]ធនធានមនុស្សនៅក្នុងវិស័យទេសចរណ៍។ បើសិនជាយើងបណ្តែតបណ្តោយឱ្យខ្វះបន្តទៅទៀត តើវានឹងទៅជាយ៉ាងណា? មានការប្រកួតប្រជែង យើងត្រូវចាប់ផ្តើមសារថ្មី បើយើងបណ្តែតបណ្តោយឱ្យធ្លាក់ទៅវិញ យើងពិបាកស្តារណាស់ ដើម្បីវាយចូលក្នុងប្រទេសអាស៊ាន»។
កាលពីថ្ងៃទី២៧ ខែមករានេះ ក្រសួងទេសចរណ៍ឱ្យដឹងដែរថា ក្នុងឆ្នាំ២០២០ កម្ពុជាទទួលបានភ្ញៀវទេសចរអន្តរជាតិតែ១,៣១លាននាក់ ដែលចំនួននេះមានការថយចុះ៨០% និងភ្ញៀវទេសចរផ្ទៃក្នុង៩លាននាក់ ថយចុះ២០% បើធៀបនឹងឆ្នាំ២០១៩។
យោងតាមទិន្នន័យរបស់ក្រសួងទេសចរណ៍ កាលពីឆ្នាំ២០១៩ កម្ពុជាទទួលបានភ្ញៀវទេសចរអន្តរជាតិ សរុបចំនួន៦,៦១លាននាក់ កើនឡើង៦,៦ភាគរយ និងភ្ញៀវទេសចរក្នុងស្រុកមានជាង១១,៥លាននាក់ កើនឡើងប្រមាណ២ភាគរយ បើធៀបនឹងឆ្នាំ២០១៨ ៕