កសិករឥណ្ឌារាប់សែននាក់តវ៉ាបង្អត់អាហារពេញមួយថ្ងៃនៅថ្ងៃសៅរ៍នេះ ដើម្បីបង្ហាញការមិនពេញចិត្តចំពោះច្បាប់ថ្មីដែលផ្តល់ប្រយោជន៍ច្រើនដល់ឈ្មួញធំៗ ខណៈកសិករត្រូវចំណាយដើមទុនច្រើនក្នុងការធ្វើកសិកម្ម។
តាមការចុះផ្សាយរបស់សារព័ត៌មានChannel News Asia បានឱ្យដឹងថា កសិកររាប់សែននាក់ បាននាំគ្នាបោះជុំរុំតវ៉ានៅជាយក្រុងញូដេលីប្រមាណ២ខែមកហើយ ដើម្បីទាមទារឱ្យគិតគូពីផលប្រយោជន៍របស់ពួកគេ។ អ្នកតវ៉ាអះអាងថា ច្បាប់បានផ្តល់ប្រយោជន៍លើសលប់ដល់ក្រុមហ៊ុនធំៗជាឈ្មួញទិញកសិផល។
កាលពីសប្តាហ៍មុនមានការប៉ះទង្គិចគ្នារវាងអ្នកតវ៉ា និងសមត្ថកិច្ចដែលបណ្តាលឱ្យអ្នកតវ៉ាម្នាក់ស្លាប់ និងរាប់រយនាក់ផ្សេងទៀតរងរបួស។
លោក Samyukt Kisan Morcha មេដឹកនាំកសិករតវ៉ាបញ្ជាក់ថា ការបង្អត់អាហារជាសញ្ញាបញ្ជាក់ប្រាប់មេដឹកនាំថា ការតវ៉ាធ្វើឡើងដោយសន្តិវិធី ទាមទារឱ្យដោះស្រាយទុក្ខលំបាករបស់កសិករ។
លោក Samyukt Kisan Morcha៖«ចលនារបស់កសិករធ្វើឡើងដោយសន្តិវិធីនៅពេលនេះ ហើយពេលបន្ទាប់ក៏ធ្វើឡើងដោយសន្តិវិធីដែរ»។
ឥណ្ឌាមានប្រជាជន១,៣ពានលាននាក់ ជាប្រទេសមានប្រជាជនច្រើនលំដាប់ទី២បន្ទាប់ពីចិន។ ប្រជាជនឥណ្ឌា៥០ភាគរយជាកសិករ។ ចំពោះបញ្ហាច្បាប់ថ្មីនេះតំណាងកសិករ និងរដ្ឋាភិបាលបានជួបចរចាចំនួន១១លើកហើយ តែនៅមិនទាន់ទទួលបានផលនោះទេ៕