មន្ទីរអប់រំរាជធានីភ្នំពេញ បានរកឃើញថា គ្រូបង្រៀនម្នាក់នៅសាលាបឋមសិក្សាសន្ធរម៉ុក ពិតជាបានទារប្រាក់ចំនួន៦ម៉ឺនរៀលក្នុងមួយខែពីសិស្សមែន ប៉ុន្តែសម្រាប់វិធានការលើគ្រូបង្រៀនរូបនោះ មន្ទីរថា នឹងសម្រេចបន្ទាប់ពីប្រជុំនៅថ្ងៃស្អែក។
ពេលថ្មីៗនេះ ឪពុកម្តាយនិងអាណាព្យាបាលសិស្សមួយចំនួនដែលរៀននៅសាលាបឋមសិក្សាសន្ធរម៉ុក បានផ្សព្វផ្សាយតាមបណ្តាញសង្គមហ្វេសប៊ុកថា គ្រូបង្រៀននៅសាលាមួយនេះបានបង្ខំឱ្យសិស្សរៀនគួរបន្ថែមម៉ោង និងដេញចេញក្រៅថ្នាក់ចំពោះសិស្សណាដែលមិនរៀនគួរ ហើយបានទារលុយពីសិស្សម្នាក់៦ម៉ឺនរៀលជាថ្លៃដឹងគុណគ្រូជាដើម។
យោងតាមហ្វេសប៊ុក ឈ្មោះ Buthoeun Ev បានផ្សព្វផ្សាយថា កូនរបស់គាត់ត្រូវបានអ្នកគ្រូបង្រៀននៅសាលាបឋមសិក្សាសន្ធរម៉ុកដេញចេញពីថ្នាក់ ដោយសារតែកូនរបស់គាត់ពុំបានរៀនគួរបន្ថែមម៉ោង។ បុរសរូបនេះបានសរសេរនៅលើហ្វេសប៊ុកទៀតថា បើមិនរៀនគួរបន្ថែមម៉ោងទេ គ្រូបង្រៀនរូបនោះបានតម្រូវឱ្យកូនរបស់គាត់បង់លុយចំនួន៦ម៉ឺនរៀលក្នុង១ខែសម្រាប់ដឹងគុណគ្រូ។
ប្រហាក់ប្រហែលគ្នានេះដែរ ហ្វេសប៊ុកម្នាក់ទៀត ឈ្មោះ SreyNeth SreyNeth បានលើកឡើងថា កូនប្រុសពៅរបស់គាត់រៀនថ្នាក់ទី៦ នៅសាលាបឋមសិក្សាសន្ធរម៉ុក ក៏ត្រូវបានគ្រូទារលុយចំនួន៦ម៉ឺនរៀលជាថ្លៃដឹងគុណគ្រូ និងថ្លៃទឹកភ្លើងចំនួន២ម៉ឺនរៀលទៀតដែរ។
អ្នកនាំពាក្យក្រសួងអប់រំ យុវជន និងកីឡា លោក ឌី ខាំបូលី ប្រាប់វីអូឌីនៅថ្ងៃអង្គារនេះថា ក្រសួងបានដឹងករណីនេះហើយ។ លោកបន្តថា ក្រសួងបានឱ្យមន្ទីរអប់រំរាជធានីភ្នំពេញសិក្សាស្រាវជ្រាវលើករណីនេះ ដើម្បីឈានទៅចាត់វិធានការតាមច្បាប់។
ប្រធានមន្ទីរអប់រំ យុវជន និងកីឡារាជធានីភ្នំពេញ លោក ហែម ស៊ីណារ៉េត មានប្រសាសន៍ថា អ្នកគ្រូបង្រៀនដែលយកលុយសិស្សនោះ បានសារភាពអំពីកំហុសថា ខ្លួនពិតជាបានយកលុយពីសិស្សដូចការលើកឡើងរបស់ឪពុកម្តាយសិស្សមែន។
លោកបន្តថា ជាបឋម មន្ទីរបានដាក់ពិន័យទៅលើគ្រូបង្រៀនរូបនោះហើយ ក្រោយពីបានរកឃើញថា គ្រូបង្រៀនរូបនោះបានប្រព្រឹត្តកំហុសដូចការលើកឡើងរបស់អាណាព្យាបាលសិស្ស។
លោកបន្ថែមថា៖«ឥលូវយើងមានវិធានការរដ្ឋបាលហើយ។ យើងបានឱ្យគាត់មកសារភាពហើយ។ យើងមានឯកសារហូរហែដែរហើយ ប៉ុន្តែខ្ញុំមិនទាន់ហ៊ានទម្លាយថា វិធានការខ្ញុំត្រូវធ្វើយ៉ាងម៉េចៗទៀត ខ្ញុំអត់ទាន់ដឹងទេ។ ដោយខ្ញុំទាមទារការប្រជុំសម្រេចមួយទៀត»។
គ្រូបង្រៀននៅសាលាបឋមសិក្សាសន្ធរម៉ុកម្នាក់ដែលសុំមិនបញ្ចេញឈ្មោះ បាននិយាយថា អ្នកគ្រូដែលយកលុយពីសិស្សក្នុងម្នាក់៦ម៉ឺនរៀលនោះ ជាគ្រូបង្រៀនសិស្សថ្នាក់ទី៦។ អ្នកស្រីបន្តថា នៅក្នុងសាលាបឋមសិក្សាសន្ធរម៉ុក គឺពិតជាមានករណីបង្រៀនគួរថែមម៉ោងមែន ប៉ុន្តែសម្រាប់លោកគ្រូ អ្នកគ្រូផ្សេង ពុំមានការបង្ខិតបង្ខំឱ្យសិស្សរៀននិងយកលុយសិស្សនោះទេ។
អ្នកស្រីបន្ថែមថា៖ «និយាយទៅ ពួកខ្ញុំឈឺចាប់ណាស់ដែលគ្រូម្នាក់មកធ្វើរឿងអញ្ចឹង ហើយប៉ះពាល់ដល់ពួកយើងគ្រប់គ្នា។ ពួកយើងខំប្រឹងណាស់ ទទួលបានលេខ១រាល់ឆ្នាំ សាលាសន្ធរម៉ុក មិនថាផ្នែកបច្ចេកទេស មិនថាបង្រៀន តែដល់ពេលគាត់ធ្វើបែបនេះ ពួកខ្ញុំអត់មានមុខជួបមហាជនទេ។ គ្រូៗនៅទីនេះ អត់មានអ្នកណាគាំទ្រគាត់មួយទេ ឥលូវគេឱ្យចាត់វិធានការច្បាប់ហើយ»។
អ្នកស្រី ម៉ាស់ សាឌី អាយុ៤២ឆ្នាំ ជាម្តាយរបស់សិស្សចំនួន៣នាក់ដែលរៀននៅសាលាបឋមសិក្សាសន្ធរម៉ុកនេះ ប្រាប់វីអូឌីពេលកំពុងចាំទទួលកូននៅមុខសាលាថា កូនៗទាំង៣នាក់របស់គាត់សុទ្ធតែរៀនគួរបន្ថែមម៉ោងទាំងអស់គ្នា ដោយម្នាក់ៗត្រូវបង់ថ្លៃ៦ម៉ឺនរៀលក្នុងមួយខែ និងបង់ទឹកភ្លើងក្នុងម្នាក់២ម៉ឺនរៀលក្នុងមួយឆ្នាំ។ អ្នកស្រីថា ការដែលកូនគាត់រៀនបន្ថែមម៉ោងនេះ ពុំមានការបង្ខិតបង្ខំនោះទេ គឺរៀនដោយស្ម័គ្រចិត្ត ហើយអ្នកស្រីក៏ពេញចិត្តឱ្យកូនរៀនបន្ថែមម៉ោងដែរ។
អ្នកស្រីបន្ថែមថា៖ «សម្រាប់កូនខ្ញុំ ដូចអត់ឮគ្រូថាម៉េចផង តែគ្រូថាបើរៀនគួរបន្ថែម ម្នាក់បង់៦ម៉ឺនរៀល តែកូនណាអត់លុយតាមហ្នឹងទៅ មិនបាច់រៀនក៏បានដែរ។ គាត់មិនកំណត់ឱ្យយើងបង់ឬទារថ្លៃនេះថ្លៃនោះទេ»។
លោក កែវ សុខា អាយុ៦០ឆ្នាំ ដែលចាំទទួលចៅនៅសាលានេះដែរ បាននិយាយថា លោកបានឮព័ត៌មានពាក់ព័ន្ធនឹងករណីគ្រូបង្រៀនយកលុយពីសិស្សនេះដែរ ប៉ុន្តែចៅរបស់លោកពីរនាក់ដែលរៀននៅសាលានេះ ពុំមានការទារលុយពីលោកគ្រូអ្នកគ្រូនោះទេ។ លោកថា ប្រសិនបើមានករណីនេះកើតឡើងមែន វានឹងធ្វើឱ្យប៉ះពាល់ដល់ទៅសិស្សក្រីក្រ។
លោកបន្ថែមថា៖ «ព្រោះអីសិស្សខ្លះគាត់ក្រីក្រដែរ មិនមែនសិស្សសុទ្ធតែមានទេ បើបង្ខំឬទារលុយឱ្យគាត់បង់ច្រើនអញ្ចឹង វាប៉ះពាល់ដល់គាត់ដែរ»។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ករណីគ្រូយកលុយពីសិស្ស ជាទង្វើខុសច្បាប់។ លោកថា កន្លងមក បញ្ហានេះបានឮ និងកើតឡើងជារឿយៗ ជាពិសេសនៅរាជធានីភ្នំពេញ។
លោក សន ជ័យ បានស្នើទៅក្រសួងនិងមន្ទីរអប់រំ ត្រូវពង្រឹងការអនុវត្តច្បាប់និងត្រូវចាត់វិធានការឱ្យខានតែបាន ចំពោះគ្រូបង្រៀនទាំងឡាយណាដែលបានប្រព្រឹត្តកំហុសឆ្គងទាំងនេះ។
លោកបន្ថែមថា៖ «ការយកលុយពីសិស្សជារឿងមួយដែលខុសច្បាប់ ហើយជារឿងមួយដែលយើងតែងតែឮជាពាក្យចចាមអារ៉ាម បែបរ៉ាំរ៉ៃមកហើយ។ ខ្ញុំហៅថា ជាជំងឺរ៉ាំរ៉ៃ អញ្ចឹងខ្ញុំគិតថា ការចាត់វិធានការបែបនេះ ជារឿងមួយសមហេតុសមផល ដើម្បីកុំឱ្យសិស្សក្លាយជាជនរងគ្រោះ ដោយសារការរៀនសូត្ររបស់គាត់។ រឿងបែបនេះតិចក្តីច្រើនក្តី វានឹងធ្វើឱ្យប៉ះពាល់ដល់សតិអារម្មណ៍របស់ឪពុកម្តាយសិស្ស»៕