ចូ បៃឌិន ទាម​ទារ​ឱ្យ​យោធា​ផ្តល់​អំណាច​ឱ្យ​លោក​ស្រី អ៊ុង សាន​ស៊ូជី​ វិញ

ប្រធានាធិបតីសហរដ្ឋអាមេរិក លោក ចូ បៃឌិន អំពាវនាវឱ្យពួកយោធាមីយ៉ាន់ម៉ាប្រគល់អំណាចទៅឱ្យលោកស្រី អ៊ុង សានស៊ូជី វិញជាបន្ទាន់ ហើយលោកក៏បានពិនិត្យពីមធ្យោបាយដែលត្រូវចាត់វិធានការលើករណីនេះ។​

បើយោងតាម AFP លោក ចូ បៃឌិន បញ្ជាក់ថា សហរដ្ឋអាមេរិក​ត្រូវតែចេញមុខការពារនៅពេលដែលដំណើរការប្រជាធិបតេយ្យរងការវាយប្រហារ។

លោក ចូ បៃឌិន៖ «សហរដ្ឋអាមេរិក​ត្រូវចេញមុខការពារប្រជាធិបតេយ្យ នៅពេលដែលប្រជាធិបតេយ្យស្ថិតនៅក្នុងការបំផ្លាញ»។

លោក បៃឌិន ក៏បានប្តេជ្ញាក្នុងការធ្វើការងារជាមួយប្រទេសដៃគូផ្សេងទៀត ក្នុងការរួមគ្នាជាជំហរមួយដើម្បីដាក់សម្ពាធឱ្យពួកយោធាមីយ៉ាន់ម៉ាងាកទៅរកការគោរពសំឡេងបោះឆ្នោតតាមដំណើរការប្រជាធិបតេយ្យវិញ។​

សេតវិមានក៏បានចេញសេចក្តីថ្លែងការណ៍ក្រោយការធ្វើរដ្ឋប្រហារភ្លាម បញ្ជាក់ពីការចាត់វិធានការផ្សេងៗលើពួកយោធា ហើយបញ្ជាក់ថា ការដកទណ្ឌកម្មពីមីយ៉ាន់ម៉ាកាលពីទសវត្សរ៍មុនគឺដោយសារតែប្រទេសនេះងាកចេញពីរបបយោធាទៅជាប្រជាធិបតេយ្យ។​

ក្រោយការធ្វើរដ្ឋប្រហារដឹកនាំដោយឧត្តមសេនីយ៍ មិញអ៊ុង ឡាំង នៅថ្ងៃទី១ ខែកុម្ភៈនោះ ពួកយោធាបានឃុំខ្លួនលោកស្រី អ៊ុង សានស៊ូជី និងថ្នាក់ដឹកនាំនៅក្នុងគណបក្សសម្ព័ន្ធដើម្បីលទ្ធិប្រជាធិបតេយ្យ ហើយប្រកាសដាក់ប្រទេសស្ថិតនៅក្នុងគ្រាមានអាសន្ន១ឆ្នាំក្រោមការគ្រប់គ្រងរបស់អំណាចយោធា៕​​