អគ្គស្នងការដ្ឋាននគរបាលជាតិ ណែនាំដល់កម្លាំងនគរបាលក្រោមឱវាទការពារសន្តិសុខសណ្តាប់ធ្នាប់សាធារណៈនិងសុវត្ថិភាពសង្គម ក្នុងឱកាសបុណ្យចូលឆ្នាំចិន-វៀតណាម។
សេចក្តីណែនាំរបស់អគ្គស្នងការដ្ឋាននគរបាលជាតិ ចុះថ្ងៃទី១ ខែកុម្ភៈ ឆ្នាំ២០២១ បានឱ្យដឹងថា បុណ្យចូលឆ្នាំថ្មីប្រពៃណីរបស់ប្រជាជនចិន-វៀតណាម នឹងមកដល់នៅថ្ងៃទី១១ ដល់ថ្ងៃទី១៣ ខែកុម្ភៈនេះ ដែលតម្រូវឱ្យមានការការពារ និងធានានូវសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមឱ្យបានល្អប្រសើរជូនពលរដ្ឋ។
ករណីនេះ អគ្គស្នងការដ្ឋាននគរបាលជាតិ ណែនាំដល់ប្រធាននាយកដ្ឋានកណ្តាល នាយកដ្ឋាន-អង្គភាព និងស្នងការដ្ឋាននគរបាលរាជធានី-ខេត្តទាំងអស់ ត្រូវផ្តោតលើការងារមួយចំនួន ដូចជា ត្រូវយកចិត្តទុកដាក់ក្តាប់និងប្រមូលព័ត៌មានពីសភាពការណ៍សន្តិសុខ សណ្តាប់ធ្នាប់សាធារណៈ ជាពិសេសឧបាយកល សកម្មភាពបង្កអសន្តិសុខ ឬការញុះញង់នានា ដើម្បីមានវិធានការបង្ការ និងទប់ស្កាត់បានទាន់ពេល។
អគ្គស្នងការដ្ឋាន ក៏បានណែនាំឱ្យចាត់វិធានការការពារសន្តិសុខ សណ្តាប់ធ្នាប់ចរាចរណ៍នៅតាមទីវត្តអារ៉ាម ព្រះវិហារចិននិងវៀតណាម ទីសក្ការៈ និងរមណីយដ្ឋាននានា និងរឹតបន្តឹងការអនុវត្តច្បាប់ចរាចរណ៍។
ក្រៅពីនោះ អគ្គស្នងការនគរបាលជាតិ ក៏បានរំឭកដាស់តឿនឱ្យមានការប្រុងប្រយ័ត្នគ្រោះអគ្គិភ័យ ហាមដាច់ខាតការដុតផាវនិងកាំជ្រួច និងផ្សព្វផ្សាយវិធានការការពារការពីជំងឺកូវីដ១៩ ដល់ប្រជាពលរដ្ឋឱ្យបានទូលំទូលាយផងដែរ៕
