ស្ថានទូតកម្ពុជាប្រចាំប្រទេសម៉ាឡេស៊ី បានជួយអន្តរាគមន៍នាំក្មេងស្រីខ្មែរឥស្លាមម្នាក់ត្រឡប់មកកម្ពុជាវិញកាលពីចុងខែមករា បន្ទាប់ពីម្ចាស់ផ្ទះធ្វើទារុណកម្មកាត់ត្រចៀក។
ក្នុងលិខិតរបស់ស្ថានទូតកម្ពុជាប្រចាំនៅកូឡាឡាំពួ ប្រទេសម៉ាឡេស៊ី បានឱ្យដឹងកាលពីថ្ងៃទី២៩ ខែមករា ថាពលការិនីរងគ្រោះឈ្មោះ អ.ស.ក.ម ភេទស្រី អាយុ១៦ឆ្នាំ បានទៅធ្វើការងារជាជំនួយការមេផ្ទះនៅប្រទេសម៉ាឡេស៊ី ហើយត្រូវបានម្ចាស់ផ្ទះធ្វើទារុណកម្មកាត់ត្រចៀក។
ករណីនេះ អាជ្ញាធរខ្មែរសហការជាមួយអាជ្ញាធរម៉ាឡេស៊ី ក្រោមការសម្របសម្រួលពីក្រសួងការបរទេសនិងកិច្ចសហប្រតិបត្តិការអន្តរជាតិកម្ពុជា ព្រមទាំងស្ថានទូតព្រះរាជាណាចក្រកម្ពុជាប្រចាំប្រទេសម៉ាឡេស៊ី បានជួយអន្តរាគមន៍សង្គ្រោះជនរងគ្រោះដោយជោគជ័យ និងបានបញ្ជូនត្រឡប់មកដល់កម្ពុជា នាថ្ងៃទី២៩ ខែមករា ឆ្នាំ២០២១ វេលាម៉ោង១៧និង៤៥នាទីរសៀល។
បច្ចុប្បន្ន ស្ត្រីរងគ្រោះនោះកំពុងអនុវត្តវិធានចត្តាឡីស័ករយៈពេល១៤ថ្ងៃ នៅមណ្ឌលចត្តាឡីស័កព្រែកព្នៅ រាជធានីភ្នំពេញ។ បន្ថែមពីនេះ អាជ្ញាធរកម្ពុជាក៏បាននិងកំពុងសហការជាមួយសមត្ថកិច្ចម៉ាឡេស៊ី ស៊ើបអង្កេតករណីនេះ ដើម្បីចាប់ជនសង្ស័យមកផ្តន្ទាទោសតាមច្បាប់ផងដែរ៕