តំណាងក្រុមហ៊ុនប្រមូលសំរាម ឱ្យដឹងថា ក្រុមហ៊ុនសិង្ហបុរី និងចិន នឹងកាន់កាប់សិទ្ធិប្រមូលនិងគ្រប់គ្រងសំរាមនៅតំបន់ចំនួន២ក្នុងចំណោមបីតំបន់នៅរាជធានីភ្នំពេញ ខណៈក្រុមហ៊ុនស៊ីនទ្រីនឹងបន្តសេវាកម្មរបស់ខ្លួននៅតំបន់ភាគកណ្តាលនិងខាងត្បូងនៃទីក្រុង។
សាលារាជធានីភ្នំពេញ បានដកហូតសិទ្ធិកាន់កាប់ប្រតិបត្តិការប្រមូលសំរាមពីក្រុមហ៊ុនស៊ីនទ្រី មកគ្រប់គ្រងក្នុងឆ្នាំ២០១៩ បន្ទាប់ពីលក្ខខណ្ឌការងារនិងសេវាកម្មរបស់ក្រុមហ៊ុនត្រូវបានចោទថាមានភាពខ្វះចន្លោះ ហើយលោកនាយករដ្ឋមន្រ្តី ហ៊ុន សែន សន្យាថា នឹងបង្កើនប្រសិទ្ធភាពសេវាកម្មសម្អាតនិងប្រមូលសំរាមក្នុងទីក្រុងឱ្យបានល្អប្រសើរ។
នៅឆ្នាំ២០២០ ខណៈការតវ៉ារបស់ក្រុមកម្មករប្រមូលសំរាមបានផ្ទុះឡើង សាលារាជធានីភ្នំពេញ បាននិយាយថា ខ្លួននឹងប្រកាសឈ្មោះក្រុមហ៊ុនដែលទទួលបានសិទ្ធិផ្តល់សេវាកម្មគ្រប់គ្រងសំរាមថ្មីក្នុងខែតុលា។
យ៉ាងណា រហូតមកទល់ពេលនេះមិនទាន់មានការប្រកាសជាផ្លូវការណាមួយអំពីអត្តសញ្ញាណក្រុមហ៊ុនទាំងនោះ ឬកាលបរិច្ឆេទនៃការបែងចែកប្រតិបត្តិការប្រមូលសំរាមនៅឡើយ ដោយអ្នកនាំពាក្យរដ្ឋបាលសាលារាជធានីភ្នំពេញ លោក ម៉េត មាសភក្តី មិនអាចទាក់ទងសុំការឆ្លើយតបបាននោះទេកាលពីថ្ងៃសុក្រសប្តាហ៍មុន និងនៅថ្ងៃអង្គារម្សិលមិញ។
ប៉ុន្តែអគ្គនាយកក្រុមហ៊ុនប្រមូលសំរាមស៊ីនទ្រី លោក សេង សាវី បានឱ្យដឹងនៅថ្ងៃទី០២ ខែកុម្ភៈ ឆ្នាំ២០២១នេះថា ក្រុមហ៊ុនរបស់លោកបានឈ្នះសិទ្ធិប្រមូលសំរាមនៅខណ្ឌចំនួន៤ រួមមាន បឹងកេងកង ចំការមន មានជ័យ និងច្បារអំពៅ ដែលឋិតនៅតំបន់មួយនៃតំបន់៣ដែលបែកចែកដោយសាលារាជធានីភ្នំពេញ។
លោកបន្ថែមថា ក្រុមហ៊ុនបរទេសនឹងទទួលបានសិទ្ធិប្រមូលសំរាមនៅពីរតំបន់ទៀត ប៉ុន្តែលោកមិនទាន់ទទួលបានការកំណត់កាលបរិច្ឆេទជាក់លាក់ពីសាលារាជធានីភ្នំពេញ សម្រាប់ការផ្ទេរតួនាទីទៅឱ្យក្រុមហ៊ុនថ្មីនោះនៅឡើយ។
លោក សាវី មានប្រសាសន៍ថា៖ «ឥលូវនេះមិនទាន់មានការកំណត់ច្បាស់លាស់ពីការប្រគល់តួនៃការដេញថ្លៃបាននោះទេ។ គណៈកម្មការហ្នឹងកំពុងតែរៀបចំ។ ក្រុមហ៊ុនស៊ីនទ្រី កំពុងតែធ្វើនៅឡើយ»។
ប្រធានសេវាកម្មអាជីវកម្មរបស់ក្រុមហ៊ុន Gaea Waste Management អ្នកនាង រ៉ន សារុម ឱ្យដឹងថា ក្រុមហ៊ុន Gaea ដែលបច្ចុប្បន្នមានប្រតិបត្តិការផ្តល់សេវាប្រមូលសំរាមក្នុងខេត្តសៀមរាប បានចាប់ដៃគូជាមួយក្រុមហ៊ុនសិង្ហបុរីមួយឈ្មោះ 800 Super ដើម្បីគ្រប់គ្រងសំរាមនៅតំបន់មួយក្នុងចំណោមពីរតំបន់ដែលនៅសល់។ យ៉ាងណា ប្រភពដដែលមិនទាន់អាចផ្តល់ព័ត៌មានលម្អិតបន្ថែមបានទេ ខណៈក្រុមហ៊ុន 800 Super មិនទាន់ឆ្លើយតបទៅនឹងសំណួររបស់វីអូឌី តាមសារអេឡិចត្រូនិចនៅឡើយ។
ប្រធានសហព័ន្ធសហជីពកម្មករនិយោជិតវិស័យទេសចរណ៍កម្ពុជា លោក ទូច កុសល និងម្ចាស់ក្រុមហ៊ុនប្រមូលសំរាមស៊ីនទ្រី លោក សាវី បានអះអាងដូចគ្នាថា ក្រុមហ៊ុនទី៣ដែលទទួលសិទ្ធិប្រមូលសំរាមនៅរាជធានីភ្នំពេញដែរនោះគឺជាក្រុមហ៊ុនចិន ប៉ុន្តែពួកគេមិនដឹងថាក្រុមហ៊ុននោះមានឈ្មោះអ្វីនៅឡើយ។
លោក កុសល និយាយថា មានការបន្តពន្យារពេលប្រគល់ការងារទៅក្រុមហ៊ុនថ្មី ប៉ុន្តែគាត់រំពឹងថា នៅពេលក្រុមហ៊ុនទាំងនោះចាប់ផ្តើមដំណើរការការងារ នឹងធ្វើឱ្យលក្ខខណ្ឌការងាររបស់កម្មករប្រមូលសំរាមនឹងមានភាពល្អប្រសើរឡើង។
លោក ទូច កុសល ប្រាប់ថា៖ «ខ្ញុំគិតថា ប្រាក់ឈ្នួលរបស់គាត់នឹងមានភាពល្អប្រសើរ ប្រសិនបើមានក្រុមហ៊ុន ២[ទៅ]៣ អញ្ចឹង។ បើសិនជាគាត់មើលថា ក្រុមហ៊ុននេះឱ្យប្រាក់ឈ្នួលគាត់តិច អញ្ចឹងគាត់អាចនឹងដាក់ពាក្យធ្វើនៅក្រុមហ៊ុនផ្សេងអញ្ចឹង»។
ប្រធានសហជីពរូបនេះបន្ថែមថា ក្រុមហ៊ុនស៊ីនទ្រី បានធានាសារជាថ្មីថា នឹងបើកប្រាក់អត្ថប្រយោជន៍ផ្សេងៗទៅដល់កម្មករនិយោជិតរបស់ខ្លួនឱ្យស្របតាមច្បាប់និងកិច្ចសន្យាការងារ និងទៅតាមការសន្យាដែលបានបិទបញ្ចប់កូដកម្មតវ៉ារបស់ក្រុមកម្មករកាលពីឆ្នាំមុន ដោយថា នឹងធ្វើឡើងនៅសប្តាហ៍ទី២នៃខែកុម្ភៈ ឆ្នាំ២០២១។
កាលពីខែតុលា ឆ្នាំ២០២០ កម្មករប្រមូលសំរាមនៅរាជធានីភ្នំពេញ ប្រមាណ២ពាន់នាក់បានធ្វើកូដកម្មតវ៉ាទាមទារការទូរទាត់ប្រាក់អត្ថប្រយោជន៍ផ្សេងៗរបស់ពួកគេ មុនពេលពួកគេត្រូវបានផ្លាស់ប្តូរទៅក្រុមហ៊ុនថ្មី។ កម្មករក៏បានរអ៊ូរទាំអំពីបញ្ហាសុខភាព និងការទទួលរងគ្រោះថ្នាក់ដោយសារលក្ខខណ្ឌការងារផងដែរ៕
ប្រែសម្រួលពីអត្ថបទដើមជាភាសាអង់គ្លេស