កម្លាំងសមត្ថកិច្ចខេត្តបាត់ដំបង បានបញ្ជូនបុរសជាជនសង្ស័យពីរនាក់ដែលជាមេខ្យល់នាំពលករខ្មែរដែលធ្វើការនៅប្រទេសថៃឆ្លងដែនចូលមកកម្ពុជាវិញដោយខុសច្បាប់ ទៅសាលាដំបូងខេត្ត ដើម្បីឱ្យតុលាការបន្តនីតិវិធីតាមច្បាប់។
នាយការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តបាត់ដំបង លោក ប៊ន់ វណ្ណារ៉ា មានប្រសាសន៍យ៉ាងខ្លីថា ជនសង្ស័យជាមេខ្យល់ទាំង២នាក់នេះ ត្រូវបានសមត្ថកិច្ចបញ្ជូនទៅតុលាការកាលពីថ្ងៃម្សិលមិញ។
លោកថា៖ «យើងបានបញ្ជូន [ជនសង្ស័យ] តាមនីតិវិធី ទៅតុលាការសាលាដំបូងខេត្តបាត់ដំបង»។
អ្នកនាំពាក្យសាលាដំបូងខេត្តបាត់ដំបង លោកស្រី ចាន់ រស្មី បដិសេធអត្ថាធិប្បាយជុំវិញករណីនេះ ដោយថា លោកស្រីមិនទាន់ទទួលបានព័ត៌មានជុំវិញករណីនេះនៅឡើយ។
ចំណែកក្រឡាបញ្ជីនៃសាលាដំបូងខេត្តបាត់ដំបង លោក ហេង ពិសិដ្ឋ មានប្រសាសន៍យ៉ាងខ្លីថា សំណុំរឿងនេះកំពុងស្ថិតក្នុងដំណាក់កាលនីតិវិធីស៊ើបសួរនៅឡើយ។
លោកថា៖ «វា [សំណុំរឿង] ស្ថិតនៅការសម្ងាត់នៃការស៊ើបសួរ អ៊ីចឹងពាក់ព័ន្ធការស៊ើបសួរដំណើរការចំណាត់ការក្នុងសំណុំរឿងនេះ ខ្ញុំមិនអាចឆ្លើយជូនបានទេ»។
នាយនគរបាលយុត្តិធម៌នៃអធិការដ្ឋាននគរបាលស្រុកកំរៀង លោក ង៉ែត វណ្ណា បានឱ្យដឹងថា កម្លាំងសមត្ថកិច្ចបានចាប់ឃាត់ខ្លួនជនសង្ស័យជាមេខ្យល់ទាំងពីរនាក់នោះ រួមជាមួយនឹងពលករខ្មែរដែលធ្វើការនៅថៃចំនួន៤នាក់ កាលពីថ្ងៃទី០១ ខែកុម្ភៈ ឆ្នាំ២០២១ ខណៈពួកគេកំពុងលួចឆ្លងដែននៅចំណុចច្រករបៀង ក្នុងភូមិស្វាយ ឃុំបឹងរាំង ស្រុកកំរៀង។
លោកបន្តថា តាមការសាកសួរ ជនសង្ស័យជាមេខ្យល់ទាំងពីរនាក់នោះបានលួចនាំពលករខ្មែរដែលធ្វើការនៅប្រទេសថៃចំនួន៤នាក់ ឆ្លងដែនចូលមកកម្ពុជាវិញតាមច្រករបៀងនោះ ដោយមិនឆ្លងកាត់ការធ្វើចត្តាឡីស័ក។
លោក ង៉ែត វណ្ណា បានបន្ថែមថា ជនសង្ស័យក៏បានសារភាពដែរថា ការនាំពលករខ្មែរចូលមកកម្ពុជានេះ គឺថៅកែជនជាតិថៃ នៅខេត្តចាន់បូរី ប្រទេសថៃ បានបង់ប្រាក់ជំនួសពលករទាំងនោះក្នុងម្នាក់ ១ ០០០បាត ទៅឱ្យពួកគេ។
លោកបន្តថា នេះជាលើកទីមួយហើយដែលលោកទទួលបានព័ត៌មានថា ថៅកែជនជាតិថៃបានចេញលុយឱ្យពលករខ្មែរយកទៅឱ្យមេខ្យល់ ដើម្បីបានលួចឆ្លងដែនដោយខុសច្បាប់នេះ ខណៈពីមុនមកមានតែករណីមេខ្យល់យកលុយពីពលករ។
បើតាមសមត្ថកិច្ចខេត្តបាត់ដំបង ក្នុងខែមករាកន្លងទៅ សមត្ថកិច្ចក៏បានចាប់ខ្លួនមេខ្យល់នាំពលករចំណាកស្រុកចំនួន៣នាក់ឆ្លងដែនខុសច្បាប់ទៅធ្វើការនៅប្រទេសថៃដែរ ដោយបច្ចុប្បន្ន ជនសង្ស័យត្រូវបានតុលាការសម្រេចឃុំខ្លួនជាបណ្តោះអាសន្ននៅពន្ធនាគារខេត្តហើយ៕
