ក្រសួងវប្បធម៌ និងវិចិត្រសិល្បៈ កោះហៅម្ចាស់ទំព័រហ្វេសប៊ុកមួយនិងអ្នកសម្តែងក្នុងរឿងទុំទាវ២០២១ ចូលបំភ្លឺនៅក្រសួងនាសប្តាហ៍ក្រោយ បន្ទាប់ពីមានការរិះគន់យ៉ាងច្រើននៅលើបណ្តាញសង្គម ដោយសាធារណជនថាការសម្តែងរឿងនេះបានធ្វើឱ្យប៉ះពាល់ដល់តម្លៃវប្បធម៌ អក្សរសាស្រ្ត និងសាសនារបស់ជាតិ។
យោងតាមលិខិតរបស់ក្រសួងវប្បធម៌ និងវិចិត្រសិល្បៈ ចុះថ្ងៃទី០៤ ខែកុម្ភៈ ឆ្នាំ២០២១នេះ ក្រសួងបានកោះហៅម្ចាស់ផេកហ្វេសប៊ុកឈ្មោះ Hukima និងអ្នកសម្តែងក្នុងរឿងទុំទាវ២០២១ ទៅកាន់ទីស្តីការក្រសួង នៅថ្ងៃពុធ ទី១០ ខែកុម្ភៈ ឆ្នាំ២០២១ ខាងមុខនេះ។
ក្រសួងបានបញ្ជាក់ថា ការកោះម្ចាស់ទំព័រហ្វេសប៊ុក និងអ្នកសម្តែងក្នុងរឿងនេះ គឺ៖ «ដើម្បីចូលមកបំភ្លឺ ករណីការថតកាឡៃរឿងទុំទាវ ដែលធ្វើឱ្យប៉ះពាល់ដល់សាសនា វប្បធម៌ជាតិ និងប្រពៃណីជាតិ »។
រឿងទុំទាវ២០២១ ជាការផលិតដោយក្រុមសម្ដែង Ah GI Leader ដែលបានយកតួអង្គ២នាក់ ធ្វើជាព្រះសង្ឃដោយគ្រងស្បង់ចីវរជាភិក្ខុ និមន្តបិណ្ឌបាត បានជួបប្រតិព័ទ្ធស្នេហាជាមួយស្ត្រី២នាក់។
ក្នុងវីដេអូដែលមានរយៈពេល ១១នាទីនិង៣៥វិនាទីនោះ បានបង្ហាញពីភាពឆ្គាំឆ្គងជាច្រើន ដូចជា ព្រះសង្ឃច្រៀងរាំ ដៀងភ្នែក ញាក់ចិញ្ចើមរកស្ត្រីជាគូរស្នេហ៍ ខណៈតួអង្គស្ត្រីនាំគ្នារាំមុខព្រះភក្ត្រព្រះសង្ឃ និងបង្ហាញកាយវិការទាក់ទាញព្រះសង្ឃផងដែរ។
អ្នកប្រើប្រាស់បណ្តាញសង្គមមួយរូប លោក អ៊ាង គង្គា យល់ថារឿងទុំទាវឆ្នាំ២០២១នេះ អាចជិះនូវឥទ្ធិពលអវិជ្ជមានចំនួន៣ រួមមាន ប៉ះពាល់ដល់តម្លៃនៃព្រះពុទ្ធសាសនាដែលជាសាសនារបស់រដ្ឋ តម្លៃអក្សរសិល្ប៍ជាតិ និងតម្លៃនៃសិល្បៈវប្បធម៌ជាតិ។
លោកសរសេរថា៖ «ក្នុងនាមជាអ្នកកាន់ព្រះពុទ្ធសាសនា១រូប ខ្ញុំសូមថ្កោលទោសយ៉ាងដាច់អហង្ការ ហើយសំណូមពរដល់ក្រសួងធម្មការ និងសាសនា ក្រសួងវប្បធម៌ និងវិចិត្រសិល្បៈ ព្រមទាំងភាគីពាក់ពន្ធ សូមមេត្តាចាត់វិធានការអោយបានម៉ឺងម៉ាត់ចំពោះអ្នកដែលមានចេតនាទុច្ចរិតនេះ និងទុកជាមេរៀនដល់ជនដទៃទៀត»។
ក្រោយពីមានការរិះគន់ជាច្រើនក្នុងបណ្តាញសង្គម កញ្ញា តេង ដាណា និងតេង ស៊ីណា ដែលជាម្ចាស់ហ្វេសប៊ុកផេក Hukima និងជាអ្នកសម្តែងក្នុងរឿងនេះផងដែរនោះ បានចេញវីឌីអូ បកស្រាយ ទទួលកំហុស និងសុំទោសដល់សាធារណជន ចំពោះអាកប្បកិរិយាឆ្ពាំឆ្គងក្នុងរឿងនេះ។
កញ្ញាថា៖ «ពួកខ្ញុំក៏អត់ដឹងដែរថា រឿងហ្នឹងទាក់ទងទៅនិងអក្សរសិល្ប៍ និងសាសនា បើសិនជាពួកខ្ញុំដឹង ក៏ពួកខ្ញុំមិនធ្វើអញ្ចឹងដែរ »។
អនុរដ្ឋលេខាធិការក្រសួងវប្បធម៌ និងវិចិត្រសិល្បៈ លោក អ៊ុន ទឹម មានប្រសាសន៍ថា ស្របពេលដែលក្រសួងចេញលិខិតកោះហៅម្ចាស់ផេក និងអ្នកសម្តែងក្នុងរឿងនេះឱ្យទៅបំភ្លឺនៅសប្តាហ៍ក្រោយនោះ ក្រសួង និងស្ថាប័នពាក់ព័ន្ធ ក៏កំពុងស្វែងរកអត្តសញ្ញាណក្រុមអ្នកផលិតវីដេអូរឿងនេះផងដែរ។
លោកបញ្ជាក់ថា៖ «ក្រសួងវប្បធម៌ធ្វើពាក់ព័ន្ធតែរឿងទុំទាវទេ ដែលគាត់យកទៅធ្វើផ្ដេសផ្ដាសខុសពីខ្លឹមសារដើម ប៉ុន្ដែ ឥឡូវចំពោះមុខក្រសួងចេញលិខិតទៅក្រុមសម្ដែងមកបកស្រាយសិន […]អត្តសញ្ញាណរបស់គាត់មិនដឹងនៅឯណាផងទេ ដឹងតាមបាញ់តៗគ្នា ដូច្នេះយើងធ្វើលិខិតហៅពួកគាត់មកបកស្រាយតាមផ្លូវច្បាប់ ដើម្បីស្វែងរកពីខ្លឹមសាររាក់ជ្រៅ ដឹងពីបំណងរបស់គាត់ »។
រដ្ឋលេខាធិការ និងជាអ្នកនាំពាក្យក្រសួងធម្មការ និងសាសនា លោក សេង សុមុនី មានប្រសាសន៍ថា ក្រសួងកំពុងតែពិនិត្យទៅលើករណីនេះហើយ។
លោកមានប្រសាសន៍ថា៖ «មិនទាន់វាយតម្លៃបាន ថាតើជារូបភាពសិល្បៈឬក៏យ៉ាងណា វាយតម្លៃមិនទាន់ឃើញច្បាស់ថាចំណុចហ្នឹងជាចំណុចអីទេ ព្រោះទើបទទួលបានព័ត៌មានថ្មីដែរ »។
រដ្ឋធម្មនុញ្ញកម្ពុជា មាត្រា៤៣ កថាខណ្ឌទី៣ បានចែងថា ព្រះពុទ្ធសាសនា ជាសាសនារបស់រដ្ឋ។
ចំណែក ក្រមព្រហ្មទណ្ឌកម្ពុជា មាត្រា ៥០៨ ចែងថា ត្រូវផ្ដន្ទាទោសពី ៦ថ្ងៃ ដល់៣ខែ និងពិន័យជាប្រាក់ពី១សែនរៀល ទៅ៥សែនរៀល ចំពោះអំពើស្លៀកដណ្ដប់ជាសាធារណៈ ដោយគ្មានសិទ្ធិស្លៀកដណ្ដប់នូវស្បង់ចីវរ សម្រាប់អ្នកបួសក្នុងព្រះពុទ្ធសាសនា៕