ក្រសួងកសិកម្ម ជំរុញឱ្យអ្នកដាំដុះស្វាយ ទៅចុះបញ្ជីកសិដ្ឋានដាំស្វាយសម្រាប់នាំចេញនៅអគ្គនាយកដ្ឋានកសិកម្ម ដើម្បីងាយស្រួលទទួលបានព័ត៌មានពីការប្រែប្រួលតម្លៃស្វាយក្នុងទីផ្សារ និងសេវាបណ្តុះបណ្តាលបច្ចេកទេស ក្នុងការបង្កើនផលិតភាពនិងគុណភាពផ្លែស្វាយស្របតាមស្តង់ដារ។
សេចក្តីប្រកាសព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ ចុះថ្ងៃទី០៤ ខែកុម្ភៈ ឆ្នាំ២០២១នេះ លើកឡើងថា ថ្មីៗនេះ សារព័ត៌មានមួយចំនួនបានផ្សព្វផ្សាយពីការត្អូញត្អែររបស់អ្នកដាំដុះស្វាយថា តម្លៃស្វាយកែវរមៀតធ្លាក់ចុះនៅតំបន់មួយចំនួន។
ក្រសួងបន្តថា ជាទូទៅ តម្លៃផលិតកម្មកសិកម្ម រួមទាំងស្វាយ នៅកម្ពុជា និងបណ្តាប្រទេសទាំងអស់នៅលើពិភពលោក តែងមានការប្រែប្រួលឡើងចុះមិនទៀងទាត់តាមរដូវកាល និងអាស្រ័យលើទំហំនៃការផ្គត់ផ្គង់និងតម្រូវការ ដូចជាក់ស្តែងនៅដើមខែកុម្ភៈនេះ តម្លៃស្វាយមានការធ្លាក់ចុះជាងដើមឆ្នាំ ដោយសារតែដល់រដូវកាលប្រមូលផល។
ទន្ទឹមគ្នានេះដែរ ក្រសួងថា ក៏មានអ្នកដាំស្វាយមួយចំនួនបានលក់ស្វាយក្នុងតម្លៃទាប ដោយសារផ្លែស្វាយមិនទាន់មានគុណភាពល្អស្របតាមស្តង់ដារ ដូចជា ទំហំផ្លែតូច គ្មានសោភ័ណភាព និងមិនទាន់ស្របតាមលក្ខខណ្ឌតម្រូវនៃការបញ្ជាទិញរបស់ក្រុមហ៊ុន ស្របពេលដល់រដូវកាលចូលឆ្នាំចិននិងវៀតណាម ធ្វើឱ្យពាណិជ្ជករផ្អាកការបញ្ជាទិញ។
ដើម្បីរក្សាបានស្ថិរភាពតម្លៃស្វាយសមស្របនិងមានទីផ្សារ ក្រសួងបានអំពាវនាវជាថ្មីដល់អ្នកដាំស្វាយទាំងអស់ រួសរាន់ទៅចុះបញ្ជីកសិដ្ឋានដាំស្វាយសម្រាប់នាំចេញនៅអគ្គនាយកដ្ឋានកសិកម្ម ដើម្បីទទួលបានព័ត៌មាននិងសេវាបណ្តុះបណ្តាលបច្ចេកទេស ព្រមទាំងអាចរៀបចំចងក្រងជាបណ្តុំអាជីវកម្មស្វាយសម្រាប់ទំនាក់ទំនងជាមួយក្រុមហ៊ុនក្នុងនិងក្រៅស្រុក ចុះកិច្ចសន្យាប្រមូលទិញ ធ្វើការកែច្នៃ និងនាំចេញ។
កសិករដាំស្វាយនៅឃុំព្រែកស្តី ស្រុកកោះធំ ខេត្តកណ្តាល អ្នកស្រី សែម ភា ឱ្យដឹងថា អ្នកស្រីដាំដើមស្វាយកែវរមៀត១៦០ដើម។ អ្នកស្រីថា អ្នកស្រីមិនបានដឹងឬសិក្សាពីបច្ចេកទេសដាំដុះផ្លែស្វាយ ឬប្រភេទស្វាយដែលមានទីផ្សារនិងតម្លៃខ្ពស់នោះទេ។
អ្នកស្រីបន្ថែមថា ខ្លួនបង្ខំចិត្តបន្តទុកដើមស្វាយដើម្បីទទួលយកផល ដោយសារវាត្រូវការពេលយូរដើម្បីទទួលបានផល ប៉ុន្តែកសិករមួយចំនួនបានសម្រេចផ្លាស់ប្តូរការដាំដំណាំដូចជាស្វាយ មៀន ឬល្មុត លើដីចម្ការរបស់ពួកគេនៅពេលដឹងថាមានតម្លៃទីផ្សារល្អ។
អ្នកស្រី សែម ភា ប្រាប់ថា៖ «ខ្ញុំបានចុះកុងត្រាចុះអីអញ្ចឹង ឱ្យជួយដល់ប្រជាពលរដ្ឋអីអញ្ចឹង តម្លៃថេរ ហើយដាំ ឱ្យ[ក្រសួង]ជួយបង្រៀន អញ្ចឹងប្រជាពលរដ្ឋពេញចិត្ត ហើយសប្បាយចិត្តទៀត។ ព្រោះធ្វើហើយ គាត់អត់ពិបាកទីផ្សារអញ្ចឹងណា។ រាល់ថ្ងៃប្រឈមមុខម៉េច? ប្រឈមមុខធ្វើហើយ អត់ដឹងតម្លៃទេ ដល់ពេលអត់មាន វាថ្លៃ! ដល់ពេលយើង បានថោក»។
កសិករដាំស្វាយនៅឃុំព្រែកស្តីមួយរូបទៀត លោក រិន ភារៈ ឱ្យដឹងថា មុខរបរដាំស្វាយរបស់លោកមិនសូវបានផលចំណេញនោះទេ ដោយសារតម្លៃប្រែប្រួលតាមការកំណត់របស់ឈ្មួញ ទើបលោកចាប់ផ្តើមងាកមកដាំដើមមៀន។ លោកថា លោកនឹងកាប់ដើមស្វាយកែវរមៀត៣០០ដើមដែលដាំលើផ្ទៃដីទំហំជិត១ហិកតាចេញ ហើយដាំមៀនជំនួសវិញ។
កសិករវ័យ៣៧ឆ្នាំរូបនេះបន្ថែមថា លោកមិនបានឆ្លងកាត់ការបណ្តុះបណ្តាលវិធីសាស្រ្តដាំដុះតាមលក្ខណៈបច្ចេកទេសច្បាស់លាស់នោះទេ គឺធ្វើតាមការស្វែងយល់តៗគ្នា។ លោកថា លោកនឹងចូលរួម បើក្រសួងកសិកម្មមានគោលនយោបាយជួយលើបច្ចេកទេសនិងទីផ្សារ ។
លោក រិន ភារៈ ប្រាប់ថា៖ «និយាយទៅគឺពលរដ្ឋយើងចង់បានឱ្យតែទីផ្សារថ្លៃ គាត់ឱ្យធ្វើអីក៏បានដែរ។ ព្រោះស្រែចម្ការជាឆ្នាំងបាយគាត់ ឱ្យតែថាបានថ្លៃ គាត់ចេះតែធ្វើហើយ។ ដូចរាល់ថ្ងៃ ឱ្យគ្នាធ្វើអីកើត? ម្សិលមិញខ្ញុំលក់បាន៣០០ [រៀល] ថ្ងៃហ្នឹងគេទិញតែ២០០[រៀល]»។
លោក វេង សាខុន និងលោក ស្រី វុឌ្ឍី អ្នកនាំពាក្យក្រសួងកសិកម្ម មិនអាចទាក់ទងសុំការឆ្លើយតបនោះទេ ដោយគាត់ថាជាប់រវល់ប្រជុំ។
បើតាមក្រសួងកសិកម្ម កម្ពុជានឹងមានកសិដ្ឋានចំនួន៣០ និងរោងចក្រប្រព្រឹត្តកម្មសម្លាប់ពងរុយចោះផ្លែស្វាយចំនួន០៤ ដែលប្រទេសចិននឹងពិនិត្យសម្រេចអនុញ្ញាតឱ្យនាំចេញផ្លែស្វាយស្រស់ពីកម្ពុជាទៅកាន់ប្រទេសចិន៕