រដ្ឋាភិបាលសម្រេចអនុញ្ញាតឱ្យនាំចូលត្រីចំនួន៤ប្រភេទពីក្រៅប្រទេសឡើងវិញ ក្រោយពីផ្អាកការនាំចូលជាបណ្តោះអាសន្នរយៈពេល១ខែ។
កាលពីថ្ងៃទី៨ ខែមករា ឆ្នាំ២០២១នេះ ក្រសួងកសិកម្ម រុក្ខាប្រមាញ់ និងនេសាទ បានសម្រេចផ្អាកជាបណ្តោះអាសន្ននូវការកាំចូលត្រីចំនួន៤ប្រភេទ រួមមាន ត្រីប្រា ត្រីពោ ត្រីអណ្តែង និងត្រីឆ្ដោ ពីប្រទេសវៀតណាម ដើម្បីលើកកម្ពស់វារីវប្បកម្មកម្ពុជាក្នុងពេលវិបត្តិជំងឺកូវីដ១៩។
ក្រោយមក នៅថ្ងៃទី១៩ ខែកុម្ភៈ ក្រសួងពាណិជ្ជកម្មវៀតណាមបានផ្ញើលិខិតមកភាគីកម្ពុជា ដោយស្នើឱ្យលុបចោលការផ្អាកការនាំត្រី៤ប្រភេទនេះវិញ។ ក្នុងលិខិតនោះ ភាគីវៀតណាមលើកឡើងថា ការផ្អាកនេះនឹងធ្វើឱ្យប៉ះពាល់ដល់ស្មារតីសេរីភាវូបនីយកម្មពាណិជ្ជកម្ម របស់អង្គការពាណិជ្ជកម្មពិភពលោក (WTO) និងសហគមន៍សេដ្ឋកិច្ចអាស៊ានដែលមានប្រទេសទាំងពីរជាសមាជិក។
សេចក្តីប្រកាសព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី០៨ ខែកុម្ភៈ ឆ្នាំ២០២១នេះ បានលើកឡើងថា ក្រសួងនៅតែបន្តការអនុញ្ញាតឱ្យនាំចូលផលិតផលជលផល ជាពិសេសត្រីចំនួន៤ប្រភេទនេះ ក្រោមហេតុផលថា ដើម្បីបំពេញតម្រូវការជាក់ស្តែងក្នុងស្រុក។
សេចក្តីប្រកាសព័ត៌មានដដែលបន្តថា ក្រសួងនឹងបន្តពិគ្រោះយោបល់ជាមួយសមាគមវារីវប្បកម្មនៅកម្ពុជា អាជីវករនាំចេញនាំចូលផលិតផលជលផល និងអាជ្ញាធរមានសមត្ថកិច្ចពាក់ព័ន្ធ ដែលជាដៃគូពាណិជ្ជកម្មរបស់កម្ពុជា ដើម្បីកសាងនិងទទួលស្គាល់លិខិតបទដ្ឋានបច្ចេកទេស។
ក្រសួងបន្ថែមថា៖ «តាមរយៈយន្តការគណៈកម្មការជំរុញវារីវប្បកម្មកម្ពុជា ក្រសួងកសិកម្ម រុក្ខាប្រមាញ់ និងនេសាទ សហការជាមួយក្រសួងពាក់ព័ន្ធ នឹងបន្តដោះស្រាយបញ្ហាប្រឈមរបស់វារីវប្បករ ដើម្បីអភិវឌ្ឍន៍វិស័យវារីវប្បកម្ម និងពង្រឹងសមត្ថភាពប្រកួតប្រជែងរបស់វារីវប្បករ ស្របតាមគោលការណ៍ពាណិជ្ជកម្មសេរី ព្រមទាំងធានាដល់ការការពារសុខភាពមនុស្ស សត្វ បរិស្ថាន និងជំរុញកំណើនពាណិជ្ជកម្ម»។
ម្ចាស់កសិដ្ឋានផលិតពូជត្រីមួយរូបនៅស្រុកព្រៃឈរ ខេត្តកំពង់ចាម លោក ឃឹម ឆៃយ៉ា បង្ហាញការខកចិត្តចំពោះរដ្ឋាភិបាលដែលបើកឱ្យប្រទេសជិតខាងនាំត្រីទាំង៤ប្រភេទនេះចូលកម្ពុជាវិញ។
លោកថា៖ «បើបិទជាប់ក៏ល្អដែរ ព្រោះយើងស្ទាបស្ទង់ការផលិតនៅក្នុងស្រុក ក្នុងការអាចផ្គត់ផ្គង់បានអ៊ីចឹង! ដល់ពេលបិទមិនទាន់បានប៉ុន្មានផង បើកវិញ វាអត់មានន័យ! ភាគច្រើនទាំងពួកនៅខាងខ្ញុំ ឬមួយប្រជាពលរដ្ឋអី គាត់មិនសប្បាយចិត្តដែរ។ បើបិទរហូតទៅ ប្រជាកសិករគាត់មានទឹកចិត្តផលិតនៅក្នុងស្រុកសម្រាប់ផ្គត់ផ្គង់ ហើយវាអាចលើកកម្ពស់ជីវភាពគាត់»។
ប្រធានសមាគមវារីវប្បកម្មកម្ពុជា លោក សុខ រ៉ាដេន មានប្រសាសន៍ថា បច្ចុប្បន្ន ប្រជាពលរដ្ឋដែលចិញ្ចឹមត្រី កំពុងជួបបញ្ហាប្រឈម ដោយសារទឹកស្រះចិញ្ចឹមត្រីកាន់តែរីង ខណៈត្រីរបស់ពួកគេមិនទាន់លក់អស់ ក៏បើកឱ្យមានការនាំចូលត្រីពីប្រទេសជិតខាងឡើងវិញ។ ជាមួយគ្នានេះដែរ លោកក៏បានសម្ដែងការសោកស្ដាយចំពោះការបើកឱ្យមានការនាំចូលត្រីឡើងវិញ ប៉ុន្តែលោកស្នើឱ្យរដ្ឋាភិបាលនិងស្ថាប័នពាក់ព័ន្ធកម្រិតចំនួនត្រីនាំចូល។
លោកថា៖ «ឱ្យនាំត្រីចូលចុះ! ប៉ុន្តែឱ្យតែកម្រិត ឬឱ្យគាត់ជួយណែនាំអ្នកប្រមូលទិញឬនាំចូលពីស្រុកក្រៅហ្នឹង ឱ្យគាត់វិលមកប្រមូលទិញត្រីនៅក្នុងស្រុកសិន។ នៅពេលយើងមានវិបត្តិរីងស្ងួតខ្លាំងណាស់ ហើយទឹករីងកាន់តែខ្លាំង ដូច្នេះយើងមានតែប្រឡាយប៉ុន្តែអត់មានទឹក អានេះជាវិបត្តិធំ»។
ក្រៅពីឱ្យកម្រិតចំនួនត្រី ប្រធានសមាគមវារីវប្បកម្មកម្ពុជារូបនេះ ក៏គ្រោងនឹងដាក់សំណើទៅក្រសួងកសិកម្ម និងស្ថាប័នពាក់ព័ន្ធ ស្នើឱ្យមានការតម្រូវឱ្យអ្នកនាំចូលត្រូវមានវិញ្ញាបនបត្រពីទីតាំងចិញ្ចឹមឱ្យបានច្បាស់លាស់ និងការធានាថា ត្រីដែលនាំចូលមកនេះមិនធ្វើឱ្យអ្នកបរិភោគប៉ះពាល់សុខភាព។
តាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ ដែលវីអូឌីទទួលបាន ឱ្យដឹងថាក្នុងឆ្នាំ២០២០ កម្ពុជាផលិតបានត្រីចំនួនជាង៤០០ពាន់តោន (៤០០ ៤០០ តោន) កើនជាង៣០ភាគរយ ធៀបនឹងឆ្នាំ២០១៩ ដែលផលិតបានជាង៣០០ពាន់តោន (៣០៧ ៤០៨ តោន)។
ដោយឡែក នៅឆ្នាំ២០២០ កម្ពុជានាំចូលត្រីពីវៀតណាមក្នុងបរិមាណជាង១៦,៧ពាន់តោន កើនជាង២០ភាគរយ ធៀបនឹងឆ្នាំ២០១៩ ដែលមាន១២,៧ពាន់តោន៕
