ស្ថានឯកអគ្គរាជទូតកម្ពុជាប្រចាំប្រទេសវៀតណាម ណែនាំដល់ប្រជាពលរដ្ឋខ្មែរដែលកំពុងមានវត្តមាននៅប្រទេសវៀតណាម ត្រូវគោរពនីតិវិធីកូវីដ១៩របស់ប្រទេសនេះ បើមិនដូច្នេះទេ ពួកគេអាចប្រឈមនឹងការពិន័យជាប្រាក់និងជាប់ពន្ធនាគាររហូតដល់១២ឆ្នាំ។
សេចក្តីជូនដំណឹងរបស់ស្ថានឯកអគ្គរាជទូតកម្ពុជាប្រចាំសាធារណរដ្ឋសង្គមនិយមវៀតណាម ចុះថ្ងៃទី០៨ ខែកុម្ភៈ ឆ្នាំ២០២១ បានលើកឡើងថា យោងតាមសារព័ត៌មានវៀតណាម Vietnam News គឺអាជ្ញាធរវៀតណាម ជាពិសេសនៅទីក្រុងហាណូយ បានចេញវិធានការពិន័យតឹងរ៉ឹងចំពោះអ្នករំលោភនីតិវិធីកូវីដ១៩។
ស្ថានឯកអគ្គរាជទូតកម្ពុជា បន្តថា វិធានការពិន័យទាំងនោះ រួមមាន អ្នករំលោភវិធានការការពារកូវីដ១៩ អាចប្រឈមនឹងការជាប់ពន្ធនាគារ ១២ឆ្នាំ ខណៈអ្នកមិនធ្វើសេចក្តីប្រកាសសុខភាព ឬធ្វើប្រកាសសុខភាពក្លែងក្លាយ ឬមិនប្រកាសពីស្ថានភាពសុខភាពរបស់ខ្លួនដោយពេញលេញ នឹងត្រូវពិន័យរហូតដល់១០០លានដុង ស្មើប្រមាណ៤ ៣៥០ដុល្លារ។
ស្ថានឯកអគ្គរាជទូត បន្តទៀតថា អ្នកមិនពាក់ម៉ាស់នៅទីសាធារណៈ លើមធ្យោបាយដឹកជញ្ជូនសាធារណៈ ឬមិនរក្សាគម្លាតសុវត្ថិភាព នឹងពិន័យជាប្រាក់៣លានដុង (១៣០ដុល្លារ) អ្នកបោះចោលម៉ាស់មិនត្រឹមត្រូវនឹងពិន័យពី៥ទៅ៧លានដុង (២១៧ដុល្លារ ទៅ៣០៥ដុល្លារ) និងអ្នកឆ្លងជំងឺកូវីដ១៩ ឬដឹងថាមានអ្នកឆ្លងតែលាក់មិនរាយការណ៍ នឹងត្រូវពិន័យ២០លានដុង។
ដោយឡែក ចំពោះអ្នកខកខានមិនអនុវត្តបទបញ្ជាស្តីពីការស៊ើបអង្កេត ការត្រួតពិនិត្យ និងការព្យាបាលតាមវេជ្ជសាស្ត្រនៅមុនចូលនិងចេញពីទីតាំងផ្ទុះកូវីដ១៩ នឹងត្រូវពិន័យ៣០លានដុង ខណៈអ្នករត់ចេញពីកន្លែងធ្វើចត្តាឡីស័ក និងខកខានមិនអនុវត្តតាមវិធានចត្តាឡីស័ក នឹងត្រូវពិន័យរហូតដល់២០លានដុង ឬនិងមានវិធានការតាមក្រមព្រហ្មទណ្ឌប្រសិនបានចម្លងមេរោគទៅជនដទៃ។
ករណីនេះ ស្ថានឯកអគ្គរាជទូតកម្ពុជា បានអំពាវនាវដល់និសិត្ស សិក្ខាកាមយោធា-នគរបាល និងប្រជាពលរដ្ឋខ្មែរ ដែលមានវត្តមានក្នុងប្រទេសវៀតណាម ជាពិសេសទីក្រុងហាណូយ ជ្រាបជាព័ត៌មាននិងចូលរួមអនុវត្ត។
កញ្ញា មឿន ស្រីណេត ជានិស្សិតអាហារូបករណ៍ផ្នែកសង្គមបរិស្ថាននៅប្រទេសវៀតណាម យល់ថា ការចាត់វិធានការតឹងរ៉ឹងរបស់អាជ្ញាធរវៀតណាម ជារឿងល្អ ដើម្បីការពារសុវត្ថិភាពប្រជាពលរដ្ឋនិងជនបរទេសដែលមានវត្តមាននៅក្នុងប្រទេសនេះពីជំងឺកូវីដ១៩។
ប៉ុន្តែយ៉ាងណា កញ្ញាក៏មានការព្រួយបារម្ភដែរអំពីការពិន័យយ៉ាងតឹងរ៉ឹងដែលអាចឈានដល់ការជាប់ពន្ធនាគាររហូតដល់១២ឆ្នាំ។
កញ្ញានិយាយថា៖ «ខ្ញុំមានការព្រួយបារម្ភណាស់ ដូច្នេះខ្ញុំត្រូវគោរពទៅតាមច្បាប់ ហើយមិនចេញទៅខាងក្រៅ លើកលែងតែមានកិច្ចការសំខាន់»។
លោក ប៉ុង សុខហុង ជានិស្សិតអាហារូបករណ៍នៅប្រទេសវៀតណាមមួយរូបទៀត បានលើកឡើងថា បើសិនជាមិនមានវិធានការបែបនេះ អាជ្ញាធរវៀតណាមអាចនឹងពិបាកគ្រប់គ្រងស្ថានការណ៍ ខណៈជំងឺកូវី១៩មានការឆ្លងរីករាលដាលលឿនក្នុងប្រទេសនេះ។
លោកបន្ថែមថា៖ «ច្បាប់ដែលគេចេញមកហ្នឹង វាសមស្របដែលអាចទទួលយកបាន ព្រោះគេចេញមកអ៊ីចឹង គឺដើម្បីការពារនូវសុវត្ថិភាព សុខភាព និយាយរួម ដើម្បីប្រជាជនគេ និយាយរួមទៅ វាមានផលល្អសម្រាប់សិស្សនិស្សិតដែលយើងនៅទីនេះ។ ណាមួយវិញទៀត ដោយសារតែជំងឺហ្នឹងវាផ្ទុះមកថ្មីៗអ៊ីចឹងទៀត មើលទៅវាពិបាកគ្រប់គ្រងដែរ»។
លោក ឃុន ថារ៉ូ អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) ក៏បានបង្ហាញការគាំទ្រចំពោះវិធានការម៉ឺងម៉ាត់របស់អាជ្ញាធរនៃបណ្តាប្រទេសនានា រួមទាំងវៀតណាម និងកម្ពុជា ជាដើម ក្នុងការទប់ស្កាត់ការឆ្លងរាលដាលនៃជំងឺកូវីដ១៩។
តែយ៉ាងណា លោកយល់ថា វិធានការទាំងនោះមិនគួរមានការរឹតបន្តឹងខ្លាំងពេករហូតដល់ការជាប់ពន្ធនាគារដល់១២ឆ្នាំនោះទេ ដោយសារតែបញ្ហាជំងឺកូវីដ១៩ជាបញ្ហាសុខភាពសកល។
លោកថា៖ «វា [វិធានការរឹតបន្តឹងនីតិវិធីកូវីដ១៩] មានសារៈសំខាន់ដែរ ក្នុងការរឹតបន្តឹងវត្តមាននៃកូវីដ១៩ថ្មីនៅវៀតណាម ហើយអាហ្នឹងវាអាចចូលរួមក្នុងការទប់ស្កាត់ដែរ ព្រោះអ្វីដែលជាការបារម្ភនោះ គឺថាការហូរចូលឬលំហូរចូលនូវជំងឺដែលយើងមិនអាចដឹងមុន វាពិបាក [ទប់ស្កាត់] អ៊ីចឹងវិធានការហ្នឹងវាអាចជួយទប់ស្កាត់ដែរនៅក្នុងការប្រយុទ្ធប្រឆាំង [កូវីដ១៩]»។
កាលពីថ្ងៃទី០៤ ខែកុម្ភៈ លោកនាយករដ្ឋមន្ត្រី ហ៊ុន សែន ក៏បានចេញបទបញ្ជាជាបន្ទាន់ទៅអាជ្ញាធរខេត្តជាប់ព្រំដែនកម្ពុជា-វៀតណាម ឱ្យរឹតបន្តឹងការឆ្លងព្រំដែនរវាងប្រជាជននៃប្រទេសទាំងពីរផងដែរ ខណៈជំងឺកូវីដ១៩នៅក្នុងប្រទេសវៀតណាម បានឆ្លងចូលទៅក្នុងសហគមន៍ ហើយកំពុងរីកសាយភាយនៅក្នុងតំបន់ភាគខាងជើង ភាគកណ្តាល និងភាគខាងត្បូងនៃប្រទេសនេះ៕