មេដឹកនាំយោធាមីយ៉ាន់ថ្លែងសារជាសាធារណៈលើកដំបូងចាប់តាំងពីការធ្វើរដ្ឋប្រហារមកដោយប្តេជ្ញារៀបចំការបោះឆ្នោតឡើងវិញឱ្យមានសេរីភាពត្រឹមត្រូវ និងធានាដល់គោលនយោបាយបរទេសទាក់ទាញអ្នកវិនិយោគទុនដដែល។
ឧត្តមសេនីយ៍មិញអ៊ុង ឡាំង ថ្លែងថា របបយោធានៅពេលនេះគឺខុសពីសម័យមុនៗ ដោយលោកប្តេជ្ញារៀបចំការបោះឆ្នោតឡើងវិញឱ្យមានភាពសេរី ត្រឹមត្រូវ ហើយនឹងផ្តល់អំណាចដល់អ្នកដែលទទួលបានជ័យជម្នះពិតប្រាកដ។ លោកបន្តថា គោលនយោបាយការបរទេសក្នុងអំឡុងពេលដែលលោកដឹកនាំនៅរក្សាដូចដើមដដែល។
លោក មិញ អ៊ុងឡាំង៖«គោលនយោបាយការបរទេសមិនមានអ្វីប្រែប្រួលទេ ប្រទេសនានានៅតែលើកទឹកចិត្តឱ្យបោះការវិនិយោគនៅក្នុងប្រទេសមីយ៉ាន់ម៉ាដដែល»។
ការសន្យារៀបចំការបោះឆ្នោតឡើងវិញនៅពេលនេះ ស្របពេលដែលចលនាតវ៉ាកើតមានទូទាំងប្រទេស ប្រឆាំងការធ្វើរដ្ឋប្រហារ។
លោក មិញ អ៊ុងឡាំង លើកឡើងទៀតថា ស្ថាប័នរៀបចំការបោះឆ្នោតត្រូវតែធ្វើកំណែទម្រង់ ហើយលោកក៏បានបន្ទោសរដ្ឋាភិបាលលោកស្រី អ៊ុង សានស៊ូជី ដែលមានៈរៀបចំការបោះឆ្នោតកាលពីខែវិច្ឆិកាឆ្នាំ២០២០ ទាំងស្ថានភាពប្រឈមខ្លាំងនៃការឆ្លងរាលដាលមេរោគកូវីដ១៩។ លោកចាត់ទុកថា ការបោះឆ្នោតនៅពេលនោះមានការលួចបន្លំច្រើន ហើយគណបក្សនយោបាយផ្សេងៗទៀតក៏មិនអាចឃោសនាបានទូលាយដែរដោយសារបញ្ហាមេរោគកូវីដ១៩។
លទ្ធផលនៃការបោះឆ្នោតកាលពីខែវិច្ឆិកា ឆ្នាំ២០២០ គណបក្សសម្ព័ន្ធជាតិដើម្បីលទ្ធិប្រជាធិបតេយ្យ របស់លោកស្រី អ៊ុង សានស៊ូជី ទទួលបានអាសនៈចំនួន៣៩៦ ក្នុងចំណោម៤៧៦អាសនៈ ទាំងសភាជាន់ទាប និងសភាជាន់ខ្ពស់។
ប៉ុន្តែនៅថ្ងៃទី១ខែកុម្ភៈឆ្នាំ២០២១ នៅប៉ុន្មានម៉ោងមុនតំណាងរាស្ត្រអាណត្តិថ្មីស្បថចូលកាន់តំណែង ត្រូវពួកយោធាធ្វើរដ្ឋប្រហារ៕