សាលាដំបូងរាជធានីភ្នំពេញបានសម្រេចផ្ដន្ទាទោស ប្រធានគណបក្សខ្មែរឈ្នះ លោក សួង សុភ័ណ្ឌ ជាប់ពន្ធនាគារ ១ឆ្នាំ៨ខែ និងសងជំងឺចិត្តប្រមាណ៥០ម៉ឺនដុល្លា(២ ០០០ លានរៀល) ទៅគណៈកម្មាធិការចម្រុះកិច្ចការព្រំដែនកម្ពុជាដែលជាដើមបណ្តឹង។
ប្រធានគណបក្សខ្មែរឈ្នះ លោក សួង សុភ័ណ្ឌ ត្រូវបានសមត្ថកិច្ចរាជធានីភ្នំពេញ បានចាប់ខ្លួន កាលពីថ្ងៃទី១៤ ខែសីហា ឆ្នាំ២០២០ ក្រោយពីប្រធានគណបក្សមួយនេះ បានចុះទៅពិនិត្យបង្គោលព្រំដែនរវាងកម្ពុជា-វៀតណាម ដែលបោះរួចនៅខេត្តត្បូងឃ្មុំ កាលពីថ្ងៃទី១០ ខែសីហា ឆ្នាំ២០២០ ដែលជាទីតាំង លោក រ៉ុង ឈុន មេដឹកនាំសហជីព និងជាតំណាងក្រុមប្រឹក្សាឃ្លាំមើលកម្ពុជា បានលើកឡើងពីរបាយការណ៍របស់ពលរដ្ឋថា មានការបាត់បង់ទឹកដីកម្ពុជាទៅលើវៀតណាមក្រោយការបោះបង្គោល។
ក្រៅចុះទៅមើលព្រំដែនហើយ លោក សួង សុភ័ណ្ឌ បានក៏ចូលរួមតវ៉ានៅមុខសាលាដំបូងរាជធានីភ្នំពេញ ជាមួយក្រុមយុវជនខ្មែរថាវរៈ និងពលរដ្ឋមួយចំនួនទៀត ដើម្បីទាមទារឱ្យតុលាការដោះលែង លោក រ៉ុង ឈុន កាលពីមុនពេលចាប់សមត្ថកិច្ចចាប់ខ្លួនផងដែរ៕
ចៅក្រមជំនុំជម្រះសាលារាជធានីភ្នំពេញ លោក លិ សុខា នៅថ្ងៃនេះ បានប្រកាសសាលក្រមដោយសម្រេចផ្ដន្ទាទោស លោក សួង សុភ័ណ្ឌ ចំនួន ២០ខែ ពិន័យជាប្រាក់ ៤លានរៀលចូលរដ្ឋ និងសងជំងឺចិត្តដើមបណ្ដឹងចំនួន ២ ០០០ លានរៀល ក្រោមបទចោទប្រកាន់«ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
លោកចៅក្រម លិ សុខា បញ្ជាក់ថា ការសម្រេចផ្ដន្ទាទោស លោក សួង សុភ័ណ្ឌ នេះ ធ្វើឡើងក្រោយពីបានស្តាប់ចម្លើយពីគ្រប់ភាគីពាក់ព័ន្ធ។
ប្រាប់អ្នកសារព័ត៌មាន បន្ទាប់ពីស្ដាប់ចៅក្រមប្រកាសសាលក្រមរួច លោក សួង សុភ័ណ្ឌ លើកឡើងថា លោកមិនអាចទទួលយកសេចក្ដីសម្រេចរបស់តុលាការបានទេ ហើយលោកនឹងប្ដឹងជំទាស់ករណីនេះ ទៅសាលាឧទ្ធរណ៍។
ក្រៅប្ដឹងជំទាស់ លោក សួង សុភ័ណ្ឌ ស្នើទៅតុលាការឱ្យឃុំខ្លួនលោកនៅផ្ទះ ដូចករណីលោក កឹម សុខា ដែរ ដោយលើកហេតុផលថា រូបលោកជាប្រធានគណបក្សនយោបាយ ហើយ លោក កឹម សុខា ក៏ប្រធានគណបក្សនយោបាយដែរ។
លោក សួង សុភ័ណ្ឌ បាននិយាយថា៖ «ខ្ញុំមិនអាចទទួលយកបានទេ ហើយខ្ញុំសំណូមពរឱ្យឃុំខ្លួនខ្ញុំនៅផ្ទះ ដូចករណី លោក កឹម សុខា ពីព្រោះខ្ញុំជាប្រធានគណបក្សនយោបាយ ហើយលោក កឹម សុខា ក៏ជាប្រធានគណបក្សនយោបាយរឿងអីលោក កឹម សុខា មានសិទ្ធិនៅខាងក្រៅហើយខ្ញុំអត់មាន»។
មេធាវីការពារក្ដីឱ្យរដ្ឋាភិបាល លោក គួន សារឿន បានស្វាគមន៍ចំពោះការសម្រេចសេចក្តីរបស់ចៅក្រម លើករណីលោក សួង សុភ័ណ្ឌ នេះ។
លោកបានថ្លែងថា៖ «ដោយសារតុលាការគាត់ប្រកាសសាលក្រមហើយនឹង ខ្ញុំអត់មានការបកស្រាយអីទៀត [ការជាប់ឃុំ២០ខែ សងសំណង២ពាន់លានទៅកាន់គណៈកម្មការព្រំដែន] ចំពោះខ្ញុំអត់បញ្ហាទេបាទ ទទួលយកបាន។ ខ្ញុំគិតថា វាសាកសមហើយ ពីព្រោះបទល្មើសនេះវាពីរឆ្នាំអីឡូវនេះ គេកំណត់ទោស ២០ខែ ដូចអត់មានអីមិនសាកសមទេ»។
ចំណែក អ្នកស្រី ហង្ស ផារី ជាភរិយារបស់ លោក សួង សុភ័ណ្ឌ ចាត់ទុកការផ្ដន្ទាទោសលើស្វាមីរបស់គាត់ ថាជារឿងអយុត្តិធម៌ និងជារឿងនយោបាយ ព្រោះស្វាមីរបស់អ្នកស្រី មិនបានញុះញង់អ្វីទេ ដោយគ្រាន់ទៅមើលព្រំដែនតែប៉ុណ្ណោះ។
អ្នកស្រីថា៖ «ការផ្ដន្ទាទោសនេះ ជារឿងអយុត្តិធម៌ និងជារឿងនយោបាយ ព្រោះគាត់មិនបានទៅញុះញង់ឱ្យមានភាពវឹកវរអីទេ គាត់គ្រាន់តែទៅមើលព្រំដែនថា មានបាត់ដីអ៊ីចឹងអត់។ ក្នុងនាមជាពលរដ្ឋ ក៏ខ្ញុំចង់ទៅមើលព្រំដែនដែរ ពីព្រោះវាមានការបង្គោលថ្មី»។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា យល់ថា ការបញ្ចេញមតិ លោក សួង សុភ័ណ្ឌ គ្រាន់តែធ្វើក្នុងនាមជាអ្នកនយោបាយ ហើយការលើកឡើងរបស់លោក ជាសេរីភាពដែលធានាដោយច្បាប់កម្ពុជាផងដែរ។
លោកបន្តថា ការចាប់ខ្លួន និងចោទប្រកាន់ទៅលើអ្នកនយោបាយ បង្ហាញឱ្យឃើញថា កម្ពុជាមិនអនុវត្តច្បាប់មួយ ដែលបានផ្ដល់សិទ្ធិដល់អ្នកនយោបាយនោះទេ។
លោក ស៊ឹង សែនករុណា បន្តថា រដ្ឋាភិបាលមិនគួរចាប់ខ្លួនប្រជាពលរដ្ឋ និងអ្នកនយោបាយដែលគ្រាន់បញ្ចេញមតិរឿងព្រំដែនបែបនេះទេ ខណៈប្រទេសផ្សេងៗ លោកសង្កេតឃើញថា រដ្ឋាភិបាល បានលើកទឹកចិត្ត និងបើកទូលាយឱ្យប្រជាពលរដ្ឋចូលរួមក្នុងសកម្មភាពសង្គម។
លោកថា៖ «ការរារាំងធ្វើឱ្យមានមន្ទិលសង្ស័យពីមតិជាតិ និងអន្តរជាតិ ថាតើមានរឿងអ្វីជារឿងលាក់បាំងបញ្ហាហ្នឹង បានជាមិនចង់ឱ្យមានប្រជាពលរដ្ឋ អ្នកនយោបាយ ឬអង្គការសង្គមស៊ីវិលចូលទៅពិនិត្យ និងតាមដានអ៊ីចឹង ហាក់ដូចជារឿងហ្នឹង ធ្វើឱ្យមានការឆ្ងល់ ហើយសង្ស័យទៅលើការលាក់បាំងរបស់រដ្ឋាភិបាលទៅវិញទេ។ ផ្ទុយទៅវិញ បើមិនមានការលាក់បាំង មិនគួរមានការរារាំងទេ គួរតែមានការបើកឱ្យទូលំទូលាយ ដើម្បីឱ្យមានការចូលរួមចំណែកគ្រប់ភាគីពាក់ព័ន្ធទាំងអស់»៕
