កូនប្រុសពៅ និងកូនប្រសារបស់លោកនាយករដ្ឋមន្ត្រី ហ៊ុន សែន បានខកខានការចាក់វ៉ាក់សាំងការពារកូវីដ១៩នៅថ្ងៃនេះ ដែលជាថ្ងៃដំបូងនៃយុទ្ធនាការចាក់វ៉ាក់សាំងផ្ដល់ឱ្យដោយប្រទេសចិនទៅដល់មន្ត្រីជាន់ខ្ពស់រដ្ឋាភិបាល។
កូនប្រុសបង្កើតទាំង៣រូប និងកូនប្រសាប្រុស១រូបរបស់លោក ហ៊ុន សែន បានបង្ហាញវត្តមាននៅឯមន្ទីរកាល់ម៉ែត្រនៅព្រឹកថ្ងៃពុធនេះ នៅក្នុងយុទ្ធនាការចាក់វ៉ាក់សាំងជាលើកដំបូងទៅដល់មន្ត្រីជាន់ខ្ពស់រដ្ឋាភិបាល បន្ទាប់ពីលោកនាយករដ្ឋមន្ត្រីបានណែនាំឱ្យចាក់វ៉ាក់សាំងនេះនៅពេលដែលវ៉ាក់សាំងចិន Sinopharm ត្រូវបានដឹកជញ្ជូនមកដល់ប្រទេសកម្ពុជាកាលពីថ្ងៃអាទិត្យចុងសប្ដាហ៍កន្លងមកនេះ។
កូនប្រុសច្បងលោក ហ៊ុន សែន គឺលោក ហ៊ុន ម៉ាណែត បានចាក់វ៉ាក់សាំងដំបូងគេនៅឯមន្ទីរពេទ្យកាល់ម៉ែត្រ នៅចំពោះមុខក្រុមអ្នកសារព័ត៌មានដែលបានចូលរួមតាមដានយុទ្ធនាការមួយនេះ។
ប៉ុន្តែលោក ហ៊ុន ម៉ានី និងលោក ឌី វិជ្ជា ដែលជាកូនប្រុសពៅ និងជាកូនប្រសានោះ មិនបានបង្ហាញខ្លួននៅក្នុងបន្ទប់ចាក់វ៉ាក់សាំងទេ ក្រោយពីពួកគេបង្ហាញមុខរយៈពេលខ្លីនៅក្នុងមន្ទីរពេទ្យកាល់ម៉ែត្រ ដែលទីតាំងនេះត្រូវបានកំណត់សម្រាប់តែមន្ត្រីជាន់ខ្ពស់ចាប់ពីរដ្ឋលេខាធិការរហូតដល់រដ្ឋមន្ត្រី។
អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន ប្រាប់អ្នកសារព័ត៌មានថា លោក ហ៊ុន ម៉ានី និងលោក ឌី វិជ្ជា ខកខានការចាក់វ៉ាក់សាំងលើកដំបូងនេះ ដោយសារតែកត្តាសុខភាព។
អ្នកស្រី ឱ វណ្ណឌីន ប្រាប់ថា៖ «ឯកឧត្តម ឌី វិជ្ជា គាត់មានបញ្ហាសុខភាព ដែលគាត់មិនអាចទទួលនូវការចាក់វ៉ាក់សាំងបាន។ ហើយឯកឧត្តម ហ៊ុន ម៉ានី គាត់មានជំងឺផ្តាសាយខ្លាំង។ អ៊ីចឹង កំពុងផ្តាសាយអ៊ីចឹង គេមិនឱ្យចាក់ទេ។ គាត់អញ្ចើញមកហើយ ប៉ុន្តែតាមរយៈការវាយតម្លៃរបស់ក្រុមគ្រូពេទ្យ គឺគេមិនអនុញ្ញាតឱ្យគាត់ចាក់ទេ ចាំឱ្យគាត់ជាស្រួលបួលសិនបានអាចមកចាក់បាន»។
លោក ហ៊ុន ម៉ានី និយាយនៅលើហ្វេសប៊ុករបស់លោកនៅថ្ងៃនេះថា ក្រុមគ្រូពេទ្យបានណែនាំឱ្យរង់ចាំ២សប្តាហ៍សិន ទើបអាចទទួលការចាក់វ៉ាក់សាំងនេះបាន។
វ៉ាក់សាំង Sinopharm ចំនួន៦០ម៉ឺនដូសរបស់ចិនត្រូវបានដឹកជញ្ជូនមកដល់កម្ពុជាកាលពីសប្តាហ៍មុន ហើយពេលនេះ រដ្ឋាភិបាលបានយកមន្ទីរពេទ្យរដ្ឋចំនួន៤ទីតាំងនៅភ្នំពេញ រួមមាន មន្ទីរពេទ្យកាល់ម៉ែត្រ មន្ទីរពេទ្យព្រះអង្គឌួង មន្ទីរពេទ្យខ្មែរ-សូវៀត និងមន្ទីរពេទ្យកុមារជាតិ សម្រាប់ធ្វើយុទ្ធនាការចាក់វ៉ាក់សាំងដល់អ្នកដែលត្រូវបានជ្រើសរើសជាអាទិភាពមុនគេ ចាប់ពីថ្ងៃទី១០នេះទៅ។
កាលពីថ្ងៃសុក្រសប្ដាហ៍មុន លោកនាយករដ្ឋមន្ត្រី ហ៊ុន សែន បានប្រកាសលុបចោលគម្រោងចាក់វ៉ាក់សាំងស៊ីណូហ្វាមរបស់ចិននេះវិញ ដោយថា អាយុរបស់លោកលើសពីលក្ខខណ្ឌ ដែលអនុញ្ញាតឱ្យចាក់វ៉ាក់សាំងនេះសម្រាប់តែមនុស្សអាយុចន្លោះពី១៨ឆ្នាំដល់៥៩ឆ្នាំតែប៉ុណ្ណោះ ខណៈលោកមានអាយុជាង៦៨ឆ្នាំ មិនអាចចាក់បាន។
នៅពេលដែលត្រូវបានសួរថា តើពេលណាទើបក្រសួងសុខាភិបាលអនុញ្ញាតឱ្យចាក់វ៉ាក់សាំងនេះទៅដល់ប្រជាពលរដ្ឋទូទៅនោះ អ្នកស្រី ឱ វណ្ណឌីន ប្រាប់ថា៖ «ដោយឡែក សម្រាប់មនុស្សដែលមានអាយុក្រោម១៨ឆ្នាំ និងអាយុ៦០ឆ្នាំឡើងទៅ មិនមែនថាចាក់មិនបានទេ ក៏ប៉ុន្តែគេចង់ឱ្យយើងរង់ចាំបន្តិច ដោយសាតែការសិក្សាកំពុងតែដំណើរការ ហើយគេកំពុងតែខិតខំប្រមូលនូវទិន្នន័យផ្សេងៗ ដើម្បីយកមកធ្វើវិភាគ ដើម្បីបង្ហាញលក្ខណៈបែបវិទ្យាសាស្ត្រឱ្យបានច្បាស់លាស់ថា ក្រុមក្រោម១៨ឆ្នាំ និងក្រុម៦០ឆ្នាំឡើងលើនេះ ថាតើនៅពេលដែលចាក់ទៅ សរីរាង្គរបស់គាត់មានការឆ្លើយតបទៅនឹងក្រុមអាយុ១៨ឆ្នាំទៅ៥៩ឆ្នាំដែរឬទេ»។
យ៉ាងណា លោក ហ៊ុន ម៉ាណែត ដែលជាមេបញ្ជាការកងទ័ពជើងគោកកម្ពុជា និងលោក ហ៊ុន ម៉ានិត កូនប្រុសម្នាក់ទៀតរបស់លោក ហ៊ុន សែន បានចាក់វ៉ាក់សាំងនេះតាមការគ្រោងទុកចំថ្ងៃដំបូងនៃយុទ្ធនាការនេះ រួមទាំងមន្ត្រីសំខាន់ៗមួយចំនួនទៀត។
ក្រោយចាក់វ៉ាក់សាំងរួច លោក ហ៊ុន ម៉ានិត សុំមិនឆ្លើយតបនឹងអ្នកសារព័ត៌មានដែលឈរចាំនៅក្បែរនោះទេ តែអភិបាលរាជធានីភ្នំពេញ លោក ឃួង ស្រេង បាននិយាយក្រោយចាក់រួចថា លោកមានទំនុកចិត្តក្នុងការបំពេញការងារបម្រើប្រជាពលរដ្ឋ។
ចំណែករដ្ឋមន្ត្រីក្រសួងយុត្តិធម៌ លោក កើត រិទ្ធ និយាយថា ជាករណីពិសេសមួយដែលលោកនិងមន្ត្រីផ្សេងទៀតបានចាក់វ៉ាក់សាំងនេះ ខណៈជំងឺកូវីដ១៩ នៅបន្តរីករាលដាលនៅឡើយនោះ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង ផ្តល់ជាយោបល់ថា ដើម្បីផ្តល់ជំនឿទុកចិត្តដល់ប្រជាពលរដ្ឋថែមទៀត រដ្ឋាភិបាលគួរស្វែងរកព័ត៌មានបន្ថែមពីការវិវត្តគុណភាពនៃវ៉ាក់សាំងនេះ ខណៈការបើកយុទ្ធនាការចាប់ពីថ្ងៃនេះ វ៉ាក់សាំងរបស់ចិនមិនទាន់ទទួលស្គាល់ជាផ្លូវការពីអង្គការសុខភាពពិភពលោកនៅឡើយ។
លោក យង់ គិមអេង ប្រាប់ថា៖ «រឿងទាំងអស់ហ្នឹងដែលរដ្ឋាភិបាលត្រូវព្យាយាមរកព័ត៌មានឱ្យបានច្រើនជាងហ្នឹងពីវ៉ាក់សាំងស៊ីណូហ្វាម ថាតើដំណើរការដាក់ឱ្យទទួលស្គាល់ដោយអង្គការសុខភាពពិភពលោកបានដល់ដំណាក់កាលណាហើយ មានការរីកចម្រើនកម្រិតណា កុំឱ្យពលរដ្ឋបារម្ភពីហានិភ័យ [សុខភាព] និងផលប៉ះពាល់ផ្សេងៗ»។
រដ្ឋាភិបាលបានប្រកាសថា វ៉ាក់សាំង Sinopharm ៦០ម៉ឺនដូសនេះ មានជម្រើសអាទិភាពចាក់ទៅលើមន្ត្រីរាជការ កងកម្លាំងប្រដាប់អាវុធ គ្រូពេទ្យ និងអ្នកសារព័ត៌មាន ជាដើម ដែលយុទ្ធនាការចាប់ពីថ្ងៃទី១០ ខែកុម្ភៈនេះទៅ សម្រាប់តែមនុស្សដែលមានអាយុចាប់ពី១៨ឆ្នាំដល់៥៩ឆ្នាំប៉ុណ្ណោះ។
កម្ពុជាបានរកឃើញដំបូងគេនៃការឆ្លងជំងឺកូវីដ១៩នេះមុនគេពីជនជាតិចិន អំឡុងដើមឆ្នាំ២០២០ ហើយមកដល់ពេលនេះ មានអ្នកឆ្លងសរុប៤៧៦នាក់ ក្នុងនោះព្យាបាលជាសះស្បើយ ៤៥៧នាក់ កំពុងបន្តស្ថិតក្រោមការព្យាបាល ១៩នាក់ និងគ្មានអ្នកស្លាប់ឡើយ៕
