ក្រសួងអប់រំ យុវជន និងកីឡា បានណែនាំដល់គ្រឹះស្ថានសិក្សាសាធារណៈនិងឯកជនទាំងអស់ ចូលរួមទប់ស្កាត់រាល់សកម្មភាពមិនប្រក្រតីក្នុងទិវានៃក្តីស្រលាញ់ នៅតាមគ្រឹះស្ថានសិក្សារបស់ខ្លួន។
ក្នុងសេចក្តីណែនាំមួយចុះថ្ងៃទី៨ ខែកុម្ភៈ ឆ្នាំ២០២១ ក្រសួងអប់រំបានប្រាប់ដល់គ្រឹះស្ថានសិក្សាសាធារណៈនិងឯកជនទាំងអស់ ត្រូវទប់ស្កាត់សកម្មភាពមិនប្រក្រតីក្នុងទិវានៃក្តីស្រលាញ់ ថ្ងៃទី១៤កុម្ភៈ ដោយធ្វើការផ្សព្វផ្សាយទៅដល់សិស្សានុសិស្សឱ្យបានច្បាស់ និងកុំឱ្យមានការយល់ខុសអំពីអត្ថន័យនៃទិវាសេចក្តីស្រលាញ់នេះ។
ក្រសួងបន្តថា ថ្នាក់ដឹកនាំគ្រឹះស្ថានសិក្សាសាធារណៈនិងឯកជន និងលោកគ្រូអ្នកគ្រូ ត្រូវពង្រឹងការអនុវត្តវិន័យឱ្យបានម៉ឺងម៉ាត់ ជាពិសេសលើការគ្រប់គ្រងសីលធម៌ ដោយតាមដានវត្តមានរបស់សិស្សានុសិស្សឱ្យបានជាប់លាប់ ហើយត្រូវអប់រំណែនាំដល់សិស្សអំពីសារៈសំខាន់នៃវិធានការសុវត្ថិភាពសុខភាពសិក្សា ដើម្បីទប់ស្កាត់ការរីករាលដាលនៃជំងឺកូដ១៩។
ក្រសួងអប់រំក៏បានជំរុញឱ្យថ្នាក់ដឹកនាំគ្រឹះស្ថានសិក្សាសាធារណៈនិងឯកជន ត្រូវមានទំនាក់ទំនងជិតស្និទ្ធជាមួយមាតាបិតា ឬអាណាព្យាបាលសិស្ស និងសហគមន៍ ក្នុងការផ្តល់និងទទួលព័ត៌មានដែលពាក់ព័ន្ធសកម្មភាពមិនប្រក្រតីនានាដែលបានប្រព្រឹត្តដោយសិស្សានុសិស្ស ដើម្បីសហការទប់ស្កាត់និងអប់រំណែនាំកែលម្អទាន់ពេលវេលាផងដែរ។
«ទិវាបុណ្យនៃក្ដីស្រឡាញ់» ឬហៅជាភាសាអង់គ្លេសថា “Valentine’s Day” មានប្រវត្តិចេញពីប្រទេសលោកខាងលិច ដែលគេប្រារព្ធធ្វើនៅថ្ងៃទី១៤ ខែកុម្ភៈ ជារៀងរាល់ឆ្នាំ និងជាទម្លាប់ បុណ្យនេះធ្វើឡើងដើម្បីចែករំលែកសេចក្ដីស្រឡាញ់ដល់ឪពុកម្ដាយ ក្រុមគ្រួសារ មិត្តភក្ដិ និងមនុស្សជាតិក្នុងពិភពលោក៕