មន្ត្រីជាន់ខ្ពស់ក្រសួងពាណិជ្ជកម្ម អំពាវនាវឱ្យប្រជាពលរដ្ឋប្រុងប្រយ័ត្ននៅពេលទិញគ្រឿងសមុទ្រ និងបញ្ឈប់ការនាំចូលគ្រឿងសមុទ្រ ដែលមានផ្ទុកសារធាតុធ្វើឱ្យប៉ះពាល់ដល់សុខភាពសាធារណៈ ខណៈរយៈពេល ២ខែដើមឆ្នាំនេះ មន្ត្រីជំនាញរកឃើញគ្រឿងសមុទ្រជាង ៧តោន មានផ្ទុកសារធាតុប៉ះពាល់ដល់សុខភាព និងខូចគុណភាព។
កាលពីថ្ងៃទី១០ ខែកុម្ភៈ ឆ្នាំ២០២១ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប» នៃក្រសួងពាណិជ្ជកម្ម សហការជាមួយអាជ្ញាធរពាក់ព័ន្ធ បានបង្ក្រាបករណីនាំចូលបង្គាជាង១តោន ពីប្រទេសវៀតណាម ដែលមានការចាក់បញ្ចូលចាហួយបន្ថែម ដើម្បីបង្កើនទម្ងន់ ដែលស្ថាប័ននេះអះអាងថា បានធ្វើឱ្យខូចខាតផលប្រយោជន៍ និងប៉ះពាល់ដល់សុខភាពអ្នកប្រើប្រាស់។
អគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ លោក ផាន អូន បានអំពាវនាវឱ្យប្រជាពលរដ្ឋមានប្រុងប្រយ័ត្នចំពោះការទិញគ្រឿងសមុទ្រយកទៅទទួលទាន និងបានស្នើឱ្យបញ្ឈប់ការនាំចូលគ្រឿងសមុទ្រ ដែលផ្ទុកសារធាតុណាដែលធ្វើប៉ះពាល់ដល់សុខភាព និងផលប្រយោជន៍របស់ប្រជាពលរដ្ឋ។
លោក ផាន អូន ឱ្យដឹងថា នៅឆ្នាំ២០២០ ក.ប.ប បង្ក្រាបបានគ្រឿងសមុទ្រគ្មានគុណភាព និងប៉ះពាល់សុខភាពបានប្រមាណ ១១តោន និង២ខែដើមឆ្នាំ២០២១ បានជាង៧តោន។
លោកបានព្រមានថា អ្នកដែលនាំចូលគ្រឿងសមុទ្រមានផ្ទុកសារធាតុធ្វើឱ្យប៉ះពាល់ដល់សុខភាពសាធារណៈ នឹងប្រឈមមុខនឹងវិធានការផ្លូវច្បាប់។
លោកបន្ថែមថា៖ «សូមឱ្យបងប្អូនយើង កុំឆ្លៀតឱកាសចង់បានផលប្រយោជន៍ ឬក៏ប្រាក់ចំណេញណាមួយ ប៉ុន្តែបំផ្លាញសុខភាពប្រជាពលរដ្ឋ។ សូមកុំប្រើសាធាតុជាចាហួយ ជាសារធាតុហ្វម៉ាលីនក៏ដោយ ពីព្រោះសារធាតុនេះ វាធ្វើឱ្យប៉ះពាល់ធ្ងន់ធ្ងរសម្រាប់សុខភាពក្នុងរយៈពេលវែង»។
លោក ផាន អូន ក៏បានស្នើឱ្យពលរដ្ឋ រាយការណ៍ទៅអាជ្ញាធរមានសមត្ថកិច្ច និងត្រូវរក្សាទុកអាស័យដ្ឋានអ្នកលក់គ្រឿងសមុទ្រណាមានផ្ទុកសារធាតុ ដែលធ្វើឱ្យប៉ះពាល់ដល់សុខភាពនោះផងដែរ ដើម្បីងាយស្រួលឱ្យមន្ត្រីជំនាញចុះស្រាវជ្រាវ និងបង្ក្រាបទាន់ពេលវេលា។
លោកបន្ថែមថា៖ «អីចឹងអ្នកប្រើប្រាស់គួរតែប្រុងប្រយ័ត្នដែរ ទិញកន្លែងណាមើលប្រភពឱ្យច្បាស់សិន ហើយត្រូវយកវិក័យប័ត្រគាត់ទុកផង បើមានបញ្ហាអី គាត់អាចប្តឹងមកអគ្គនាយកដ្ឋាន ក.ប.ប បាន ដើម្បីឱ្យអគ្គនាយកដ្ឋានមានបណ្តឹង ហើយចុះស្រាវាជ្រាវតាមអាស័យដ្ឋានហ្នឹង»។
ពលរដ្ឋរស់នៅក្នុងរាជធានីភ្នំពេញម្នាក់ កញ្ញា ហេង សុខលីន យល់ថាមន្រ្តីជំនាញរដ្ឋាភិបាលគប្បីពង្រឹងកិច្ចការត្រួតពិនិត្យជាជាងឱ្យពលរដ្ឋជាអ្នកធ្វើកិច្ចការងារនេះព្រោះពលរដ្ឋមិនមានជំនាញដើម្បីមើលដឹងថាតើគ្រឿងសមុទ្រណាមានដាក់សារធាតុឬមិនដាក់នោះទេ។
កញ្ញា បានលើកឡើងថា៖«ប្រសិនបើមន្រ្តីរដ្ឋាភិបាល អត់ធ្វើការត្រួតពិនិត្យ អត់ធ្វើការរឹតបន្តឹង ហើយឱ្យពលរដ្ឋទៅមើលខ្លួនឯងហ្នឹង សួរតើប្រជាពលរដ្ឋគាត់មានចំណេះដឹងអីទៅវាស់ស្គង់ថាផលិតផលហ្នឹងវាមានការចាក់ចាហួយឬសារធាតុគីមី បើគាត់អត់ដែលមានបទពិសោធន៍ផង។ និយាយទៅរឿងហ្នឹងចាំបាច់ត្រូវតែមន្រ្តីរដ្ឋាភិបាលជាអ្នកទប់ស្កាត់ ជាអ្នកមើលការខុសត្រូវ មិនអាចឱ្យពលរដ្ឋទៅធ្វើរឿងហ្នឹងទេ»។
ប្រធានផ្នែកស្រាវជ្រាវ និងតស៊ូមតិនៅអង្គការបណ្ដាញយុវជនកម្ពុជា លោក ហេង គីមហុង សង្កេតឃើញថា កន្លងមក សត្ថកិច្ចបង្ក្រាបបានជាច្រើនករណីពាក់ព័ន្ធការនាំទំនិញគ្មានគុណភាព និងម្ហូបអាហារដែលសារធាតុធ្វើឱ្យប៉ះពាល់ដល់សុខភាពនេះ។
លោកដាក់ការសង្ស័យថា ករណីដែលសមត្ថកិច្ចទប់ស្កាត់បញ្ហានេះ មិនមានប្រសិទ្ធភាពអាចបណ្តាលមកពីការធ្វេសប្រហែស មានអំពើពុករលួយ និងការលួចនាំចូលដោយខុសច្បាប់ ដោយពុំមានការត្រួតពិនិត្យពីមន្ត្រីពាក់ព័ន្ធជាដើម។
លោកបន្ថែមថា៖ «ខ្ញុំយល់ថា ក្រសួងពាណិជ្ជកម្ម និងជំនាញផ្នែកសុខមាលភាពសាធារណៈ គម្បីចាប់ផ្តើមយកច្បាប់ទៅរឹតបណ្តឹង ជាពិសេស ត្រូវដាក់ពិន័យយ៉ាងធ្ងន់ធ្ងរ ឬអនុវត្តតាមផ្លូវច្បាប់ចំពោះជនទាំងឡាយណាដែលផលិត និងនាំចូលទំនិញ ឬក៏ម្ហូបអាហារទាំងឡាយណា ធ្វើប៉ះពាល់ដល់សុខភាពប្រជាពលរដ្ឋ»៕