មន្ទីរកសិកម្ម រុក្ខាប្រមាញ់ និងនេសាទ ខេត្តបន្ទាយមានជ័យ បានឱ្យដឹងថា សត្វជ្រូកមានជំងឺប៉េស្តអាហ្រ្វិក ចំនួន៣០ក្បាល ត្រូវបានដុតកម្ទេចចោល ក្រោយបង្ក្រាបបានពីឈ្មួញនាំឆ្លងដែនពីច្រករបៀងកម្ពុជា-ថៃ។
ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ លោក ប៉ាង វណ្ណាសេដ្ឋ ប្រាប់ វីអូឌី នៅថ្ងៃទី១៣ ខែកុម្ភៈនេះថា មន្ត្រីជំនាញមកពីស្ថាប័នពាក់ព័ន្ធ ចុះបង្ក្រាបចាប់បានសត្វជ្រូកដែលមានជំងឺប៉េស្តអាហ្រ្វិកចំនួន៣០ក្បាល និងយកទៅដុតកម្ចេចចោលកាលពីម្សិលមិញ នៅនៅចំណុចភូមិខ្លាកូនថ្មី សង្កាត់កំពង់ស្វាយ ក្រុងសេរីសោភ័ណ ខេត្តបន្ទាយមានជ័យ ។
លោកអំពាវនាវទៅប្រជាពលរដ្ឋទាំងអស់កុំមានការព្រួយបារម្ភពីបញ្ហាឆ្លងរាលដាលជំងឺប៉េស្តជ្រូកអាហ្វ្រិកចូលក្នុងទឹកដីកម្ពុជា ពីព្រោះអាជ្ញាធរពាក់ព័ន្ធយកចិត្តទុកដាក់ពង្រឹងការអនុវត្តច្បាប់ និងត្រួតពិនិត្យការនាំចូលសត្វជ្រូកពីប្រទេសជិតខាងយ៉ាងប្រុងប្រយ័ត្នខ្ពស់ ដើម្បីទប់ស្កាត់កុំឱ្យឆ្លងដល់សត្វជ្រូកក្នុងស្រុកផងដែរ។
លោកមានប្រសាសន៍ដូច្នេះថា៖ «អាជ្ញាធរគេកំពុងធ្វើការពង្រឹងបន្ថែមទៀត តាមកម្លាំងធនធានរបស់យើងមាន យើងធ្វើរាល់ថ្ងៃ មិនបានដេកមិនបានពួនទេ ធ្វើម៉េចទប់ស្កាត់កុំមានឱ្យនាំចូលជ្រូកមានជំងឺប៉េស្តអាហ្វ្រិកហ្នឹង»។
ប្រធានសមាគមចិញ្ចឹមសត្វកម្ពុជា លោក ស្រ៊ុន ពៅ សាទរនឹងវិធានការរបស់អាជ្ញាធរពាក់ព័ន្ធក្នុងការទប់ស្កាត់ការនាំចូលសត្វជ្រូកដែលមានជំងឺប៉េស្តអាហ្វ្រិកនេះ។ លោកបន្តថា ជំងឺប៉េស្តជ្រូកអាហ្វ្រិកនេះមិនទាន់មានថ្នាំព្យាបាលនិងវ៉ាក់សាំងការពារនៅឡើយ ដែលជំងឺនេះកើតឡើងនៅអាហ្វ្រិកជាង១០០ឆ្នាំមកហើយ។
ករណីនេះធ្វើឱ្យលោក ស្រ៊ុន ពៅ នៅតែព្រួយបារម្ភខ្លាចឈ្មួញលួចនាំចូលខុសច្បាប់ ហើយនាំជំងឺនេះឆ្លងដល់សត្វជ្រូកផ្សេងទៀតនៅក្នុងស្រុក ធ្វើឱ្យប៉ះពាល់ដល់សេដ្ឋកិច្ចកម្ពុជាផងដែរ។
លោកបង្ហាញការព្រួយបារម្ភដូច្នេះថា៖ «មិនថាអាជ្ញាធរណាទេ កាំកុងត្រូល និងគយតាមព្រំដែន ត្រូវប្រុងប្រយ័ត្នខ្ពស់ក្នុងការទប់ស្កាត់ការនាំចូលជ្រូកមានជំងឺប៉េស្តអាហ្រ្វិកនេះ បើសិនជាធ្វេសប្រហែសទុកឱ្យឈ្មួញនាំជ្រូកឈឺមក ធ្វើឱ្យស្លាប់[ជ្រូក]ដល់កសិដ្ឋាន និងក្រុមហ៊ុនចិញ្ចឹមជ្រូកនៅក្នុងប្រទេស»។
ប្រធានសមាគមរូបនោះអះអាងថា បច្ចុប្បន្ននេះ សមាគមរបស់លោកមានប្រជាពលរដ្ឋជាង១ម៉ឺនគ្រួសារ ចូលជាសមាជិកចិញ្ចឹមសត្វ ដូចជា មាន់ ទា គោ ក្របី ទា និងសត្វជ្រូក ដើម្បីផ្គត់ផ្គង់សាច់នៅលើទីផ្សារក្នុងប្រទេស ខណៈបច្ចុប្បន្ននេះ កម្ពុជាត្រូវការសត្វជ្រូកចន្លោះពី៦ទៅ៧ពាន់ក្បាល ដើម្បីផ្គត់ផ្គង់លើទីផ្សារក្នុងស្រុក ដែលក្នុងនោះប្រហែលជា២ពាន់ក្បាលត្រូវនាំចូលពីប្រទេសជិតខាងដូចជាប្រទេសថៃជាដើម។
គួរបញ្ជាក់ថា ជំងឺប៉េស្តជ្រូកអាហ្វ្រិក បានផ្ទុះឡើងកាលពីខែសីហា ឆ្នាំ២០១៨ ក្នុងប្រទេសចិន បានរីករាលដាលដល់ប្រទេសវៀតណាមនៅដើមឆ្នាំ២០១៩ និងបានឆ្លងចូលដល់ខេត្តរតនគិរី នៃប្រទេសកម្ពុជា កាលពីចុងខែមីនាកន្លងទៅ មុននឹងបន្តឆ្លងរាលដាលជាបន្តបន្ទាប់ទៅខេត្តចំនួន៤ផ្សេងទៀត រួមមាន ខេត្តកំពង់ចាម ខេត្តតាកែវ ខេត្តស្វាយរៀង និងខេត្តកណ្ដាល។
បើតាមមន្ត្រីក្រសួងកសិកម្ម សត្វជ្រូកជាង៤ពាន់ក្បាល បានងាប់និងត្រូវយកទៅកម្ទេចចោល ក្នុងអំឡុងពេលមានការឆ្លងរាលដាលជំងឺប៉េស្តជ្រូកអាហ្រ្វិក កាលពីឆ្នាំ២០១៩នោះ ដោយខាតបង់គិតជាទឹកប្រាក់អស់ប្រមាណ៨០ម៉ឺនដុល្លារអាមេរិក៕
