យោធាមីយ៉ាន់ម៉ាបានកាត់ផ្តាច់បណ្តាញទំនាក់ទំនងជាថ្មីទៀត ហើយបានសម្រុកបញ្ជូនរថពាសដែក និងកងកម្លាំងទៅកាន់រដ្ឋធានី និងទីក្រុងនានាទាំងយប់ ដែលសញ្ញាបង្ហាញពីការត្រៀមខ្លួនបង្ក្រាបលើប្រជាពលរដ្ឋដែលចេញមុខតវ៉ា។
យោធាមីយ៉ាន់ម៉ាប្រកាសកាត់ផ្តាច់បណ្តាញទំនាក់ទំនងចាប់ពីម៉ោង១យប់ដល់ម៉ោង៩ព្រឹកថ្ងៃទី១៥ខែកុម្ភៈ។ សារព័ត៌មានអន្តរជាតិនានាបានចុះផ្សាយពីសកម្មភាពដែលពួកយោធាសម្រុកបញ្ជូនសព្វាវុធ និងកងកម្លាំង ទាំងយប់ទៅកាន់រដ្ឋធានី និងទីក្រុងជាច្រើនដូចជា Yangon, Myitkyina, Sittwe, និងរដ្ឋ Rakhine ជាដើម។
នៅយប់ថ្ងៃអាទិត្យម្សិលមិញ ស្ថានទូតអាមេរិកប្រចាំនៅប្រទេសមីយ៉ាន់ម៉ាបានចេញសារទាំងយប់ប្រាប់ឱ្យប្រជាពលរដ្ឋរបស់ខ្លួនមានការប្រុងយ័ត្នដោយថា ការបង្ក្រាបនៅក្នុងពេលកាត់ផ្តាច់ប្រព័ន្ធទំនាក់ទំនងរួមទាំងទូរសព្ទ និងអ៊ិនធើណេតនោះអាចនឹងកើតមានឡើង។
កាលពីថ្ងៃសុក្ររដ្ឋាភិបាលយោធាមីយ៉ាន់យ៉ាប្រកាសដោះលែងអ្នកទោសចំនួន២៣ ០០០នាក់។ ការដោះលែងអ្នកទោសដោយមិនបានត្រៀមទុកនេះនាំឱ្យមានការព្រួយបារម្ភថា បទល្មើសផ្សេងៗនៅក្នុងសង្គមអាចកើតមានឡើងច្រើន និង ជាការត្រៀមលក្ខណៈរបស់ពួកយោធា ដើម្បីទុកមន្ទីរឃុំឃាំងទាំងនោះសម្រាប់ឃុំខ្លួនអ្នកចេញធ្វើសកម្មភាពតវ៉ាវិញ។
ពួកយោធាក្តោបអំណាចណែននៅមីយ៉ាន់ម៉ាអស់រយៈពេល៤៩ឆ្នាំ ចាប់ពីឆ្នាំ១៩៦២ ដល់ឆ្នាំ២០១១។ ក្នុងអំឡុងពេលដែលពួកយោធាក្តោបអំណាច ក៏មានការបង្ក្រាបដោយចលនាមហាជនមិនបន្ធូរដៃនោះដែរ។
ព្រឹត្តិការណ៍មហាជនតវ៉ានៅឆ្នាំ២០០៧ យោធាប្រើប្រាស់កម្លាំងបាញ់បង្ក្រាបលើទីតាំងកន្លែងអ្នកតវ៉ាស្នាក់នៅពេលយប់ បណ្តាលឱ្យមានអ្នកស្លាប់ចំនួន៣១នាក់។ ចំណែកចលនានិស្សិត និងព្រះសង្ឃ តវ៉ាបង្ហាញជំហរគាំទ្រចលនាប្រជាធិបតេយ្យនៅឆ្នាំ១៩៨៨ ដែលអូសបន្លាយច្រើនខែនោះ បានបណ្តាលឱ្យមានអ្នកស្លាប់៣ ០០០នាក់។
ចុងសប្តាហ៍មុនរដ្ឋាភិបាលយោធាក៏បានប្រកាសស្វែងរកចាប់ខ្លួនបុគ្គល៧រូបដែលរងការចោទថា អ្នករៀបចំយុទ្ធសាស្ត្រនៃការតវ៉ាចលនាមិនស្តាប់បង្គាប់៕
