អត្រាគ្រោះថ្នាក់ចរាចរណ៍ និងគ្រោះអគ្គិភ័យ ក្នុងពិធីបុណ្យចូលឆ្នាំចិន-វៀតណាម នៅឆ្នាំនេះ មានការថយចុះបើធៀបនឹងរយៈពេលដូចគ្នាកាលពីឆ្នាំមុន។
របាយការណ៍របស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈនៃអគ្គស្នងការដ្ឋាននគរបាលជាតិ ឱ្យដឹងនៅថ្ងៃចន្ទនេះថា ក្នុងរយៈពេល៣ថ្ងៃនៃថ្ងៃចូលឆ្នាំចិន-វៀតណាម ចាប់ពីថ្ងៃទី១១ ដល់ថ្ងៃទី១៣ ខែកុម្ភៈ ឆ្នាំ២០២១ គ្រោះថ្នាក់ចរាចរណ៍នៅទូទាំងប្រទេសបានកើតមានចំនួន៣៥លើក បណ្តាលឱ្យមនុស្ស១៤នាក់ស្លាប់ និងរងរបួសធ្ងន់ស្រាល៥២នាក់។
នាយកដ្ឋាននេះបន្តថា មូលហេតុនៃការស្លាប់របស់ប្រជាពលរដ្ឋក្នុងគ្រោះថ្នាក់ចរាចរណ៍នោះ រួមមាន ដោយសារល្បឿន មិនគោរពសិទ្ធិ ប្រជែងគ្រោះថ្នាក់ បត់គ្រោះថ្នាក់ និងបើកបរក្នុងស្ថានភាពស្រវឹង។
បើតាមនាយកដ្ឋាននគរបាលចរាចរណ៍ គ្រោះថ្នាក់ចរាចរណ៍ក្នុងពិធីបុណ្យចូលឆ្នាំចិន-វៀតណាម នៅឆ្នាំនេះមានការថយចុះ បើធៀបនឹងរយៈពេល៣ថ្ងៃដូចគ្នាកាលពីឆ្នាំមុន ក្នុងនោះ គ្រោះថ្នាក់ចរាចរណ៍បានថយចុះ១៣លើក ចំនួនអ្នកស្លាប់ថយចុះ២១នាក់។
នៅថ្ងៃនេះដែរ នាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ ក៏បានចេញរបាយការណ៍បង្ហាញថា គ្រោះអគ្គិភ័យទូទាំងប្រទេសក្នុងពិធីបុណ្យចូលឆ្នាំចិន-វៀតណាមឆ្នាំនេះ ក៏មានការថយចុះចំនួន៣លើកផងដែរ។
របាយការណ៍របស់នាយកដ្ឋាននេះបានបញ្ជាក់ថា គ្រោះអគ្គិភ័យក្នុងរយៈពេល៣ថ្ងៃ ចាប់ពីថ្ងៃទី១១ ដល់ថ្ងៃទី១៣ ខែកុម្ភៈ ឆ្នាំ២០២១ កើតមានចំនួន១៤លើក នៅក្នុងរាជធានី-ខេត្តចំនួន៩ រួមមាន រាជធានីភ្នំពេញ ព្រះសីហនុ កំពង់ចាម ព្រះវិហារ សៀមរាប កំពង់ឆ្នាំង ប៉ៃលិន កំពង់ធំ និងបាត់ដំបង។
របាយការណ៍បានបន្តថា មូលហេតុនៃការឆេះទាំងនោះកើតឡើងដោយសារការឆ្លងចរន្តអគ្គិសនីចំនួន៧ករណី ភ្លើងទៀនធូប៣ករណី ឆេះព្រៃ៣ករណី និង ក្តាប់មិនបាន១ករណី បណ្តាលឱ្យឆេះផ្ទះចំនួន១១ខ្នង រថយន្ត២គ្រឿង និងដើមឈើ១ ៩៥០ដើម។ តែយ៉ាងណា របាយការណ៍បញ្ជាក់ថា គ្រោះអគ្គិភ័យទាំងនោះពុំបណ្តាលឱ្យមានមនុស្សស្លាប់និងរបួសនោះទេ៕
