អាជ្ញាធរខេត្តបន្ទាយមានជ័យ បញ្ជាក់ថា ពលករខ្មែរម្នាក់ដែលទើបត្រឡប់មកពីថៃ និងកំពុងស្ថិតក្នុងការធ្វើចត្តាឡីស័ក បានស្លាប់ដោយសារជំងឺមហារីកថ្លើម។
សេចក្តីប្រកាសព័ត៌មានរបស់រដ្ឋបាលខេត្តបន្ទាយមានជ័យ កាលពីថ្ងៃទី១៣ ខែកុម្ភៈ ឆ្នាំ២០២១ បានលើកឡើងថា ពលករខ្មែរដែលបានស្លាប់នោះជាបុរសអាយុ៣៨ឆ្នាំ រស់នៅស្រុកថ្មគោល ខេត្តបាត់ដំបង និងបានធ្វើដំណើរត្រឡប់មកពីប្រទេសថៃ តាមច្រកអូរបីជាន់ ខេត្តបន្ទាយមានជ័យ កាលពីថ្ងៃទី១២ ខែកុម្ភៈ ឆ្នាំ២០២១។
រដ្ឋបាលខេត្តបន្តថា នៅពេលមកដល់កម្ពុជា បុរសរូបនោះមានអាការហត់ ពិបាកដកដង្ហើម និងមានស្បែកលឿងខ្លាំង ដោយសារជំងឺមហារីកថ្លើមបានឈានដល់ដំណាក់កាលចុងក្រោយ និងរាលដាលដល់ឆ្អឹងនិងសួត ដែលធ្វើឱ្យក្រុមគ្រូពេទ្យមិនអាចជួយសង្គ្រោះជីវិតបាន ទើបបណ្តាលឱ្យមានការបាត់បង់ជីវិតនៅថ្ងៃទី១២ ខែកុម្ភៈ នោះតែម្តង។
រដ្ឋបាលខេត្តបញ្ជាក់ថា៖ «ករណីបុរសដែលទទួលមរណភាពខាងលើ មិនមែនស្លាប់ដោយសារជំងឺកូវីដ១៩ទេ […] អ្នកជំងឺស្លាប់បណ្តាលមកពីជំងឺផ្ទាល់ខ្លួនរ៉ាំរ៉ៃនិងធ្ងន់ធ្ងរ ដែលក្រុមគ្រូពេទ្យប្រឹងប្រែងព្យាបាលនិងសង្គ្រោះតាមលក្ខណៈបច្ចេកទេស តែនៅមិនអាចជួយស្រោចស្រង់ជីវិតបាន»។
ទោះជាយ៉ាងនេះក្តី អាជ្ញាធរខេត្តបានយកសំណាករបស់សព រួមជាមួយប្រពន្ធ និងកូនៗ ទៅធ្វើតេស្តរកជំងឺកូវីដ១៩ នៅឯវិទ្យាស្ថានប៉ាស្ទ័រកម្ពុជា ប៉ុន្តែលទ្ធផលនៅមិនទាន់បង្ហាញនៅឡើយ។
អ្នកស្រី ដួន ណាង អាយុ២៤ឆ្នាំ ដែលជាភរិយារបស់សពពលកររូបនោះ បានប្រាប់ VOD កាលពីថ្ងៃម្សិលមិញថា អ្នកស្រីនិងស្វាមីបានធ្វើចំណាកស្រុកទៅធ្វើជាពលករសំណង់នៅទីក្រុងបាងកក ប្រទេសថៃ រយ:ពេល២ឆ្នាំមកហើយ។
អ្នកស្រីបន្តថា ប្តីរបស់អ្នកស្រីពិតជាមានជំងឺមហារីកថ្លើមពិតមែន ដោយបានធ្លាក់ខ្លួនឈឺរយៈពេល២ខែមកហើយ ហើយក្រុមគ្រូពេទ្យនៅប្រទេសថៃបានប្រាប់ឱ្យអ្នកស្រីយកប្ដីត្រឡប់មកផ្ទះវិញ ដោយសារតែគ្រូពេទ្យអស់សមត្ថភាពក្នុងការព្យាបាល។
អ្នកស្រីនិយាយ៖ «ព្យាបាលនៅឯប្រទេសថៃ ជំងឺយើងវាធ្ងន់ធ្ងរ។ អ៊ីចឹងគេមើលហើយគេឱ្យប្រញាប់មកផ្ទះវិញ ព្រោះថវិកាយើងអត់ដល់គេ [ចំណាយច្រើនក្នុងការព្យាបាល]»។
អ្នកស្រីបានបន្ថែមថា សពប្ដីអ្នកស្រីត្រូវបានយកមកបូជានៅឯស្រុកកំណើត នៅភូមិតាមាឃ ឃុំគោកឃ្មុំ ស្រុកថ្មគោល ខេត្តបាត់ដំបង កាលពីថ្ងៃអាទិត្យ ទី១៤ ខែកុម្ភៈ ឆ្នាំ២០២១។
អ្នកស្រីបន្តថា នៅពេលបញ្ចប់ពិធីបុណ្យរួច អាជ្ញាធរនឹងតម្រូវឱ្យគាត់ទៅធ្វើចត្តាឡីស័កវិញ ប៉ុន្តែអ្នកស្រីមិនទាន់ដឹងច្បាស់ទេថា គេនឹងយកទៅពេលណានោះទេ។
អ្នកស្រីនិយាយ៖ «ឮគេថាគេ [អាជ្ញាធរ] យកខ្ញុំទៅច្រកកន្លែងខ្ញុំចេញ មកនៅច្រកអូរបីជាន់ [ខេត្តបន្ទាយមានជ័យ] មិនដឹងច្បាស់ថា គេយកទៅមណ្ឌលចត្តាឡីស័កនៅថ្ងៃណាទេ»។
ប្រធានមន្ទីរពេទ្យបង្អែកមិត្តភាពកម្ពុជា-ជប៉ុនមង្គលបុរី លោក ចន្ទ វឌ្ឍីណាវុឌ្ឍ នៅថ្ងៃអង្គារនេះ បានបដិសេធឆ្លើយតបពីលទ្ធផលនៃការធ្វើតេស្តរកជំងឺកូវីដ១៩របស់ក្រុមគ្រួសារសពដែលបានស្លាប់នេះ ដោយតម្រូវឱ្យ វីអូឌី ចុះទៅជួបផ្ទាល់។
គួរបញ្ជាក់ថា អ្នកស្លាប់ក្នុងអំឡុងពេលធ្វើចត្តាឡីស័ករយៈពេល១៤ថ្ងៃ បានកើនដល់ចំនួន៥នាក់ហើយ បើគិតទាំងបុរសដែលជាពលករខ្មែរទើបមកពីថៃរូបនេះ ក្នុងនោះមាន២ករណី ស្ថិតនៅក្នុងខេត្តត្បូងឃ្មុំ និង ៣ករណី នៅខេត្តបន្ទាយមានជ័យ។ ចំណែក មូលហេតុនៃការស្លាប់របស់ពួកគេ ត្រូវបានអាជ្ញាធរបញ្ជាក់ថា មាន២ករណីស្លាប់ដោយសារដួលបោកក្បាល មួយករណីទៀតស្លាប់ដោយសារគាំងបេះដូង និង ១ករណីចុងក្រោយនេះ ស្លាប់ដោយសារជំងឺមហារីកថ្លើម៕