ចំនួនអ្នកតវ៉ានៅមីយ៉ាន់ម៉ាកើនឡើងក្រោយចល័តរថពាសដែកត្រៀមបង្ក្រាប

ចំនួនអ្នកតវ៉ានៅតាមតំបន់ផ្សេងៗនៅក្នុងប្រទេសមីយ៉ាន់ម៉ាបានកើនឡើង ក្រោយពេលដែលមានការបញ្ជូនរថពាសដែក និងកងទ័ពចូលក្នុងរដ្ឋធានីនានាត្រៀមលក្ខណៈបង្ក្រាប ។​

អ្នកតវ៉ាម្នាក់ឈ្មោះ Nyein Moeស្ថិតក្នុងចំណោមអ្នកតវ៉ាផ្សេងទៀតនៅមុខធនាគារជាតិជាកន្លែងដែលមានចតរថពាសដែកថ្លែងថា ការចល័តរថពាសដែកបែបនេះគឺយោធាកំពុងតែគំរាមកំហែងដល់ប្រជាជនហើយ។ អ្នកតវ៉ារូបនេះបញ្ជាក់ថា ប្រជាជនមិនអាចឈប់តវ៉ាបានទេ។​

Nyein Moe៖«ការដាក់រថពាសដែកល្បាតប្រចាំនេះគឺមានន័យថា ពួកគេកំពុងគំរាមកំហែងប្រជាជនហើយ។នៅពេលនេះពួកយើងមិនអាចឈប់តវ៉ាបានទេ។​» នេះបើតាមការចុះផ្សាយរបស់Channel News Asia។

Channel News Asia ចុះផ្សាយថា ក្រោយពេលមានការចល័តរថពាសដែក និង បន្ថែមកម្លាំងកងទ័ពនៅទូទាំងប្រទេសនោះ ចំនួនប្រជាជនងើបតវ៉ាក៏មានការកើនឡើងដែរ បើទោះជាអ្នកតវ៉ាមួយចំនួនបារម្ភពីការបង្ក្រាបដោយការបាញ់សម្លាប់ពីពួកយោធាក៏ដោយ។​

សញ្ញាដែលបង្ហាញពីការព្រួយបារម្ភថា មានការបង្ក្រាបនោះគឺកាលពីថ្ងៃអាទិត្យមានការចល័តរថពាសដែក និងបន្ថែមកម្លាំងទ័ពនៅក្នុងរដ្ឋធានី និងទីក្រុងសំខាន់ៗដូចជា Yangon, Myitkyina, Sittwe, និងរដ្ឋ Rakhine ជាដើម។​

នៅពេលដែលមានការចល័តសព្វាវុធ និងកម្លាំងនេះ ពួកយោធាក៏បានកាត់ផ្តាច់ប្រព័ន្ធទំនាក់ទំនងដូចជា អ៊ីនធើណេត និង ទូរសព្ទផងដែរ។​

សហរដ្ឋអាមេរិក ចក្រភពអង់គ្លេស និង សហភាពអឺរ៉ុបអំពាវនាវដល់ពួកយោធា ធ្វើយ៉ាងណាកុំឱ្យមានហិង្សាបង្កការឈឺចាប់ដល់អ្នកតវ៉ា។​

គិតត្រឹមព្រឹកថ្ងៃអង្គារនេះ យោធាបានឃាត់ខ្លួនអ្នកនយោបាយ និងអ្នកតវ៉ាជាង៤២០នាក់ ខណៈ អ្នកមួយចំនួនទៀតរបួសពេលប៉ះទង្គិចគ្នាក្នុងអំឡុងពេលតវ៉ា៕​