ក្រសួងការពារជាតិ កំពុងស៊ើបអង្កេតលើករណីមន្ត្រីយោធិនកងការពារព្រំដែនគោកលេខ៥០៣ម្នាក់ នៅខេត្តបន្ទាយមានជ័យ ដែលបានធ្វើអត្តឃាតដោយចងកសម្លាប់ខ្លួន ក្រោយពីរថយន្តរបស់គាត់ដែលប្រើប្រាស់រួមជាមួយអង្គភាព ត្រូវបានមន្ត្រីគយចាប់យក និងពុំមានលទ្ធភាពដោះស្រាយ។
ការស៊ើបអង្កេតទៅលើករណីអត្តឃាតរបស់លោកអនុសេនីយ៍ត្រី នាង រិទ្ធីឆ័យ យោធិនកងការពារព្រំដែនគោកលេខ៥០៣ នៃបញ្ជាការដ្ឋានយោធភូមិភាគ៥រូបនេះ ធ្វើឡើងបន្ទាប់ពីមានការរិះគន់ជាច្រើននៅតាមបណ្តាញសង្គម ដោយទាមទារឱ្យមានការស៊ើបអង្កេតស្វែងរកយុត្តិធម៌លើរឿងនេះ។
អ្នកនាំពាក្យកងទ័ពជើងគោក លោក ម៉ៅ ផល្លា មានប្រសាសន៍នៅថ្ងៃទី១៥ ខែកុម្ភៈ ឆ្នាំ២០២១ ថាមន្ត្រីយោធាម្នាក់ដែលបានធ្វើអត្តឃាតចងកសម្លាប់ខ្លួនកាលពីថ្ងៃទី១០ ខែកុម្ភៈនោះ មានឈ្មោះ នាង រិទ្ធីឆ័យ ជាយោធិននៅភូមិភាគ៥ នៃខេត្តបន្ទាយមានជ័យ។
លោកបន្តថា មូលហេតុដែលយោធិនឈ្មោះ នាង រិទ្ធីឆ័យ ធ្វើអត្តឃាតនោះ ត្រូវបានសង្ស័យជាបឋមថា ដោយសារតែគាត់អន់ចិត្តករណីដែលមន្ត្រីគយខេត្តបន្ទាយមានជ័យ បានចាប់រថយន្តរបស់គាត់ដែលទិញយកទៅប្រើប្រាស់រួមនៅអង្គភាពអស់រយៈពេលជាច្រើនឆ្នាំមកហើយនោះ ព្រោះតែរថយន្តនោះមិនមានស្លាកលេខ។
លោក ម៉ៅ ផល្លា បានគូសបញ្ជាក់៖ «[ជនរងគ្រោះ] អន់ចិត្តថា យកលុយទៅទិញឡាន ដល់ឡានគ្រោះថ្នាក់ចរាចរណ៍ អូសមកផ្ទះ ស្លាកលេខឡាននៅផ្ទះ គេ[មន្ត្រីគយ]ចាប់ គេចោទថាឡានហ្នឹងអត់ពន្ធ តែឡានហ្នឹងបានបម្រើនៅក្នុងអង្គភាពហ្នឹង៤ទៅ៥ឆ្នាំហើយ»។
លោកបន្ថែមថា ៖ «គាត់ទិញ [រថយន្ត] ដាក់រួម [ប្រើប្រាស់ក្នុងអង្គភាព] លេខក្រសួងការពារជាតិចេញឱ្យ ប៉ុន្តែដល់គ្នាបើកទៅគ្រោះថ្នាក់ចរាចរណ៍ ពេលនោះវាអត់មានស្លាកលេខ ស្លាកលេខនៅផ្ទះ ហើយនិយាយគេមិនព្រម អន្តរាគមន៍ពីអង្គភាពមេបញ្ជាការទៅ ក៏គេមិនព្រម ដូច្នេះគឺគេទុកបញ្ហានេះរាយការណ៍ទៅថ្នាក់លើ»។
បើតាមអ្នកនាំពាក្យកងទ័ពជើងគោករូបនេះ ថ្នាក់ដឹកនាំភូមិភាគទី៥ នៃខេត្តបន្ទាយមានជ័យ កំពុងតាមដាននិងស៊ើបអង្កេតលើករណីដែលមន្ត្រីយោធារបស់ខ្លួនបានស្លាប់នោះហើយ ប៉ុន្តែលទ្ធផលយ៉ាងណានោះ នៅមិនទាន់បានដឹងនៅឡើយ។
លោក ម៉ៅ ផល្លា មានប្រសាសន៍ថា៖ «ខាងភូមិភាគគេចុះទៅធ្វើការហើយ វាអត់មានរបាយការណ៍មកទេ ព្រោះអានេះវាចំណុះឱ្យភូមិភាគ៥ អញ្ចឹងគឺខ្ញុំអត់ទាន់ទទួលរបាយការណ៍ទេណា បាទ! គេធ្វើរួចហើយ គេធ្វើរកហេតុផលហើយ»។
លោក ឈុន ម៉ៅ មេបញ្ជាការរងភូមភាគទី៥ ខេត្តបន្ទាយមានជ័យ មានប្រសាសន៍នៅថ្ងៃអង្គារនេះថា ក្រោយហេតុការណ៍នេះ មន្ត្រីជំនាញក្រសួងការពារជាតិ បានចុះទៅស៊ើបអង្កេតផ្ទាល់ ដើម្បីស្វែងរកការពិតចំពោះរឿងនេះ។
លោកមានប្រសាសន៍ថា៖ «ក្រសួងការពារជាតិ លោកបានចុះមកផ្ទាល់ម្សិលមិញ ចុះមកស៊ើបអង្កេតនៅផ្ទះសពហ្នឹង ផ្ទះបងរបស់សពហ្នឹង ទៅបន្ទាយ៥០៣ កន្លែងអង្គភាពឈរជើងនៅព្រំដែន។ ហើយទី២ គាត់បានចុះមកកន្លែងគយ មកមើលឡាននៅជាក់ស្តែង មកសួរនាំនៅកន្លែងគយចល័តហ្នឹង»។
លោក ឈុន ម៉ៅ បន្តថា លោក នាង រិទ្ធីឆ័យ ដែលជាជនរងគ្រោះនោះមានជំនាញផ្នែកព័ត៌មានវិទ្យា និងមានចរិតស្លូតបូត។
លោកថា៖ «ទាហានហ្នឹងវាល្អ ព្រោះវាមនុស្សល្អណាស់ មនុស្សចេះដឹង វារៀន IT [ព័ត៌មានវិទ្យា] ជំនាញអី ខាងភូមិភាគ ខាងកងពលអី ត្រូវការប្រើអី ហៅវាយកមកប្រើ ជួយធ្វើរូបភាពធ្វើអី ធ្វើ ស្លាយធ្វើអីហ្នឹង! ដល់អ៊ីចឹងទៅបានគេស្តាយវាណាស់ហ្នឹង ទាហានទាំងអស់ហ្នឹងគេស្រឡាញ់ចូលចិត្តវា»។
មេបញ្ជាការរងភូមភាគទី៥រូបនេះ បានស្នើដល់ក្រសួងការពារជាតិ ស្វែងរកយុត្តិធម៌ជុំវិញការស្លាប់របស់យោធិនរូបនេះ និងចៀសវាងកុំឱ្យមានផលប៉ះពាល់ដល់សតិអារម្មណ៍របស់កងទ័ពផ្សេងទៀតដែលស្រឡាញ់រាប់អានយោធិនរូបនោះ។
លោកបន្ថែមទៀតថា៖ «គយគេថាចាប់ឡានអត់ពន្ធ ប៉ុន្តែការពិតឡានហ្នឹងវាបម្រើអង្គភាពហ្នឹង៤ឆ្នាំមកហើយ ហើយឡានឡើងចាស់ វាអត់មានពន្ធទេ មានតែស្លាកលេខ ខ.ម ត្រឹមត្រូវ បញ្ជាក់ពីគយអ៊ីចឹង។ [ឡាននេះជាកម្មសិទ្ធិ] ផ្ទាល់ខ្លួន ឡានហ្នឹងវាទិញ ម៉ែឪណោះលក់ដីឱ្យកូន [ទិញឡាន] ខ្វះខ្លះ ខ្ចីចងការគេ គ្នាវាអត់ដែរ អត់មានផ្ទះអត់មានអីនៅទេ ទាហានមានអី ដល់អ៊ីចឹងទៅវាវ៉ល់វាអស់ហើយ»។
លោក គីម សុភៈ អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ បានប្រាប់វីអូឌីថា អគ្គនាយកដ្ឋានគយ និងរដ្ឋាករកម្ពុជា កំពុងតែស្រាវជ្រាវករណីនេះ ហើយក្រសួងនឹងបំភ្លឺជូនតាមក្រោយ។
លោក ម៉ឺន សាក់ ត្រូវជាបងថ្លៃរបស់លោក នាង រិទ្ធីឆ័យ បានឱ្យដឹងថា ប្អូនថ្លៃរបស់គាត់ជាកូនពៅក្នុងគ្រួសារដែលមានបងប្អូន៨នាក់ រស់នៅភូមិអូរអំបិល សង្កាត់អូរអំបិល ក្រុងសេរីសោភ័ណ។
លោកបន្តថា ឡានដែលត្រូវមន្ត្រីគយចាប់អស់រយៈពេលជាង១ខែមកហើយនោះ មានតម្លៃ៦៧០០ដុល្លារ ដែលប្អូនថ្លៃរបស់លោកបានខ្ចីពីបងប្អូនដើម្បីទិញ និងយកទៅប្រើប្រាស់រួមនៅក្នុងអង្គភាព។
លោកបន្ថែមថា នៅពេលមន្ត្រីគយចាប់ឡាននោះ បានធ្វើឱ្យប្អូនថ្លៃរបស់គាត់ពិបាកចិត្ត ដោយសារត្រូវសងប្រាក់ដែលខ្ចីគេសម្រាប់ទិញឡានផង និងត្រូវជួសជុលឡានដោយសារគ្រោះថ្នាក់ចរាចរណ៍ផង។
លោក ម៉ឺន សាក់ និយាយថា៖ «គាត់ [ប្អូនថ្លៃ] ខ្ចីលុយគេមកទិញឡាន ដល់តែពេលក្រោយមក គាត់យកឡានដឹកទ័ព ដឹកអីអ៊ីចឹងទៅ។ ក្រោយមកក៏ឡានគាត់ទៅបុករោងគេ ដល់ទៅបុករោងគេហ្នឹងទៅ សងអាថ្លៃដែលខ្ចីទិញឡាន […] ក៏ដោះស្រាយសំណងដែលសងគេផង យកឡានទៅធ្វើផង ដូចថា វារកលុយអត់បាន ហើយប្រាក់ខែគាត់នោះយកលុយអង្គភាពទៀត អង្គភាពគេកាត់ទៀត បន្ទាប់មកគាត់ពិបាកចិត្ត ដោយសារក្រោយមកគយចាប់ឡានគាត់ហ្នឹង ដោះវាមិនចេញ»។
លោកបានឱ្យដឹងដែរថា ថ្មីៗនេះ ក្រុមអធិការកិច្ចរបស់ក្រសួងការពារជាតិ បានចុះទៅសួរនាំរូបលោកនិងអ្នកពាក់ព័ន្ធ តាមបទបញ្ជារបស់រដ្ឋមន្ត្រីក្រសួងការពារជាតិ លោក ទៀ បាញ់។
តែយ៉ាងណា លោកថា ក្រុមអធិការកិច្ចនៅមិនទាន់បង្ហាញលទ្ធផលនៃការស៊ើបអង្កេតនោះនៅឡើយ ដោយគ្រាន់តែបញ្ជាក់ថា បើសិនមានដំណោះស្រាយ នឹងយកឡាននោះមកប្រគល់ឱ្យក្រុមគ្រួសារសព ដើម្បីដោះស្រាយបំណុល។
មន្រ្តីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តបន្ទាយមានជ័យ លោក ស៊ុំ ចាន់គា លើកឡើងថា ការអនុវត្តច្បាប់ទៅលើរថយន្តគេចពន្ធឬមិនបានបង់ពន្ធរបស់មន្រ្តីគយ ដោយការឃាត់ទុកដោយគ្មានការយោគយល់ គឺជាការត្រឹមត្រូវ ហើយថា ការធ្វើអត្តឃាតរបស់មន្រ្តីយោធិននោះជាការសម្រេចចិត្តរបស់បុគ្គល មិនពាក់ព័ន្ធនឹងផ្លូវច្បាប់នោះទេ។
យ៉ាងណា លោកថា ការចាត់វិធានការច្បាប់របស់មន្រ្តីគយ ត្រូវធ្វើឡើងដោយតម្លាភាព និងរកឱ្យឃើញអ្នកពាក់ព័ន្ធ ក្នុងការអនុញ្ញាតឱ្យរថយន្តគេចពន្ធប្រើស្លាកលេខ ខ.ម. ហើយមិនត្រូវម៉ឺងម៉ាត់ តែចំពោះពលរដ្ឋឬមន្រ្តីថ្នាក់ទាបនោះទេ។
លោក ស៊ុំ ចាន់គា មានប្រសាសន៍ថា៖ «សូមឱ្យការអនុវត្ត រាល់ការធ្វើ ធ្វើទាំងអស់ទៅ។ ចាប់មកឱ្យប្រមូលពន្ធរដ្ឋ ឱ្យគេបង់ពន្ធអីត្រឹមត្រូវទៅ យកទៅជិះទៅ ពិបាកស្អី! ហើយបើសិនជាយើងនាំគ្នាលាក់លៀមៗ បង្កើតនូវអំពើពុករលួយ នាំគ្នាលួចលាក់ថវិការបស់ជាតិអ៊ីចឹង អ្នកណាដែលវេទនា គឺជាតិហ្នឹង។ តើអភិវឌ្ឍយ៉ាងម៉េចឱ្យបានរីកចម្រើន?»៕