អាជ្ញាធរមូលដ្ឋានឱ្យដឹងថា «សហគមន៍ព្រៃក្រញូង»ដែលការពារដោយសហគមន៍ ស្ថិតក្នុងឃុំចំការលើ ស្រុកថាឡាបរិវ៉ាត់ ខេត្តស្ទឹងត្រែង បានរងនូវការកាប់ទន្ទ្រានពីសំណាក់ឈ្មួញនិងប្រជាពលរដ្ឋចំណូលថ្មី ដើម្បីយកដីធ្វើកម្មសិទ្ធិផ្ទាល់ខ្លួន បើទោះជាអាជ្ញាធរខិតខំទប់ស្កាត់យ៉ាងណាក៏ដោយ។
មេភូមិចំការលើ លោក វង្ស ឡែន មានប្រសាសន៍កាលពីថ្ងៃម្សិលមិញថា ដីសហគមន៍ព្រៃក្រញូង មានទំហំប្រមាណ៦០០ហិកតា ត្រូវបានគ្រប់គ្រងដោយប្រជាសហគមន៍នៅតំបន់នោះ។ ប៉ុន្តែលោកថា បច្ចុប្បន្ន ដីព្រៃសហគមន៍នេះបានរងនូវការទន្ទ្រានពីសំណាក់ប្រជាពលរដ្ឋខ្មែរឥស្លាម និងក្រុមឈ្មួញមួយចំនួនដែលបានជួលប្រជាពលរដ្ឋឱ្យទៅកាប់ទន្ទ្រានយកជាបន្តបន្ទាប់។
លោកមេភូមិនិយាយថា៖ «និយាយឱ្យមែនទែនទៅ ដីសហគមន៍នេះគឺនៅសល់តែឈ្មោះទេ បងប្អូនឥស្លាមកាប់រុករានអស់ហើយ ពួកគាត់កាប់ទន្ទ្រានដីយកធ្វើចម្ការ។ ប៉ុន្តែបើតាមឯកសារដែលខ្ញុំធ្លាប់បានកាន់ ដីក្នុងសហគមន៍ អត់អាចធ្វើបានទេ លុះត្រាតែដីគេវាលហើយទើបអាចធ្វើបាន»។
លោកមេភូមិ វង្ស ឡែន បានរៀបរាប់ទៀតថា ដីនៅតំបន់នោះបានរងការកាប់ទន្ទ្រានយកតាំងពី«សហគមន៍ព្រៃក្រញូង»បានបង្កើតឡើង ប៉ុន្តែជនល្មើសដែលបានទៅកាប់ទន្ទ្រាននោះ ត្រូវបានរដ្ឋបាលព្រៃឈើចុះបង្ក្រាបនិងចាប់ខ្លួនបញ្ជូនទៅតុលាការផងដែរ។
លោកនិយាយថា៖ «សព្វថ្ងែនេះ ព្រៃក្នុងសហគមន៍នេះនៅមានសេសសល់បន្តិចបន្តួច។ តាមពិតទៅ មានការព្រួយបារម្ភណាស់សម្រាប់ដីរបស់ប្រជាពលរដ្ឋនេះ គឺយើងអត់បានកាន់់កាប់ទេ ប៉ុន្តែកាន់កាប់ដោយបងប្អូនឥស្លាមវិញ»។
បើតាមលោកមេភូមិរូបនេះ កន្លងមក អាជ្ញាធរធ្លាប់បានកាត់ឆ្វៀលដីនៅតំបន់នោះមួយចំនួន ដើម្បីធ្វើប្រទានកម្មដល់ប្រជាពលរដ្ឋខ្មែរឥស្លាមឱ្យកាន់កាប់ស្របច្បាប់ ប៉ុន្តែបានហាមការកាប់ទន្ទ្រានព្រៃយកដីធ្វើកម្មសិទ្ធិបន្ថែមទៀត។
តែយ៉ាងណា លោកថា ពលរដ្ឋមួយចំនួនមិនស្តាប់ការណែនាំរបស់អាជ្ញាធរឡើយ ដោយនៅតែមានការលួចកាប់ទន្ទ្រានជាបន្តបន្ទាប់ទៀត។
សហគមន៍ឈើក្រញូងនេះទទួលបានការប្រកាសទទួលស្គាល់ពីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី២៥ ខែមករា ឆ្នាំ២០១៧ និងមានការជួយជ្រោមជ្រែងក្នុងការរៀបចំផែនការគ្រប់គ្រង និងការពារដោយរដ្ឋបាលព្រៃឈើ និង អង្គការ រីឃូស។
អភិបាលស្រុកថាឡាបរិវ៉ាត់ លោក សាន សារឿន មានប្រសាសន៍ថា ការទន្ទ្រានដីព្រៃសហគមន៍នេះបានកើតឡើងខ្លាំងកាលពីអំឡុងឆ្នាំ២០១៤ និង ២០១៥ ប៉ុន្តែក្រោយមក អាជ្ញាធរមានសមត្ថកិច្ច បានខិតខំទប់ស្កាត់និងចាត់វិធានការបង្ក្រាបយ៉ាងម៉ឺងម៉ាត់ ក្នុងនោះបានបញ្ជូនខ្លួនជនល្មើសជាច្រើននាក់ទៅតុលាការផងដែរ។
លោកបានបន្តថា បើទោះជាសហគមន៍ព្រៃក្រញូងនេះបានស្ថិតនៅក្រោមការគ្រប់គ្រងរបស់សហគមន៍ ប៉ុន្តែអាជ្ញាធរនិងមន្ត្រីជំនាញពាក់ព័ន្ធ ក៏បានចូលរួមរៀបចំផែនការសម្រាប់ពួកគេផងដែរ។
លោកថា៖ «កាលពីមុន មានការកាប់ទន្រ្ទានមែន ប៉ុន្តែយើងមានចំណាត់ការចាប់បញ្ជូនទៅតុលាការរហូតដែរតើ! យូរហើយតាំងពីឆ្នាំ២០១៤ – ២០១៥ ទំហំនៃការកាប់ វាដោយកន្លែង កន្លែងខ្លះ៥ហិកតា ខ្លះ១០ហិកតា»។
វីអូឌី ពុំអាចស្វែងរកការអត្ថាធិប្បាយជុំវិញករណីនេះពីប្រធាននិងតំណាងសហគមន៍ព្រៃក្រញូង បានទេ នៅថ្ងៃព្រហស្បតិ៍នេះ ខណៈរដ្ឋបាលព្រៃឈើខេត្តស្ទឹងត្រែង លោក វ៉ា សុខា បានបដិសេធឆ្លើយតបជុំវិញករណីនេះ។
មន្ត្រីសមាគមការពារសិទ្ធិមនុស្សអាដហុកប្រចាំខេត្តស្ទឹងត្រែង លោក ប៊ី វ៉ានី មានប្រសាសន៍ថា កន្លងមក លោកក៏ធ្លាប់បានទទួលព័ត៌មានពីប្រជាពលរដ្ឋ ជុំវិញការកាប់រានទន្ទ្រានយកដី និងការលួចចូលទៅអារឈើខុសច្បាប់នៅក្នុងសហគមន៍ព្រៃឈើក្រញូងនេះដែរ ហើយករណីនេះបានកើតឡើងជាច្រើនឆ្នាំមកហើយ ដែលការទប់ស្កាត់ហាក់មិនទាន់មានប្រសិទ្ធភាពនៅឡើយ។
លោកនិយាយថា៖ «ជារឿយៗ បទល្មើសវានៅតែមាន ប៉ុន្តែដល់មានករណីចុះផ្សាយ ក៏ខាងអាជ្ញាធរអីគេចុះទៅ វាស្ងាត់បានមួយអាទិត្យ ពីរអាទិត្យ ក៏មានបទល្មើសកើតឡើងទៀត។ អ៊ីចឹងមានន័យថា ការកាប់ទន្ទ្រានព្រៃរបស់រដ្ឋក៏នៅតែមាន ហើយការលួចកាប់ឈើខុសច្បាប់នៅតាមមូលដ្ឋានក៏នៅតែមាន»។
លោកយល់ថា អ្នកដែលលួចកាប់ឈើនិងទន្ទ្រានយកដីរដ្ឋនេះ អាចជាប្រជាពលរដ្ឋនៅមូលដ្ឋាន និងអ្នកចំណូលថ្មីដែលមកពីតាមបណ្តាខេត្តផ្សេងៗ ដូចជា ខេត្តកំពង់ចាម ព្រៃវែង និងត្បូងឃ្មុំជាដើម ដែលករណីនេះ លោកបានជំរុញដល់អាជ្ញាធរពាក់ព័ន្ធចាត់វិធានការទប់ស្កាត់បទល្មើសព្រៃឈើនិងការទន្ទ្រានដីរដ្ឋនេះឱ្យបានប្រសិទ្ធភាព ដើម្បីការពារព្រៃឈើដែលនៅសល់។
កាលពីខែមិថុនា ឆ្នាំ២០២០ ក្រសួងកសិកម្ម រុក្ខាប្រមាញ់ និងនេសាទ បានបញ្ជាទៅប្រធានមន្ទីរកសិកម្មរាជធានី-ខេត្ត ចាត់វិធានការទប់ស្កាត់និងបង្ក្រាបបទល្មើសព្រៃឈើ ជលផល និងការកាប់រាន ដុត ឈូសឆាយដី ព្រៃឈើ ព្រៃលិចទឹក តាមគ្រប់រូបភាព ក្រោយពីក្រសួងរកឃើញថា សកម្មភាពបទល្មើសទាំងនេះនៅតែបន្តកើតមានគួរឱ្យកត់សម្គាល់នៅតាមបណ្តាខេត្តមួយចំនួន៕