ក្រសួងសុខាភិបាល បានរកឃើញជនជាតិបរទេសចំនួន៤នាក់បន្ថែមទៀតដែលបានធ្វើដំណើរមកប្រទេសកម្ពុជា មានផ្ទុកជំងឺកូវីដ១៩។
ក្នុងសេចក្ដីប្រកាសព័ត៌មានរបស់ក្រសួងសុខាភិបាល ចេញផ្សាយនៅថ្ងៃទី១៨ ខែកុម្ភៈ ឆ្នាំ២០២១នេះ ឱ្យដឹងថា អ្នកឆ្លងជំងឺកូវីដ១៩ ទាំង៤នាក់នោះ រួមមាន បុរសជនជាតិឥណ្ឌូនេស៊ី អាយុ១៨ឆ្នាំ និងស្រ្តីជនជាតិឥណ្ឌូនេស៊ី អាយុ១៨ឆ្នាំ ជាអ្នកធ្វើដំណើរមកពីប្រទេសឥណ្ឌូនេស៊ី មកដល់កម្ពុជា នៅថ្ងៃទី១៦ ខែកុម្ភៈ ស្រ្តីជនជាតិចិន អាយុ៣១ឆ្នាំ មកដល់កម្ពុជា កាលពីថ្ងៃទី០៧ ខែកុម្ភៈ និងបុរសជនជាតិស្វីស មកដល់កម្ពុជា កាលពីថ្ងៃទី០៤ ខែកុម្ភៈ ឆ្នាំ២០២១។
ក្រសួងបន្តថា អ្នកធ្វើដំណើរតាមយន្តហោះជាមួយអ្នកជំងឺជនជាតិឥណ្ឌូនេស៊ី ដែលមានចំនួន១២៦នាក់ត្រូវបានធ្វើតេស្តអវិជ្ជមាន ប៉ុន្តែក្រសួងតម្រូវឱ្យធ្វើចត្តាឡីស័ករយៈពេល១៤ថ្ងៃ នៅសណ្ឋាគារមួយ និងមណ្ឌលចត្តាឡីស័កនៅក្នុងរាជធានីភ្នំពេញ។
ចំពោះអ្នកជាសះស្បើយពីជំងឺកូវីដ១៩ នៅថ្ងៃទី១៧ ខែកុម្ភៈ ឆ្នាំ២០២១ ក្រសួងថា មិនមានទេ។
បើតាមក្រសួងសុខាភិបាល គិតត្រឹមព្រឹកថ្ងៃទី១៨ ខែកុម្ភៈ ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ១៩ ចំនួន៤៨៣នាក់ ក្នុងនោះ អ្នកព្យាបាលជាសះស្បើយចំនួន៤៧០នាក់ និងអ្នកដែលកំពុងសម្រាកនៅមន្ទីរពេទ្យចំនួន១៣នាក់៕