ស្នងការដ្ឋាននគរបាលរាជធានីភ្នំពេញ បានឃាត់ខ្លួនមន្ត្រីនគរបាលប្រឆាំងការជួួញដូរមនុស្សមួយរូប ដើម្បីសួរនាំពាក់ព័ន្ធនឹងករណីប្រើហិង្សានៅហាងខារ៉ាអូខេមួយកន្លែងក្នុងខេត្តព្រៃវែង បន្ទាប់ពីបរាជ័យក្នុងការបញ្ចុះបញ្ចូលបុគ្គលិកនារីម្នាក់ឱ្យទៅគេងជាមួយ។
យោងតាមការបំភ្លឺរបស់អ្នកនាំពាក្យស្នងការដ្ឋាននគរបាលរាជធានីភ្នំពេញ ដែលផ្សព្វផ្សាយលើទំព័រហ្វេសប៊ុករបស់ស្នងការដ្ឋាននគរបាលរាជធានីភ្នំពេញ កាលពីរសៀលថ្ងៃម្សិលមិញ ឱ្យដឹងថា កាលពីថ្ងៃទី១២ ខែកុម្ភៈ ឆ្នាំ២០២១ លោកវរសេនីយ៍ត្រី ហាក់ លី មន្ត្រីនគរបាលប្រឆាំងការជួញដូរមនុស្ស ពិតជាបានបង្កអំពើហិង្សាទៅលើនារីម្នាក់នៅហាងខារ៉ាអូខេនៅខេត្តព្រៃវែងមែន ហើយបច្ចុប្បន្ន មន្ត្រីរូបនោះត្រូវបានឃាត់ខ្លួននៅស្នងការដ្ឋាន និងអនុវត្តបន្តតាមនីតិវិធីច្បាប់ ដោយរង់ចាំការសម្រេចរបស់ព្រះរាជអាជ្ញាខេត្តព្រៃវែង។
អ្នកនាំពាក្យស្នងការដ្ឋានរាជធានីភ្នំពេញ លោក សាន សុខសីហា មានប្រសាសន៍នៅថ្ងៃពុធម្សិលមិញថា មន្ត្រីជំនាញកំពុងធ្វើការសាកសួរលោក ហាក់ លី ក្រោយការឃាត់ខ្លួនកាលពីរសៀលថ្ងៃម្សិលមិញ។
លោកថា៖ «ជាក់ស្ដែងជាការពិត យើងចាប់ខ្លួនគាត់នៅរសៀលថ្ងៃពុធនេះ ទាក់ទងករណីនៃការបង្កប្រើអំពើហិង្សា ដើម្បីយកមកធ្វើការសួរនាំបន្ថែម ថាតើករណីនេះវាម៉េចខ្លះ! បើសិនជាយើងស្វែងរកឃើញភស្តុតាងថាជាករណីជាក់ស្ដែងមែន អ៊ីចឹងយើងសុំគោលការណ៍ថ្នាក់ដឹកនាំ ហើយយើងនឹងអនុវត្តបន្តទៅតាមនីតិវិធីច្បាប់ ក៏ដូចជាវិន័យរបស់កងកម្លាំងដែរ»។
បើទោះជាមានការឃាត់ខ្លួនលោក ហាក់ លី ដើម្បីសួរនាំ ប៉ុន្តែអ្នកនាំពាក្យរូបនេះនៅមិនទាន់អាចបញ្ជាក់បានទេអំពីបទចោទ ដោយលោកថា ត្រូវសួរនាំមន្ត្រីរូបនោះ រួមនឹងអ្នកពាក់ព័ន្ធជាមុនសិន។
លោក សាន សុខសីហា និយាយថា៖ «មិនទាន់ថាមានការចោទពីបទអីនោះទេ បញ្ហាសំខាន់គឺយើងសួរនាំ […] បំពេញបន្ថែម ក៏ដូចជាអធិការពារាំង មេនៅកន្លែងកើតហេតុ ដើម្បីឱ្យយើងដឹងថា តើករណីហ្នឹងវាយ៉ាងម៉េចខ្លះ! អ៊ីចឹងដើមហេតុហ្នឹងវាកើតឡើងយ៉ាងម៉េចខ្លះ!»
បើតាមអ្នកនាំពាក្យរូបនេះ គិតមកដល់ព្រឹកថ្ងៃព្រហស្បតិ៍នេះ លោក ហាក់ លី ស្ថិតនៅក្រោមការសាកសួររបស់ស្នងការដ្ឋាននគរបាលរាជធានីភ្នំពេញនៅឡើយ។
អ្នកស្រី ឡោ សារ៉ុម អាយុ៤៣ឆ្នាំ ដែលជាម្ចាស់ហាងខារ៉ាអូខេនៅខេត្តព្រៃវែង មានប្រសាសន៍ថា ក្រោយកើតហេតុ អ្នកស្រីបានដាក់ពាក្យប្តឹងលោក ហាក់ លី ដែលបានប្រើប្រាស់ហិង្សាទៅលើរូបគាត់។ ប៉ុន្តែអ្នកស្រីថា នៅថ្ងៃទី១៦ ខែកុម្ភៈ លោក ហាក់ លី បានទទួលស្គាល់កំហុស និងបានសុំទោសអ្នកស្រីហើយ ដែលធ្វើឱ្យអ្នកស្រីសម្រេចចិត្តដកពាក្យបណ្តឹងវិញ។
អ្នកស្រីបញ្ជាក់ថា៖ «គាត់[លោក ហាក់ លី]ថា គាត់មកសុំទោសខ្ញុំ ព្រោះអីថា គាត់ដឹងកំហុស គាត់ធ្វើកំហុសធ្វើអ៊ីអញ្ចឹង ដោយសារតែទឹកប្ដូរនិស្ស័យ [គ្រឿងស្រវឹង] ចូលខ្លួន។ គាត់សុំទោសរាល់កំហុសខុសឆ្គងដែលគាត់ធ្វើមកលើខ្ញុំ។ អ៊ីចឹងគាត់សុំទោសខ្ញុំ អ៊ីចឹងខ្ញុំថា បើដឹងកំហុសហើយ ខ្ញុំក៏មិនយកទោសពៃរ៍អីដែរ ទុកគ្នារាប់អាននៅថ្ងៃក្រោយទៅ ហើយរឿងដែលខ្ញុំប្ដឹងគាត់ហ្នឹង ខ្ញុំក៏បានដកពាក្យបណ្ដឹងវិញដែរ ព្រោះអីគាត់ដឹងកំហុសខ្លួនគាត់»។
បើតាមស្រ្តីរូបនេះ ក្រោយពីអ្នកស្រីបានដកពាក្យបណ្តឹងរួច លោក ហាក់ លី ក៏បានដកពាក្យបណ្តឹងដែលប្តឹងកូនរបស់អ្នកស្រី ពីបទ«បរិហារកេរ្តិ៍» ក្រោយពីកូនអ្នកស្រីបានបង្ហោះវីដេអូជុំវិញហេតុការណ៍នោះផងដែរ ហើយក្នុងនោះ ភាគីទាំងពីរក៏បានធ្វើលិខិតជាលាយលក្ខណ៍អក្សរសម្រុះសម្រួលគ្នា កាលពីយប់ថ្ងៃទី១៦ ខែកុម្ភៈនោះ៕