ក្រុមពលរដ្ឋរស់នៅខេត្តកណ្តាល ដែលរងផលប៉ះពាល់ពីគម្រោងអភិវឌ្ឍន៍ព្រលានយន្តហោះអន្តរជាតិថ្មី បានជំរុញជាថ្មីទៀតទៅអាជ្ញាធរខេត្តឱ្យពន្លឿនការដោះស្រាយផលប៉ះពាល់ជូនពួកគេ។
ការជំរុញនេះបានធ្វើឡើងខណៈដែលពលរដ្ឋជាង២០០នាក់មកពីឃុំចំនួន៤ ស្ថិតក្នុងស្រុកកណ្តាលស្ទឹង ខេត្តកណ្តាល និងស្រុកបាទី ខេត្តតាកែវ បានប្រមូលផ្តុំគ្នាតវ៉ាមុខសាលាខេត្តកណ្តាល នៅថ្ងៃទី១៩ ខែកុម្ភៈនេះ ដើម្បីរកអន្តរាគមន៍រឿងដីធ្លីពីអាជ្ញាធរខេត្ត។
លោក ភោគ ផាន់នី ដែលអះអាងថាជាតំណាងពលរដ្ឋនៅឃុំអំពៅព្រៃ ប្រាប់ វីអូឌី នៅកន្លែងតវ៉ាថា ក្រុមរបស់ពួកគាត់តវ៉ាទាមទារដីរួមសហគមន៍មានទំហំ៨៣ហិកតា ដែលពលរដ្ឋត្រូវទទួលបានផលមានចំនួន៤១៤គ្រួសារ។ លោកថា ដីសហគមន៍នេះត្រូវបានក្រុមហ៊ុនអភិវឌ្ឍន៍ព្រលានយន្តហោះអន្តរជាតិភ្នំពេញថ្មី រំលោភយក និងហាមមិនឱ្យអ្នកភូមិចូលទៅអាស្រ័យផលជាច្រើនឆ្នាំមកហើយ។
លោកបន្ថែមថា៖ «ដីនោះជាសហគមន៍ដែលប្រជាពលរដ្ឋគាត់ទុកឃ្វាលគោ ធ្វើស្រែប្រាំង រកត្រីនិងអាស្រ័យផលផ្សេងៗទៀត ប៉ុន្តែឥលូវនេះ វាស្ថិតក្រោមការអភិវឌ្ឍទៅហើយ មិនអាចចូលទៅអាស្រ័យផលបានទៀតទេ។ អ៊ីចឹងយើងមកនេះ យើងសុំឱ្យអាជ្ញាធរខេត្តពន្លឿនក្នុងការដោះស្រាយ ពីព្រោះអាក់ខានចូលអាស្រ័យផលយូរហើយ។ ពលរដ្ឋគាត់មិនទាមទារហួសហេតុទេ សំខាន់អាជ្ញាធរនិងក្រុមហ៊ុនមានចេតនាដោះស្រាយទៅតាមតម្លៃសមរម្យមួយ»។
លោក ទួន វណ្ណៈ ដែលអះអាងថាជាក្រុមពលរដ្ឋប៉ះពាល់ដីមានបណ្ណកម្មសិទ្ធិ នៅឃុំបឹងខ្យាង បាននិយាយថា នៅឃុំនេះមានពលរដ្ឋជាង២០០គ្រួសារដែលរងផលប៉ះពាល់លើគម្រោងអភិវឌ្ឍន៍ព្រលានយន្តហោះថ្មីនេះ ដោយប៉ះពាល់ដីប្រមាណ៤០០ហិកតា។
លោក ទួន វណ្ណៈ បន្តថា កាលដោះស្រាយកន្លងមក ភាគីក្រុមហ៊ុនបានដោះស្រាយជាគោលនយោបាយដោយផ្តល់សំណងចន្លោះពី ៣ដុល្លារ ទៅ ៨ដុល្លារ ក្នុងមួយម៉ែត្រការ៉េ ប៉ុន្តែសំណងនេះ ពួកគាត់ពុំអាចទទួលយកបានទេ។ លោកថា ក្រុមពលរដ្ឋទាមទារសំណងផលប៉ះពាល់ទៅតាមតម្លៃទីផ្សារ ដែលលោកថា ដីតំបន់នោះបច្ចុប្បន្នមានតម្លៃចន្លោះពី ៨០ដុល្លារ ទៅជាង១០០ដុល្លារ ក្នុងមួយម៉ែត្រការ៉េ។
លោកបន្ថែមថា៖ «អ៊ីចឹងសួរថា បើគាត់ឱ្យខ្ញុំប៉ុណ្ណឹង ឱ្យខ្ញុំលក់ទាំងអស់ហ្នឹង ហើយទៅទិញដីនៅណាបានវិញ? អ៊ីចឹងពួកខ្ញុំត្រូវជួបការលំបាកទៅមុខទៀត បើគាត់ឱ្យតម្លៃហ្នឹង។ ពួកខ្ញុំទាមទារតម្លៃទីផ្សារ។ ពួកខ្ញុំមិនជំទាស់នឹងការអភិវឌ្ឍទេ តែសុំឱ្យការអភិវឌ្ឍហ្នឹងធ្វើឱ្យប្រជាពលរដ្ឋគាត់សប្បាយរីករាយផង»។
អភិបាលខេត្តកណ្តាល លោក គង់ សុភ័ណ្ឌ មានប្រសាសន៍ថា លោកទទួលបានសំណើជាច្រើនចំណុចពីក្រុមពលរដ្ឋទាំងនោះ ហើយលោកនឹងយកសំណើរនោះដាក់ជូនក្រសួងរៀបចំដែនដី ក្រសួងសេដ្ឋកិច្ចនិងហិរញ្ញវត្ថុ និងប្រមុខរដ្ឋាភិបាល ដើម្បីពិនិត្យនិងពិចារណាក្នុងការដោះស្រាយជូនពលរដ្ឋ។
លោកបន្ថែមថា៖ «គាត់ [ពលរដ្ឋ] បានសំណូមពរសុំដំឡើងតម្លៃដីគាត់ឱ្យបានច្រើនបន្តិច ឬក៏ដោះដូរនៅជិតៗហ្នឹង ដើម្បីគាត់បានកសាងគ្រួសារគាត់ឱ្យធូរធារបន្ថែមទៀត។ អ៊ីចឹងខ្ញុំទទួលយកសំណូមពរទាំងអស់នេះ។ ហើយពួកគាត់ក៏សប្បាយរីករាយ ដើម្បីឱ្យពាំនាំសំណូមពរនេះជូនថ្នាក់ដឹកនាំក្រសួងស្ថាប័ន និងរាជរដ្ឋាភិបាល ដើម្បីដោះស្រាយ»។
លោក គង់ សុភ័ណ្ឌ មិនទាន់អាចបញ្ជាក់ពីចំនួនប្រជាពលរដ្ឋ និងចំនួនដីដែលរងផលប៉ះពាល់សរុប ក្រោមគម្រោងអភិវឌ្ឍន៍នេះបាននៅឡើយទេ ដោយលោកថា មិនចាំចំនួន។ ប៉ុន្តែលោកថា នៅសល់ដីពលរដ្ឋប្រហែល៤០ភាគរយប៉ុណ្ណោះក្នុងទំហំដីដែលត្រូវអភិវឌ្ឍព្រលានទាំងមូល ដែលមិនទាន់បានដោះស្រាយ។
មន្ត្រីសម្របសម្រួលគម្រោងធុរកិច្ច និងមនុស្ស នៃមជ្ឈមណ្ឌលសិទិ្ធមនុស្សកម្ពុជា លោក វណ្ណ សុផាត មានប្រសាសន៍ថា តាមច្បាប់ជាតិនិងអន្តរាជាតិ គឺរាល់ផលប៉ះពាល់នៃគម្រោងអភិវឌ្ឍន៍នានា រដ្ឋត្រូវដោះស្រាយសំណងជូនពលរដ្ឋឱ្យបានសមរម្យដែលអាចទទួលបានទាំងអស់គ្នា។
ជាមួយគ្នានេះដែរ លោកក៏បានស្នើឱ្យរដ្ឋាភិបាលកំណត់ឱ្យបានច្បាស់អំពីទំហំនៃការផ្តល់សំណងសមរម្យដល់ពលរដ្ឋ និងត្រូវមានការចូលរួមពីប្រជាពលរដ្ឋដែលរងផលប៉ះពាល់ក្នុងតំបន់នីមួយៗ ដើម្បីឱ្យប្រជាពលរដ្ឋដែលរងផលប៉ះពាល់ អាចទទួលយកបានទាំងអស់គ្នា និងគ្មានការរំលោភសិទ្ធិមនុស្ស។
លោកបន្ថែមថា៖ «យើងមានរដ្ឋធម្មនុញ្ញ ច្បាប់ផ្សេងៗទៀត និងគោលការណ៍របស់អង្គការសហប្រជាជាតិ ស្តីអំពីការអភិវឌ្ឍដោយសារការបណ្តេញចេញ សុទ្ធតែបានចែងឱ្យមានការផ្តល់សំណងដោយសមរម្យនិងយុត្តិធម៌ និងអាចទទួលយកបានពីភាគីពាក់ព័ន្ធ។ រដ្ឋាភិបាលមិនផ្តល់បន្តិចបន្តួច បណ្តេញពលរដ្ឋទាំងបង្ខំ អ៊ីចឹងគាត់មិនអាចធ្វើអ៊ីចឹងបានទេ។ បើគាត់ធ្វើអ៊ីចឹង គឺខុសទាំងច្បាប់ជាតិនិងអន្តរជាតិទាំងស្រុងតែម្តង»។
កាលពីថ្ងៃទី៣ ខែមិថុនា ឆ្នាំ២០២០ រដ្ឋាភិបាលបានចេញអនុក្រឹត្យមួយដោយផ្តល់ដីរដ្ឋទំហំប្រហែល២ ៦០០ហិកតា ដែលលាតសន្ធឹងលើស្រុកកណ្តាលស្ទឹង ខេត្តកណ្តាល និងស្រុកបាទី ខេត្តតាកែវ ទៅឱ្យក្រុមហ៊ុនវិនិយោគអាកាសយានដ្ឋានកម្ពុជា វិនិយោគរួមគ្នាជាមួយសាជីវកម្មវិនិយោគក្រៅប្រទេស និងលេខាធិការដ្ឋានអាកាសចរណ៍ស៊ីវិល ដើម្បីអភិវឌ្ឍព្រលានយន្តហោះអន្តរជាតិភ្នំពេញថ្មីមួយនេះ៕
