ប្រជាពលរដ្ឋនៅឃុំចំនួន២ ក្នុងស្រុកស្វាយជ្រំ ខេត្តស្វាយរៀង បារម្ភពីការមិនទទួលបានសំណងក្នុងរឿងវិវាទដីធ្លី ខណៈគ្រឿងចក្រក្រុមហ៊ុនដែលទទួលបានសិទ្ធិលើការអភិវឌ្ឍធារាសាស្ត្ររបស់ក្រសួងធនធានទឹក បានបន្តការឈូសឆាយធ្វើឱ្យប៉ះពាល់ដីស្រែរបស់ពួកគាត់។
ករណីវិវាទដីធ្លីរវាងប្រជាពលរដ្ឋជាង១០០គ្រួសារ នៅឃុំឈើទាល និងឃុំស្វាយធំ ស្រុកស្វាយជ្រុំ និង ក្រសួងធនធានទឹកនិងឧតុនិយម បានកើតឡើងតាំងពីឆ្នាំ២០០៩មក លើដីទំហំប្រមាណ១០០ហិកតា ក្រោយពីក្រសួងមួយនេះមានគម្រោងអភិវឌ្ឍន៍អាងស្តុកទឹកនៅតំបន់នោះ។ នេះបើតាមការបញ្ជាក់របស់ក្រុមប្រជាពលរដ្ឋ។
អ្នកស្រី ប៉ុល ទី អាយុ៦០ឆ្នាំ រស់នៅក្នុងភូមិធ្នង់ ឃុំស្វាយធំ ស្រុកស្វាយជ្រំ ខេត្តស្វាយរៀង បានឱ្យដឹងថា កាលពីសប្តាហ៍មុន ក្រុមហ៊ុនចិនដែលទទួលបានសិទ្ធិលើគម្រោងអភិវឌ្ឍន៍ប្រព័ន្ធធារាសាស្ត្ររបស់ក្រសួងធនធានទឹក បានយកគ្រឿងចក្រចំនួន២គ្រឿងនិងរថយន្តដឹកដីប្រមាណ១០គ្រឿង ទៅឈូសឆាយលើដីរបស់ពួកគាត់ រហូតដល់ពលរដ្ឋផ្ទុះការតវ៉ា ទើបពួកគេបញ្ឈប់ការឈូសឆាយនោះ។
អ្នកស្រីបន្តថា ជារឿយៗ ក្រុមហ៊ុននោះបានយកគ្រឿងចក្រទៅឈូសឆាយប៉ះពាល់ដល់ដីរបស់ប្រជាពលរដ្ឋ ខណៈវិវាទដីធ្លីនេះនៅមិនទាន់មានដំណោះស្រាយនៅឡើយ។
អ្នកស្រីថា៖ «ខ្លាចអស់ដី អស់ដីធ្វើស្រែ តែគេធ្វើអាងទឹក មានដីឯណាធ្វើស្រែ បើមិនទាន់បានសំណង បើគេឱ្យសំណងខ្លះទៅ ខ្ញុំបានទិញដីទុក គ្រាន់ធ្វើស្រែឱ្យកូនស៊ី»។
ស្ត្រីជាកសិករម្នាក់ទៀត រស់នៅឃុំឈើទាល ស្រុកស្វាយជ្រំ អ្នកស្រី ចាន់ សុខន ក៏បានបង្ហាញក្តីបារម្ភពីការបាត់បង់ដីស្រែរបស់ពួកគាត់ នៅពេលឃើញគ្រឿងចក្របន្តឈូសឆាយដី ទាំងដែលប្រជាពលរដ្ឋនៅមិនទាន់ទទួលបានដំណោះស្រាយសមរម្យនៅឡើយ។
អ្នកស្រីនិយាយថា៖ «មានការព្រួយបារម្ភ ព្រោះកន្លែងហ្នឹងកាលមុន យើងអាចប្រកបរបរ បង្កបង្កើនផលបាន និយាយរួមទៅ ប្រៀបដូចឆ្នាំងបាយក្រុមគ្រួសារខ្ញុំមួយដែរ។ ថ្ងៃក្រោយទៅប្រសិនណាពួកគាត់ប្រុងមកយកទទេរៗ អ៊ីចឹងទៅ តើក្រុមគ្រួសារទាំងអស់នៅក្នុងភូមិស្រុក របស់ខ្ញុំបានអី [រកទទួលទាន]»។
តែយ៉ាងណា អភិបាលស្រុកស្វាយជ្រំ លោក ហែម សារិទ្ធ មានប្រសាសន៍ថា រដ្ឋាភិបាលបានសម្រេចរួចហើយលើការផ្តល់សំណងជូនប្រជាពលរដ្ឋដែលរងផលប៉ះពាល់លើគម្រោងអភិវឌ្ឍន៍នេះ។ លោកបន្តថា ចំពោះការយឺតយ៉ាវក្នុងការផ្តល់សំណង ដោយសារតែអាជ្ញាធរនៅមិនទាន់បានបូកសរុបដីរបស់ពលរដ្ឋដែលរងផលប៉ះពាល់អស់នៅឡើយ។
អភិបាលស្រុករូបនេះបន្ថែមទៀតថា ការព្រួយបារម្ភរបស់ប្រជាពលរដ្ឋ កើតឡើងដោយសារតែពួកគេជឿលើមេខ្យល់មួយចំនួន ហើយមិនជឿទុកចិត្តលើរាជរដ្ឋាភិបាល។
លោក ហែម សារិទ្ធ ថ្លែងថា៖ «[ប្រជាពលរដ្ឋ] ចេះតែជឿអ្នកនេះ ជឿអ្នកនោះអ៊ីចឹង! បើជឿរដ្ឋាភិបាល បានយូរហើយ ខាងក្រសួងគេសម្រេចឱ្យហើយ គ្រាន់តែសម្រេចនៅលើក្រដាស គាត់[ពលរដ្ឋ]ដឹងតែបានហើយ»។
វីអូឌី មិនទាន់អាចសុំការអត្ថាធិប្បាយជុំវិញករណីនេះ ពីអ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា និងប្រធានមន្ទីរធនធានទឹក និងឧតុនិយមខេត្តស្វាយរៀង លោក គឹម សាវុធ បាននៅឡើយទេ នៅថ្ងៃសុក្រនេះ។
ប្រធានសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា ការយកគ្រឿងចក្រទៅឈូសឆាយដីរបស់ប្រជាពលរដ្ឋ ខណៈដែលពួកគេនៅមិនទាន់ទទួលបានសំណងនោះ បានបង្កឱ្យពលរដ្ឋមានការព្រួយបារម្ភពីការបាត់បង់ដី។
លោកបន្តថា៖ «វា [ការដាក់គ្រឿងចក្រទៅឈូសឆាយដី] អាចជារូបភាពមួយនៃការដែលប្រជាជនតែងតែលើកឡើងថា ជាការបោកបញ្ឆោតពួកគាត់ ហើយរំលោភយកដីរបស់ពួកគាត់ទៅទទេរៗ ហ្នឹងហើយជាការព្រួយបារម្ភ»។
តែយ៉ាងណា លោក ថេង សាវឿន បានស្នើទៅស្ថាប័នពាក់ព័ន្ធពន្លឿនការដោះស្រាយបញ្ហាដីធ្លីនេះជូនប្រជាពលរដ្ឋឱ្យបានឆាប់ និងគួរដោះស្រាយមុនពេលមានការចុះអនុវត្តគម្រោង ដើម្បីបញ្ចៀសការតវ៉ាពីសំណាក់ប្រជាពលរដ្ឋដែលរងផលប៉ះពាល់ទាំងនោះ៕
