រដ្ឋមន្ត្រីក្រសួងសាធារណការ និងដឹកជញ្ជូន អំពាវនាវដល់ប្រជាពលរដ្ឋឱ្យទៅធ្វើស្លាកលេខឬកាត់ឈ្មោះយានយន្តគ្រប់ប្រភេទដោយខ្លួនឯង ដោយមិនគួរពឹងអ្នករត់ការឬអ្នកគួកជេ នាំឱ្យខាតបង់ថវិកាក្រៅផ្លូវការ ខណៈរដ្ឋាភិបាលបានផ្តល់សេវាសាធារណៈល្អនិងជួយរៀបចំឯកសារជូនប្រជាពលរដ្ឋដោយឥតគិតថ្លៃ។
ក្នុងដំណើរចុះត្រួតពិនិត្យវឌ្ឍនភាពការងារសាងសង់កំណាត់ផ្លូវជាតិលេខ២ និងលេខ២២ នៅព្រឹកថ្ងៃសុក្រនេះ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានថ្លែងប្រាប់ក្រុមអ្នកសារព័ត៌មានថា បច្ចុប្បន្ននេះ ប្រជាពលរដ្ឋមួយចំនួនដែលទៅធ្វើស្លាកលេខម៉ូតូឬរថយន្ត និងផ្ទេរម្ចាស់កម្មសិទ្ធិយានយន្តជាដើម តែងតែទៅរកជួលឈ្មួញកណ្តាលឬអ្នកគួកជេ ឱ្យជួយរៀបចំឯកសារនិងរត់ការឱ្យពួកគាត់ទៅវិញ។
ករណីនេះ លោកបានអំពាវនាវដល់ប្រជាពលរដ្ឋគួរតែទៅធ្វើដោយខ្លួនឯង ដើម្បីកុំឱ្យអស់លុយក្រៅផ្លូវការ ខណៈស្ថាប័នរដ្ឋបានផ្តល់សេវាទាំងនោះបានយ៉ាងល្អប្រសើរជូនប្រជាពលរដ្ឋ។
លោក ស៊ុន ចាន់ថុល ថ្លែងថា៖ «សូមមេត្តាកុំប្រើពួកគួកជេឱ្យសោះ ធ្វើការជំនួសបងប្អូន! យើងមានមណ្ឌល [ធ្វើស្លាកលេខ និងផ្ទេរម្ចាស់កម្មសិទ្ធិយានយន្ត] នៅ [ផ្សារទំនើប] អ៊ីអនទី១ យើងមានមណ្ឌល [នៅផ្សារទំនើប] អ៊ីអនទី២ នៅញ៉ូរ៉លមល។ មួយទៀតនៅក្រសួងយើង យើងកំពុងផ្តល់សេវាសាធារណៈដែលជួយបងប្អូនដោយមិនឱ្យអស់លុយទេ កុំបង់ឱ្យគួកជេអី មកពួកខ្ញុំធ្វើឱ្យទាំងអស់ដោយមិនគិតថ្លៃ ធ្វើឱ្យបង់តាមតែថ្លៃសេវាដែលក្រសួងសេដ្ឋកិច្ចហិរញ្ញវត្ថុឱ្យយក ប៉ុន្តែកម្រៃក្រៅគឺដាច់ខាត[មិនយក]»។
ប្រជាពលរដ្ឋរស់នៅរាជធានីភ្នំពេញ លោក ហេង វ៉ាន់នី និយាយថា នីតិវិធីនៃការធ្វើស្លាកលេខ សម្រាប់ម៉ូតូថ្មី មានភាពងាយស្រួលជាងមុន ដោយសារទិញម៉ូតូភ្លាម អាចធ្វើស្លាកលេខបានភ្លាម ដោយគ្រាន់តែយកសំបុត្រពន្ធម៉ូតូទៅរដ្ឋបាលខណ្ឌ ដោយភ្ជាប់ជាមួយអត្តសញ្ញាណបណ្ណម្ចាស់យានជំនិះ។
ប៉ុន្តែលោកថា នៅពេលដែលលោកទិញម៉ូតូមួយទឹកពីគេ ហើយត្រូវធ្វើស្លាកលេខនោះ គឺមានភាពស្មុគស្មាញច្រើន ដោយសារត្រូវទៅបញ្ជាក់ឯកសារច្រើននៅសាលាសង្កាត់ និងរដ្ឋបាលខណ្ឌជាដើម។ ករណីនេះ លោកថា លោកសុខចិត្តចំណាយថវិកាក្រៅផ្លូវការ ដើម្បីរកអ្នករត់ការជួយធ្វើឱ្យវិញ ដើម្បីចំណេញពេល។
លោក ហេង វ៉ាន់នី និយាយថា៖ «ស៊ីសងយើងនិយាយជាមួយអ្នកគួកជេទៅ យើងឱ្យលុយគេប៉ុន្មាន បើយើងស្រួល គេក៏ស្រួលដែរ […] វាស្រួលទៅមុខទៀត ខ្លាចយើងមិនដឹង ថ្ងៃក្រោយយ៉ាប់ ខាតពេលវេលាយើង ក្រែងលោខុសអ្វីមួយ គេ[ប៉ូលិស]ចាប់ដល់ផ្ទះ»។
ពលរដ្ឋម្នាក់ទៀត លោក ណុប វណ្ណៈ បានលើកឡើងដែរថា លោកមានការលំបាកខ្លះដែរ នៅពេលទៅកាត់ឈ្មោះផ្ទេរកម្មសិទ្ធិយានយន្តដោយខ្លួនឯង ព្រោះត្រូវរត់ឯកសារចុះឡើងច្រើន ដែលធ្វើឱ្យគាត់ខាតពេលវេលាច្រើន។ តែយ៉ាងណា លោកថា បើទោះជាមានការស្មុគស្មាញខ្លះ ក៏លោកសម្រេចចិត្តរៀបចំឯកសារធ្វើដោយខ្លួនឯង ព្រោះមិនចង់ចំណាយថវិកាក្រៅផ្លូវការឱ្យអ្នកផ្សេងរត់ការជំនួស។
លោកនិយាយដូច្នេះថា៖ «ប្តូរឈ្មោះពីផ្លាកលេខគេមកឈ្មោះផ្លាកលេខយើងវិញ យើងយកអត្តសញ្ញាណបណ្ណយើងទៅសាលាខណ្ឌបញ្ជាក់ ហើយនិងមានឯកសាររបស់ឡានចាស់ហ្នឹងយកមកប្រថាប់ត្រានៅសង្កាត់ ពេលវេលាយើងជិះទៅមកៗ សាលាខណ្ឌផង សាលាសង្កាត់ផង មកកន្លែងយើងនៅផង ហើយត្រូវជិះទៅខាងឈៀករថយន្ត បំពេញឯកសារចប់ត្រូវយកឱ្យគេ បានគេណាត់ថ្ងៃយើង ថ្ងៃណាបានស្លាកលេខ បានយើងយកឡានយើងទៅដូរយកស្លាកលេខថ្មី»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ គាំទ្រនឹងការលើកឡើងរបស់រដ្ឋមន្ត្រីក្រសួងសាធារណការ និងដឹកជញ្ជូន ដែលមិនចង់ឱ្យពលរដ្ឋទៅរកសេវាខាងក្រៅ ដែលនាំឱ្យអស់ថវិកាក្រៅផ្លូវការនោះ។ ប៉ុន្តែលោកជំរុញទៅក្រសួងបង្កើតការិយាល័យសម្រាប់ឱ្យពលរដ្ឋទៅពិគ្រោះយោបល់នៅតាមស្ថាប័នពាក់ព័ន្ធនៃការចុះបញ្ជី ឬធ្វើស្លាកលេខ ឬកាត់ ឬផ្ទេរឈ្មោះម្ចាស់យានយន្តឬម៉ូតូ ទើបមានប្រសិទ្ធភាពខ្ពស់។
លោកមានប្រសាសន៍ថា៖ «វិធីលុបបំបាត់ឬណែនាំពលរដ្ឋមិនឱ្យពលរដ្ឋទៅរកអ្នកគួកជេ ទាល់តែក្រសួងសាធារណការ និងដឹកជញ្ជូន បង្កើតឱ្យមានការិយាល័យប្រជាពលរដ្ឋនៅតាមការិយាល័យឬទីកន្លែងសម្រាប់ចុះបញ្ជីយានយន្ត ហើយទីកន្លែងត្រួតពិនិត្យបច្ចេកទេសយានយន្ត បើពុំដូច្នោះទេ ពលរដ្ឋដែលខ្វះព័ត៌មាន ខ្វះអ្នកពិគ្រោះយោបល់ គាត់នឹងទៅរកអ្នកគួកជេមិនខាន»។
រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល ក៏បានបញ្ជាក់ដែរថា លេខពិសេសដែលក្រសួងបានចេញលក់ចាប់ពីថ្ងៃទី៧ ខែមករា ឆ្នាំ២០២០ រហូតមកដល់ថ្ងៃទី១៩ ខែកុម្ភៈ ឆ្នាំ២០២១នេះ គឺលក់បានជាង៣ ៧០០ផ្លាកលេខ ដែលមានទឹកប្រាក់សរុបប្រហែល ៨ ០០០ ០០០ ដុល្លារ ជាចូលថវិកាជាតិ ខណៈលេខពិសេសធម្មតា ក៏លក់បានប្រហែលជា ៨ ០០០ ០០០ ដុល្លារអាមេរិកផងដែរ។
តាមរបាយការណ៍ដែលចេញដោយមន្ទីរសាធារណការ និងដឹកជញ្ជូនរាជធានីភ្នំពេញ កាលពីថ្ងៃទី១៤ ខែកមរា ឆ្នាំ២០២០ បានបង្ហាញថា បច្ចុប្បន្ននេះកំណើននៃចំនួនយានយន្តបានកើនឡើងយ៉ាងគំហុក រហូតដល់ ២ ៤៧៤ ៤៦៥គ្រឿង ក្នុងនោះ រថយន្តមានចំនួន ៥០៨ ១៤៣គ្រឿង និងទោចក្រយានយន្តមានចំនួន ១ ៩៦៦ ៣២២គ្រឿង ដែលកំពុងតែធ្វើចរាចរណ៍ជាប្រចាំ៕