អាជ្ញាធរព្រមានចាត់វិធានការចំពោះអ្នកដែលបានចាក់ដីរំលោភលើឆ្នេរសមុទ្រ ស្ថិតនៅក្នុងស្រុកគិរីសាគរ ខេត្តកោះកុង បន្ទាប់ពីករណីចាក់ដីលុបឆ្នេរមួយកន្លែងត្រូវបានផ្សព្វផ្សាយតាមបណ្តាញសង្គម។
កាលពីថ្ងៃទី២១ ខែកុម្ភៈ ឆ្នាំ២០២១ គណនេយ្យហ្វេសប៊ុកមួយឈ្មោះ Srey Chamroeun បានផ្សព្វផ្សាយរូបភាព និងសរសេរថា មានករណីចាក់ដីលុបឆ្នេរសមុទ្រជាច្រើនហិកតា នៅចំណុច«ពយតាឃុន» ស្ថិតក្នុងភូមិព្រែកខ្សាច់ ឃុំព្រែកខ្សាច់ ស្រុកគិរីសាគរ ខេត្តកោះកុង និងមានការកាប់ទន្ទ្រានយកដីកោងកាងជាច្រើនហិកតាផងដែរ។
អភិបាលរងខេត្តកោះកុង លោក សុខ សុទ្ធី ទទួលស្គាល់ថា ពិតជាមានការចាក់ដីប៉ះពាល់ដល់ឆ្នេរសមុទ្រពិតមែន ហើយពុំមានច្បាប់អនុញ្ញាតឡើយ។ លោកបន្តថា ដីដែលបានចាក់ប៉ះពាល់ដល់ឆ្នេរសមុទ្រនោះ គឺប្រវែងប្រហែល៦០០ម៉ែត្រ។
អភិបាលរងខេត្តរូបនេះឱ្យដឹងថា នៅសប្តាហ៍ក្រោយ រដ្ឋបាលខេត្តកោះកុងនឹងជួបជាមួយអាជ្ញាធរមូលដ្ឋាននិងភាគីពាក់ព័ន្ធ ដើម្បីដោះស្រាយថា ត្រូវមានវិធានការច្បាប់ឬដាក់ពិន័យយ៉ាងណានោះ។
លោកបន្ថែមថា៖ «ករណីគាត់ចាក់ដីជាប់មាត់សមុទ្រហ្នឹង អាហ្នឹងគឺខុសច្បាប់។ ហើយរដ្ឋបាលខេត្តនឹងហៅភាគីពាក់ព័ន្ធទាំងអស់មកប្រជុំនៅនៅថ្ងៃចន្ទក្រោយ ដើម្បីរកដំណោះស្រាយ។ តាមពិត ដីហ្នឹងជាដីអនុញ្ញាតឱ្យគាត់ប្រើប្រាស់ទេ ប៉ុន្តែដោយសារតែអត់ទាន់មានការកាត់ឆ្វៀល គាត់ចាក់ហ្នឹង អត់សុំច្បាប់។ អ៊ីចឹងយើងនឹងដាក់ពិន័យគាត់ ក្រោយកិច្ចប្រជុំនៅសប្តាហ៍ក្រោយហ្នឹង»។
ចំពោះការកាប់ព្រៃកោងកាងទន្ទ្រានយកដីវិញ លោក សុខ សុទ្ធី អះអាងថា រឿងនេះបានកើតឡើងតាំងពីកន្លះឆ្នាំមុន។
លោកថា ករណីនេះ រដ្ឋបាលខេត្តបានរាយការណ៍ជូនក្រសួងបរិស្ថានរួចហើយ និងពុំមានការកាប់រានទៀតឡើយ ប៉ុន្តែលោកមិនបញ្ជាក់ឈ្មោះអ្នកចាក់ដី និងអ្នកកាប់រានព្រៃកោងកាងនោះឡើយ។
ពលរដ្ឋម្នាក់នៅភូមិព្រែកខ្សាច់ អ្នកស្រី ព្រាប រដ្ឋា បានដាក់ការសង្ស័យថា អ្នកដែលហ៊ានចាក់ដីលុបសមុទ្រ និងកាប់ព្រៃកោងកាងដើម្បីទន្ទ្រានយកដីនោះ ជាបុគ្គលមានលុយមានអំណាចច្រើនជាងពលរដ្ឋធម្មតា។
អ្នកស្រីបន្ថែមថា៖ «អារឿងបំផ្លាញសម្បត្តិធម្មជាតិហ្នឹង គ្មានប្រជាពលរដ្ឋធម្មតាណាគាត់ហ៊ានធ្វើទេ។ បើមេឃុំមិនហ៊ានធ្វើអីគេផង ព្រោះកន្លងមក ប្រជាពលរដ្ឋធ្លាប់ប្តឹងរឿងហ្នឹងទៅមេឃុំឱ្យអន្តរាគមន៍លើរឿងហ្នឹងដែរ ក្រោយមកក៏ស្ងាត់ទៅវិញ»។
មេឃុំព្រៃខ្សាច់ លោក រាម សារុំ ឱ្យដឹងថា អ្នកដែលរងការចោទថា បានចាក់ដីរំលោភលើឆ្នេរសមុទ្រនោះ ឈ្មោះ ឈឹន ចាន់ឌី ជាពលរដ្ឋនៅក្នុងឃុំ។ លោកបន្តថា ករណីអ្នកស្រី ឈឹន ចាន់ឌី ធ្វើសកម្មភាពចាក់ដីនោះ គឺមិនបានជូនដំណឹងមុនដល់អាជ្ញាធរឃុំនោះទេ។
មេឃុំរូបនេះបន្តថា ក្រោយអាជ្ញាធរពាក់ព័ន្ធចុះទៅផ្អាកសកម្មភាពមិនឱ្យចាក់ដី កាលពីថ្ងៃទី៧ ខែកុម្ភៈ អ្នកស្រី ឈឹន ចាន់ឌី បានទទួលកំហុសហើយ។
លោកបន្ថែមថា៖ «រឿងហ្នឹងយើងបានធ្វើកិច្ចសន្យាដែរ។ យើងឱ្យគាត់ឈប់ធ្វើបន្តទៀត។ ហើយប្រាប់ឱ្យគាត់មុនធ្វើអី ត្រូវជូនដំណឹងនិងសហការជាមួយអាជ្ញាធរជាមុនសិន ត្រូវមានច្បាប់ត្រឹមត្រូវ [ថា]តើគេតម្រូវឱ្យយើងចាក់បានពីចម្ងាយណាមកចម្ងាយណា! គាត់ហ៊ានចាក់ហ្នឹង ដោយសារគាត់មានលិខិតបញ្ជាក់ការកាន់កាប់ដីពីអាជ្ញាធរភូមិឃុំចាស់ អត់មានពាក់ព័ន្ធដល់ខ្ញុំទេ។ បើខ្ញុំដឹង ខ្ញុំនឹងប្រាប់គាត់ថា ដីចំណីសមុទ្រប៉ុន្មាន ដីដែលគាត់អាចប្រើប្រាស់ប៉ុន្មាន»។
វីអូឌី មិនអាចសុំការបញ្ជាក់ពីអ្នកស្រី ឈឹន ចាន់ឌី ដែលរងការចោទប្រកាន់ថាបានចាក់ដីលុបសមុទ្របានទេ ពាក់ព័ន្ធករណីនេះ។
មន្ត្រីឃ្លាំមើលការរំលោភសិទ្ធិមនុស្សនៅអង្គការលីកាដូប្រចាំខេត្តកោះកុង លោក ប៉ែន វុទ្ធា មានប្រសាសន៍ថា កន្លងមក ជនខិលខូចលួចចាក់ដីលុបសមុទ្រចំនួន២ទៅ៣ករណីដែរ ប៉ុន្តែអាជ្ញាធរមិនចាត់វិធានការផ្លូវច្បាប់តឹងរ៉ឹងនោះទេ។ លោកថា អ្នកដែលហ៊ានរំលោភយកដីសមុទ្រនោះភាពច្រើនជាអ្នកមានលុយមានអំណាច។
លោកបន្ថែមថា៖ «អាជ្ញាធរគួរតែចាត់វិធានការចំពោះករណីលុបឆ្នេរនេះឱ្យមានប្រសិទ្ធភាព ដើម្បីជាការព្រមានមួយដល់អ្នកមានអំណាច និងពលរដ្ឋផ្សេងៗទៀតដែលមានបំណងចង់រំលោភយកដីឆ្នេរសាធារណៈរបស់រដ្ឋធ្វើជាកម្មសិទ្ធិហ្នឹង [ឱ្យ]មានភាពរាងចាល ឱ្យដឹងថា ប្រទេសយើងមានច្បាប់ ហើយអនុវត្តមានភាពស្មើគ្នា»៕