ក្រសួងប្រៃសណីយ៍ និងទូរគមនាគមន៍ បានឱ្យដឹងថា គិតត្រឹមរសៀលថ្ងៃនេះ មានគ្រឹះស្ថានសាធារណៈនិងឯកជន ភោជនីយដ្ឋាន សណ្ឋាគារ និងរោងចក្រ ចំនួន១០ ៣៦៦កន្លែង បានចុះឈ្មោះបង្កើត QR Code ដើម្បីចូលរួមទប់ស្កាត់ការរីករាលដាលនៃជំងឺកូវីដ១៩។
ប្រព័ន្ធបច្ចេកវិទ្យា QR Code «ទប់ស្កាត់ជំងឺកូវីដ-១៩ ឬ Stop Covid» ត្រូវបានដាក់ឱ្យដំណើរការកាលពីថ្ងៃទី២០ ខែកុម្ភៈ បន្ទាប់ពីកម្ពុជាបានប្រកាសពីការផ្ទុះឡើងជាលើកទី២ នូវករណីឆ្លងជំងឺកូវីដ១៩ នៅក្នុងសហគមន៍។ ក្រសួងប្រៃសណីយ៍ អះអាងថា QR Code នេះ នឹងជួយបង្ការនិងទប់ស្កាត់ហានិភ័យនៃការរីករាលដាលជំងឺកូវីដ១៩ នៅក្នុងសហគមន៍ ដោយថា តាមរយៈប្រព័ន្ធនេះ សាធារណជនអាចស្កេននៅពេលចូលទីតាំងដែលមានមនុស្សចេញ-ចូលច្រើន ហើយអាចទទួលបានដំណឹងឆាប់រហ័ស ប្រសិនបើទីតាំងនោះមានករណីឆ្លង។
លោក មាស ប៉ូ អ្នកនាំពាក្យក្រសួងប្រៃសណីយ៍ និងទូរគមនាគមន៍ បានប្រាប់ វីអូឌី នៅថ្ងៃនេះថា លោកមានការជឿជាក់ខ្លាំងចំពោះការដាក់ឱ្យប្រើប្រាស់ QR Code នេះ ព្រោះមានចំនួនទីតាំងជាច្រើនដែលបានប្រើប្រាស់តាំងពីថ្ងៃដំបូង។
ទោះយ៉ាងណាក៏ដោយ អ្នកនាំពាក្យរូបនេះបានបញ្ជាក់ថា ក្រសួងពាក់ព័ន្ធមិនទាន់មានចែងបទប្បញ្ញត្តិណាមួយសម្រាប់ដែលដាក់ទោសទណ្ឌទៅលើទីតាំងដែលមិនមានប្រើប្រាស់ QR Code នេះ នៅឡើយទេ។
លោក មាស ប៉ូ បានបញ្ជាក់ថា៖ «យើងមិនមានចែង មិនទាន់មានបទប្បញ្ញត្តិណាមួយទេ គ្រាន់តែយើងផ្សព្វផ្សាយដើម្បីទប់ស្កាត់ទាំងអស់គ្នា យើងត្រូវតែប្រើប្រាស់ QR Code ហ្នឹង ដើម្បីដឹងអំពីដំណើររបស់បុគ្គលមួយៗ តើគាត់អញ្ជើញទៅណាមកណា! បើសិនជាគាត់មានជំងឺហ្នឹង យើងអាចដឹង យើងអាចងាយស្រួលនៅក្នុងការតាមរកគាត់»។
លោក នុត ប៊ុណ្ណារ័ត្ន ទីប្រឹក្សាផ្នែកលក់នៅក្រុមហ៊ុន តូយ៉ូតា សាខាទួលសង្កែ បានប្រាប់ថា ក្រុមហ៊ុន តូយ៉ូតា បានចាប់ផ្តើមដាក់ប្រព័ន្ធ QR Code នាព្រឹកមិញនេះ ។ ទោះបីជាក្រុមហ៊ុន តូយ៉ូតា ទើបតែចាប់ផ្តើមដាក់ប្រព័ន្ធនេះក៏ដោយ ប៉ុន្តែលោក នុត ប៊ុណ្ណារ័ត្ន បានបញ្ជាក់ថា ពីមុនមក ក្រុមហ៊ុនក៏បានកត់ឈ្មោះ ក៏ដូចជាលេខទូរសព្ទរបស់អតិថិជនផងដែរ។
លោក នុត ប៊ុណ្ណារ័ត្ន៖ «ទាក់ទងជាមួយ QR Code ហ្នឹង ចាប់ដំណើរការពីថ្ងៃហ្នឹងទៅ [២២ កុម្ភៈ ២០២១] ពួកខ្ញុំចាប់ដំណើរការពីថ្ងៃហ្នឹងទៅ ប៉ុន្តែពីមុនមក គឺខ្ញុំ [ក្រុមហ៊ុន] ស្រង់ឈ្មោះភ្ញៀវ ក៏ដូចជាយកលេខទូរសព្ទរបស់ភ្ញៀវដែលគាត់ចូលមក Show Room [បន្ទប់បង្ហាញ] របស់ខ្ញុំ [ក្រុមហ៊ុន]។»
លោកបានបន្ថែមថា៖ «សម្រាប់អ្នកប្រើប្រាស់ ឱ្យតែភ្ញៀវចូល គឺខ្ញុំអញ្ជើញគាត់ស្កេនហើយ អ៊ីចឹងសម្រាប់ព្រឹកនេះមានភ្ញៀវគាត់ចូលទាក់ទងជាមួយខាងសេវាកម្ម ក៏គួរសមដែរ។ អ៊ីចឹង និយាយទៅទាំងអស់បង [អ្នកស្កេន QR Code] ព្រោះអាហ្នឹងដើម្បីឱ្យទាក់ទងនឹងកូវីដហ្នឹងអ៊ីចឹងណា អ៊ីចឹងយើងតម្រូវឱ្យគាត់ស្កេនអាហ្នឹងទាំងអស់»៕
