នាយករដ្ឋមន្ត្រីកម្ពុជា នៅថ្ងៃនេះ បានស្នើដល់ពលរដ្ឋដែលរស់នៅរាជធានីភ្នំពេញ កុំចេញពីផ្ទះបើមិនមានការចាំបាច់ ដើម្បីឱ្យអាជ្ញាធរងាយស្រួលក្នុងការស្វែងរកអ្នកដែលពាក់ព័ន្ធនឹងព្រឹត្តិការណ៍សហគមន៍២០កុម្ភៈ។
ការអំពាវនាវរបស់លោកនាយករដ្ឋមន្ត្រី ហ៊ុន សែន ធ្វើឡើងស្របពេលដែលករណីអ្នកមានកូវីដ១៩ក្នុងសហគមន៍ កើនដល់៧៦នាក់ក្នុងរយៈពេលតែ៣ថ្ងៃប៉ុណ្ណោះ។
ក្នុងសារដែលត្រូវបានចែកចាយក្នុងបណ្តាញតេលេក្រាមនៅថ្ងៃនេះ លោកនាយករដ្ឋមន្ត្រី បានលើកឡើងថា ថ្វីត្បិតតែអាជ្ញាធរបានដឹងពីចំណុចដែលករណីកូវីដ១៩ផ្ទុះឡើងយ៉ាងណាក្តី ប៉ុន្តែអ្វីដែលមានការស្មុគស្មាញនោះ គឺការចល័តរបស់អ្នកដែលពាក់ព័ន្ធទាំងនោះថាបានទៅទីណាខ្លះ។
លោកថា៖ «សូមឱ្យប្រជាជននៅទីក្រុងភ្នំពេញ មានការប្រុងប្រយ័ត្ន ហើយសូមបញ្ជាក់ បើគ្មានការចាំបាច់ កុំចេញពីផ្ទះ ព្រោះឥលូវយើងកំពុងស្រាវជ្រាវរក ពិតមែនយើងដឹងចំណុចក្លឹប N8 និងកន្លែងរស់នៅមួយចំនួន និងតំបន់មួយចំនួន ត្រូវបានបិទហើយ ប៉ុន្តែចរាចរណ៍មនុស្សមួយចំនួននៅក្នុងតំបន់នោះ តើទៅកន្លែងណាខ្លះ! យើងកំពុងរុករក អ៊ីចឹងបើសិនសម្រាកនៅផ្ទះបានក៏ល្អ»។
ក្រោយការផ្ទុះជាលើកទី២ នៃករណីឆ្លងក្នុងសហគមន៍នេះ រដ្ឋាភិបាលក៏បានចាត់វិធានការណ៍ភ្លាមៗ ដោយបិទជាបណ្តោះអាសន្ននូវសាលារៀន និងទីតាំងអាជីវកម្មនានាប្រមាណជាង៤០កន្លែង នៅរាជធានីភ្នំពេញ និងខេត្តកណ្តាល។
អភិបាលរាជធានីភ្នំពេញ លោក ឃួង ស្រេង មានប្រសាសន៍ថា ទីតាំងដែលត្រូវបិទបណ្ដោះអាសន្ន មានចំនួន៣៩កន្លែង។ លោកបន្តថា អ្នកពាក់ព័ន្ធក្នុងព្រឹត្តការណ៍«សហគមន៍ ២០កុម្ភៈ»នេះ មួយចំនួនត្រូវបានដាក់ឱ្យធ្វើចត្តាឡីស័កនៅទីតាំងដែលក្រសួងនិងអាជ្ញាធររៀបចំ។
លោកថា៖ «មានអ្នកធ្វើចត្តាឡីស័កនៅមន្ទីរពេទ្យចាក់អង្រែ និងទីតាំងផ្សេងទៀតដែលយើងរៀបចំ ប៉ុន្តែអ្នកមួយចំនួនទៀតធ្វើចត្តាឡីស័កនៅផ្ទះ ដោយសារ តាមបច្ចេកទេសរបស់ក្រសួងសុខាភិបាល គាត់មិនជួបដោយផ្ទាល់អ៊ីចឹង»។
លោកបានបន្ថែមថា អ្នកធ្វើចត្តាឡីស័កដែលមិនមានលទ្ធភាព នឹងទទួលបានប្រាក់ឧបត្ថម្ភពីរដ្ឋាភិបាល ខណៈអ្នកដែលមានលទ្ធភាពស្នាក់នៅសណ្ឋាគារហើយ ត្រូវចេញការចំណាយដោយខ្លួនឯង។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា ឱ្យដឹងថា គិតត្រឹមថ្ងៃនេះ សាលារៀនឯកជននិងរដ្ឋដែលត្រូវបិទមានចំនួន៧កន្លែង ក្នុងនោះ នៅរាជធានីភ្នំពេញ ៤កន្លែង និងខេត្តកណ្ដាល ៣កន្លែង ប៉ុន្តែសម្រាប់ចំនួនសិស្ស លោកថា មិនទាន់មានទិន្នន័យទេ។
លោកបន្តថា សិស្សនៅក្នុងសាលាទាំង៧កន្លែង ត្រូវបានដាក់ឱ្យធ្វើចត្តាឡីស័កទៅតាមសេចក្ដីណែនាំរបស់ក្រសួងសុខាភិបាល ប៉ុន្តែចំនួនសិស្សសរុបនិងអ្នកត្រូវយកសំណាកទៅធ្វើតេស្តវិញ លោកថា មិនទាន់មានទិន្នន័យនៅឡើយ។
លោកបន្ថែមថា៖ «ករណីដែលមានអ្នកប៉ះពាល់ដោយផ្ទាល់កំពុងទទួលការយកសំណាកពីក្រុមការងារក្រសួងសុខាភិបាល ហើយអ្នកដែលប៉ះពាល់ប្រយោលអនុវត្តទៅតាមសេចក្ដីណែនាំរបស់ក្រសួងសុខាភិបាល»។
ក្រសួងសុខាភិបាលនៅថ្ងៃនេះ ក៏បានអំពាវនាវជាថ្មីឱ្យពលរដ្ឋដែលចេញចូលទីតាំងដែលពាក់ព័ន្ធនឹងព្រឹត្តិកាណ៍«សហគមន៍២០កុម្ភៈ» និងអ្នកដែលប៉ះពាល់ជាមួយអ្នកជំងឺ ត្រូវទៅធ្វើតេស្តនៅមណ្ឌលសុខភាព ចាក់អង្រែ ដោយមិនត្រូវលាក់លៀមឡើយ ហើយត្រូវដាក់ខ្លួនឱ្យនៅដាច់ដោយឡែកពីក្រុមគ្រួសារ ធ្វើចត្តាឡីស័ក១៤ថ្ងៃ ព្រមទាំងធ្វើការតាមដានសុខភាពរបស់ខ្លួនជាប្រចាំ។
គិតត្រឹមព្រឹកថ្ងៃទី២២ ខែកុម្ភៈនេះ កម្ពុជារកឃើញអ្នកមានកូវីដ១៩ ចំនួន៥៦៨នាក់ ដែលក្នុងនោះព្យាបាលជាសះស្បើយ ៤៧៥នាក់ និងកំពុងសម្រាកព្យាបាលមាន៨៣នាក់៕