អាជ្ញាធរខេត្តជាប់ព្រំដែនថៃ និងវៀតណាម បានចាប់ខ្លួនមេខ្យល់ជាង៨០នាក់ដែលនាំពលរដ្ឋខ្មែរឆ្លងដែនខុសច្បាប់ ដោយគេចពីការធ្វើចត្តាឡីស័ក ក្រោយរដ្ឋាភិបាលកម្ពុជាបង្កើនការរឹតបន្តឹងលំហូរពលករពីប្រទេសជិតខាង ដើម្បីទប់ស្កាត់ការនាំចូលជំងឺកូវីដ១៩ពីក្រៅប្រទេស។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ប្រាប់ វីអូឌី ឱ្យដឹងនៅថ្ងៃនេះថា គិតចាប់ពីថ្ងៃទី១៣ ខែកុម្ភៈ មកដល់ថ្ងៃទី២៣ ខែកុម្ភៈ ឆ្នាំ២០២១ អាជ្ញាធរតាមព្រំដែនបានចាប់ខ្លួនមេខ្យល់នាំពលករឆ្លងដែនខុសច្បាប់ ដោយគេចពីការធ្វើចត្តាឡីស័កពីប្រទេសថៃនិងវៀតណាម បានចំនួន៨៥នាក់ ក្នុងនោះពីវៀតណាមមានតិចជាង១០នាក់។
លោកបន្ថែមថា បច្ចុប្បន្ន សមត្ថកិច្ចមិនទាន់អាចស្រាវជ្រាវដឹងថា មេខ្យល់ទាំងនោះធ្លាប់បាននាំមនុស្សឆ្លងដែនប៉ុន្មាននាក់នៅឡើយ។
លោក ឆាយ គឹមខឿន មានប្រសាសន៍ថា៖ «ខ្ញុំក៏មិនអាចស្រាវជ្រាវដឹងថា គាត់ធ្លាប់នាំពលករបានប៉ុន្មាននាក់ដែរ គឺយើងចាប់ជាក់ស្តែង ត្រង់កន្លងមក គាត់ធ្លាប់នាំប៉ុន្មាននាក់ៗ យើងមិនទាន់ស្រាវជ្រាវរកឃើញទេ»។
អភិបាលរងខេត្តបន្ទាយមានជ័យ លោក លី សារី ឱ្យដឹងថា អាជ្ញាធរខេត្តបានចាប់បញ្ជូនមេខ្យល់រត់ពន្ធមនុស្សឆ្លងដែនខុសច្បាប់ទៅតុលាការ ដើម្បីអនុវត្តតាមនីតិវិធីថ្មី និងបានចុះស្រាវជ្រាវចាប់ខ្លួនបានជាបន្តបន្ទាប់ទៀត។
លោកថា ការនាំពលករឆ្លងដែនចុះច្បាប់នៅតែបន្តកើតមាន និងពិបាកក្នុងការទប់ស្កាត់ដោយសារខ្សែបន្ទាត់ព្រំដែនគោកកម្ពុជានិងថៃ ក្នុងខេត្តបន្ទាយមានជ័យ មានប្រវែងវែងដល់១៥៥គីឡូម៉ែត្រ ខណៈពលរដ្ឋដែលភាគច្រើនក្រីក្រ ខ្វះចំណេះដឹង និងមិនទទួលព័ត៌មានគ្រប់គ្រាន់ មិនស្តាប់ការអំពាវនាវនិងការចុះអប់រំរបស់អាជ្ញាធរមូលដ្ឋាន ហើយជឿតាមការអូសទាញរបស់មេខ្យល់។
លោកបន្ថែមថា មេខ្យល់ទាំងនោះប្រើគ្រប់រូបភាពក្នុងការនាំមនុស្សឆ្លងព្រំដែនពីកម្ពុជាទៅថៃ និងពីថៃមកកម្ពុជា ដើម្បីគេចពីភ្នែកសមត្ថកិច្ចដែលបានដាក់ពង្រាយនិងយាមកាម២៤ម៉ោងតាមច្រករបៀង ដើម្បីបង្កើនការទប់ស្កាត់បទល្មើសរត់ពន្ធមនុស្សឆ្លងដែនខុសច្បាប់។
លោក លី សារី មានប្រសាសន៍ថា៖ «មេខ្យល់ វាចាប់ផ្តើមមើល [បើ]យើងរាងឆកល្វែងបន្តិចហ្នឹង វាប្រិចប្រូចនាំមកចេញតែម្តង។ នេះជាភាពជាក់ស្តែង តែក្នុងនោះក៏យើងរឹតបន្តឹង ចាប់បានជនខិលខូចមួយចំនួនយកទៅផ្តន្ទាទោសដែរ»។
អភិបាលរងខេត្តបាត់ដំបង លោក សឿម ប៊ុនរិទ្ធី ឱ្យដឹងថា អាជ្ញាធរក្នុងខេត្តនេះបានចាប់ខ្លួនមេខ្យល់ចំនួន៩នាក់ ក្រោមការអនុវត្តវិធានការម៉ឺងម៉ាត់របស់សមត្ថកិច្ច ដែលបានដាក់ពង្រាយតាមច្រកព្រំដែនជាមួយប្រទេសថៃ តាមការណែនាំរបស់លោកនាយករដ្ឋមន្ត្រី ហ៊ុន សែន។
លោកថា ពលករខ្មែរដែលចាញ់បោកមេខ្យល់ឆ្លងដែនខុសច្បាប់ ពួកគេខ្លះវិលត្រឡប់មកវិញដោយសារនឹកស្រុក ខ្លះមានធុរៈត្រូវត្រឡប់មកវិញ ហើយខ្លះសម្រេចធ្វើចំណាកស្រុកទៅប្រទេសថៃដើម្បីទៅរកការងារធ្វើ ដោយមិនចាំបាច់ឆ្លងកាត់ការធ្វើចត្តាឡីស័កតាមការអូសទាញរបស់មេខ្យល់។
លោក សឿម ប៊ុនរិទ្ធី មានប្រសាសន៍ថា៖ «ខ្លះគេនាំពលករពីខ្មែរទៅធ្វើការនៅថៃ ខ្លះគេនាំពលករពីថៃមកខ្មែរ គេចមិនព្រមធ្វើចត្តាឡីស័ក។ គេធានាថា មកតាមគាត់ទៅ គឺគាត់នឹងជួយទៅដល់សហគមន៍គាត់ ទៅរស់នៅដោយមិនបាច់ធ្វើចត្តាឡីស័ក។ ប៉ុន្តែទោះយ៉ាងណា នៅក្នុងក្របខណ្ឌខេត្តបាត់ដំបង គឺគេចអត់ផុតទេ»។
អភិបាលរងខេត្តកោះកុង លោក សុខ សុទ្ធី បានប្រាប់ឱ្យដឹងថា អាជ្ញាធរខេត្តបានចាប់ខ្លួនមេខ្យល់ចំនួន៣នាក់ គិតចាប់ពីដើមឆ្នាំ២០២១មក ដោយពួកគេបាននាំពលករឆ្លងដែនដោយខុសច្បាប់ពីប្រទេសថៃ ឆ្លងចូលមកកម្ពុជា តាមខ្សែបន្ទាត់ព្រំដែនខេត្តកោះកុង មានពី២នាក់ដល់១៥នាក់។
មន្ត្រីកម្មវិធីផ្នែកទេសន្តរប្រវេសន៍នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក ឌី ថេហូយ៉ា សាទរចំពោះលទ្ធផលនៃកិច្ចខិតខំប្រឹងប្រែងរបស់សមត្ថកិច្ចតាមបណ្តាខេត្តជាប់ព្រំដែន ក្នុងការចុះស្រាវជ្រាវនិងចាប់ខ្លួនមេខ្យល់រត់ពន្ធមនុស្សឆ្លងដែនខុសច្បាប់នេះ។
ប៉ុន្តែលោកថា វិធានការទាំងនេះ គួរតែអនុវត្តឡើងគ្រប់ពេល និងរកឱ្យឃើញជនជាប់ពាក់ព័ន្ធឬសមគំនិត និងមិនចាំបាច់ទាល់តែមានបញ្ជាពីនាយករដ្ឋមន្ត្រីឬថ្នាក់ដឹកនាំជាន់ខ្ពស់នោះទេ។
លោក ឌី ថេហូយ៉ា មានប្រសាសន៍ថា៖ «ទាល់តែប្រសាសន៍របស់សម្តេចអញ្ចឹងទៅ បានឃើញឈូឆរមួយឆាវអញ្ចឹងទៅ អញ្ចឹងមានន័យថា ការគ្រប់គ្រងប្រទេសនេះ បើក្រៅពីសម្តេចស្រែកហ្នឹង គឺអត់សូវចាប់អារម្មណ៍ចាត់វិធានការអីទេ មានន័យថា បណ្តែតបណ្តោយឱ្យរឿងរ៉ាវហ្នឹងវាកើតដដែលជាដដែលអញ្ចឹង»។
លោកនាយករដ្ឋមន្ត្រី ហ៊ុន សែន កាលពីអំឡុងខែធ្នូ និងដើមឆ្នាំ២០២១នេះ បញ្ជាជាបន្តបន្ទាប់ទៅអាជ្ញាធរខេត្តនិងកងកម្លាំងនៅតាមព្រំដែនទាំងអស់ ត្រូវទប់ស្កាត់ការលួចឆ្លងដែនខុសច្បាប់របស់ពលករនិងពលរដ្ឋខ្មែរឱ្យបានម៉ត់ចត់ ដើម្បីទប់ស្កាត់ការឆ្លងចូលនូវជំងឺកូវីដ១៩ពីក្រៅប្រទេស។
ដោយឡែក កាលពីថ្ងៃទី១៥ ខែកុម្ភៈ ឆ្នាំ២០២១ លោកនាយករដ្ឋមន្ត្រី ហ៊ុន សែន បានព្រមានថា នឹងបណ្តេញមន្ត្រីកងកម្លាំងនគរបាលណាដែលជាប់ពាក់ព័ន្ធនឹងការរត់ពន្ធមនុស្សឆ្លងដែនដោយខុសច្បាប់នេះ ចេញពីជួរកងកម្លាំងតែម្តង។
ក្រោយពីការព្រមានរបស់នាយករដ្ឋមន្ត្រីតែប៉ុន្មានម៉ោងប៉ុណ្ណោះ សមត្ថកិច្ចខេត្តបាត់ដំបងបានរកឃើញអតីតអធិការនគរបាលស្រុកកំរៀងម្នាក់ ឈ្មោះ គឹម ពន្លក ថាបានជាប់ពាក់ព័ន្ធនឹងការដោះលែងមេខ្យល់ដែលលួចនាំពលករឆ្លងដែនខុសច្បាប់ ដោយគេចពីការធ្វើចត្តាឡីស័ក។ នៅថ្ងៃទី១៦ ខែកុម្ភៈ ឆ្នាំ២០២១ អតីតមន្ត្រីនគរបាលរូបនោះត្រូវបានសមត្ថកិច្ចបញ្ជូនសំណុំរឿងទៅសាលាដំបូងខេត្ត ហើយតុលាការបានសម្រេចចោទពីបទ «ការនាំយកចេញដោយមិនស្របច្បាប់សម្រាប់នាំឆ្លងដែន» និងបានបញ្ជូនទៅឃុំខ្លួនភ្លាមៗនៅឯពន្ធនាគារខេត្តបាត់ដំបង៕
