ក្រសួងការងារ និងបណ្ដុះបណ្ដាលវិជ្ជាជីវៈ ប្រកាសផ្អាកការពិនិត្យកាយសម្បទាកម្មករនិយោជិតដោយផ្ទាល់ ចាប់ពីថ្ងៃនេះរហូតដល់មានការជូនដំណឹងជាថ្មី ដើម្បីចូលរួមទប់ស្កាត់ការរីករាលដាលជំងឺកូវីដ១៩ នៅតាមរោងចក្រសហគ្រាសក្នុងអំឡុងព្រឹត្តិការណ៍សហគមន៍២០កុម្ភៈ។
យោងតាមសេចក្តីជូនដំណឹងរបស់ក្រសួងកាលពីថ្ងៃម្សិលមិញ បានលើកឡើងថា ការសម្រេចផ្អាកការពិនិត្យកាយសម្បទាដោយផ្ទាល់នៅនាយកដ្ឋានពេទ្យការងារនេះ ធ្វើឡើងដើម្បីទប់ស្កាត់ការឆ្លងរាលដាលជំងឺកូវីដ១៩ក្នុងសហគមន៍។
តែយ៉ាងណា ក្រសួងបញ្ជាក់ថា ម្ចាស់ឬនាយករោងចក្រសហគ្រាស និងកម្មករនិយោជិតទាំងអស់ អាចទៅពិនិត្យសុខភាពនៅតាមមូលដ្ឋានសុខាភិបាលដៃគូរបស់នាយកដ្ឋានពេទ្យការងារ រួចស្នើសុំការបញ្ជាក់វិញ្ញាបនបត្រពិនិត្យកាយសម្បទាពីនាយកដ្ឋានពេទ្យការងារ តាមប្រព័ន្ធស្វ័យប្រវត្តិកម្ម តាមរយ:គេហទំព័រ lacms.mlvt.gov.kh។
បើតាមរបាយការណ៍របស់ក្រសួងសុខាភិបាល គិតមកដល់ព្រឹកថ្ងៃទី២៤ ខែកុម្ភៈ ឆ្នាំ២០២១នេះ ក្រសួងបានរកឃើញអ្នកឆ្លងជំងឺកូវីដ១៩ សរុបចំនួន៦៣៣នាក់ ក្នុងនោះ អ្នកជាសះស្បើយមាន៤៧៦នាក់ និងអ្នកកំពុងព្យាបាល១៤២នាក់៕