មន្ត្រីការទូតកម្ពុជា ស្នើឯកអគ្គរដ្ឋទូតនៃប្រទេសហ្វីលីពីនជួយជំរុញបន្ថែមទៅវិនិយោគិនហ្វីលីពីន ឱ្យមកវិនិយោគវិស័យស្រូវអង្ករនៅកម្ពុជា។
ការស្នើនេះបានធ្វើឡើងនៅក្នុងជំនួបពិភាក្សាការងាររវាងរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា លោក ប្រាក់ សុខុន ជាមួយលោកស្រី Maria Amelita C. Aquino ឯកអគ្គរដ្ឋទូតថ្មីនៃសាធារណរដ្ឋហ្វីលីពីនប្រចាំព្រះរាជាណាចក្រកម្ពុជា កាលពីថ្ងៃទី២៣ ខែកុម្ភៈ ឆ្នាំ២០២១ នៅទីស្តីការក្រសួងការបរទេស។
យោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ឱ្យដឹងថា ក្នុងជំនួបពិភាក្សានោះ ភាគីទាំងពីរបានកត់សម្គាល់លើវិស័យសេដ្ឋកិច្ចថា ទំហំពាណិជ្ជកម្មទ្វេភាគីមានការកើនឡើងពីមួយឆ្នាំទៅមួយឆ្នាំ ប៉ុន្តែទំហំរបស់វានៅមានកម្រិតតិចតួចនៅឡើយ បើប្រៀបធៀបជាមួយសក្តានុពលនៃប្រទេសទាំងពីរ។
ករណីនេះ ភាគីទាំងពីរបានឯកភាពគ្នាជំរុញកិច្ចចរចា ដើម្បីឈានទៅដល់ការបញ្ចប់សេចក្តីព្រាងនៃកិច្ចព្រមព្រៀងស្តីពីការចៀសវាងការយកពន្ធត្រួតគ្នា (Agreement on the Avoidance of Double Taxation) ឱ្យបានឆាប់ ក្នុងគោលបំណងពង្រីកទំហំពាណិជ្ជកម្មនិងវិនិយោគបន្ថែមទៀត។
សេចក្តីប្រកាសព័ត៌មានបន្ថែមថា ពាក់ព័ន្ធនឹងបញ្ហានេះ រដ្ឋមន្ត្រីក្រសួងការបរទេសកម្ពុជា បានស្នើឯកអគ្គរដ្ឋទូត ជំរុញវិនិយោគិនហ្វីលីពីនមកវិនិយោគទុនលើឃ្លាំងស្តុកស្រូវអង្ករនិងម៉ាស៊ីនកិនស្រូវនៅកម្ពុជា ដើម្បីនាំអង្ករចេញទៅប្រទេសហ្វីលីពីន។
បើតាមសេចក្តីប្រកាសព័ត៌មាន ប្រទេសទាំងពីរក៏ត្រៀមរៀបចំកិច្ចប្រជុំគណៈកម្មការចម្រុះសម្រាប់កិច្ចសហប្រតិបត្តិការទ្វេភាគីលើកទី៣ ដែលនឹងប្រព្រឹត្តទៅនៅកម្ពុជានៅឆ្នាំនេះ ដើម្បី ពង្រឹងនិងពង្រីកកិច្ចសហប្រតិបត្តិការលើគ្រប់វិស័យរវាងប្រទេសទាំងពីរផងដែរ៕
