មន្ត្រីជាន់ខ្ពស់ក្រសួងសុខាភិបាល ឱ្យដឹងថា សមត្ថកិច្ចកំពុងស្វែងរកជនបរទេសចំនួន២នាក់ ដែលគេចខ្លួនមិនព្រមទៅព្យាបាល បន្ទាប់ពីធ្វើតេស្តរកឃើញលទ្ធផលវិជ្ជមានវីរុសកូវីដ១៩។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន ប្រាប់ វីអូឌី នៅថ្ងៃនេះថា ជនបរទេសទាំងពីរនាក់ ជាស្ត្រីជនជាតិវៀតណាមម្នាក់ និងបុរសជនជាតិចិនម្នាក់ ដែលអ្នកទាំង២បានទៅធ្វើតេស្តវិជ្ជមានកូវីដ១៩ កាលពីថ្ងៃទី២៤ ខែកុម្ភៈ ឆ្នាំ២០២១។ លោកស្រីបញ្ជាក់ថា បច្ចុប្បន្ន សមត្ថកិច្ចកំពុងរុករកអ្នកជំងឺទាំង២នាក់នោះ ខណៈអាសយដ្ឋានដែលពួកគេដាក់មកមិនជាក់លាក់។
លោកថា៖ «អត់ដឹង បើដឹងរកឃើញបាត់ហើយ មកពីមិនដឹងហ្នឹង។ គាត់ដាក់តែភ្នំពេញៗ អាសយដ្ឋានអ៊ីចឹង [គាត់ដាក់អាសយដ្ឋាន] កុហក គេរកមិនឃើញ មិនដឹងគាត់ទៅកន្លែងណា [ឥលូវ]អាជ្ញាធរកំពុងរកហើយ»។
អ្នកនាំពាក្យស្នងការនគរបាលរាជធានីភ្នំពេញ លោក សាន សុខសីហា មានប្រសាសន៍ថា លោកមិនទាន់បានទទួលព័ត៌មាននេះឡើយ។
លោកថា៖ «ដូចខ្ញុំបានប្រាប់អ៊ីចឹង ព័ត៌មានខ្លះយើងមិនទាន់ទទួលបាន ឬក៏ម៉េចអ៊ីចឹង បានឱ្យសួរទៅក្រសួងសុខាភិបាលបានច្បាស់ រកបាន រកឃើញម៉េច គាត់ដឹងបាន ព្រោះធម្មតារាល់ព័ត៌មានទាំងអស់ទាក់ទងបញ្ហាហ្នឹង អ្នកនាំពាក្យក្រសួងសុខាភិបាល គាត់ដឹងទាំងអស់»។
វីអូឌី មិនអាចសុំការបញ្ជាក់បន្ថែមពីអភិបាលរាជធានីភ្នំពេញ លោក ឃួង ស្រេង និងស្នងការនគរបាលរាជធានីភ្នំពេញ លោក ស ថេត បានទេ។
ប៉ុន្តែលោក ស ថេត បានសរសេរក្នុងទំព័រហ្វេសប៊ុករបស់លោក ដោយបញ្ជាទៅកម្លាំងប្រចាំការតាមគោលដៅព្យាបាលនិងគោលដៅកំពុងធ្វើចត្តាឡីស័ក ជាពិសេសកងកម្លាំងទាំងអស់ត្រូវអនុវត្តឱ្យបានម៉ឺងម៉ាត់តាមបទបញ្ជារបស់ថ្នាក់ដឹកនាំ ដើម្បីរក្សាការពារសន្តិសុខនិងសណ្តាប់ធ្នាប់តាមទីតាំងទាំងនោះឱ្យបានល្អ និងត្រូវតែចូលរួមបង្ការនិងទប់ស្កាត់ការឆ្លងរាលដាលវីរុសកូវីដ១៩។
លោកបន្ថែមថា ក្នុងករណី បើមានអ្នកអុកឡុកឬបង្កបញ្ហាមិនស្តាប់តាមការណែនាំរបស់គ្រូពេទ្យ សមត្ថកិច្ចនឹងចាត់វិធានការតាមច្បាប់ ហើយចំពោះជនបរទេសដែលបង្កបញ្ហា នឹងចាប់បញ្ជូនទៅអគ្គនាយកដ្ឋានអន្តោប្រវេសន៍ ដោយសុំគោលការណ៍ថ្នាក់ដឹកនាំបណ្តេញចេញពីប្រទេសកម្ពុជា។
លិខិតរបស់ទីស្ដីការគណៈរដ្ឋមន្ត្រី ចេញកាលពីថ្ងៃទី២៥ ខែកុម្ភៈ ដែលចុះហត្ថលេខាដោយ លោក កែន សត្ថា ឱ្យដឹងថា រដ្ឋាភិបាលសម្រេចឱ្យអនុវត្តច្បាប់ចំពោះបុគ្គលដែលមិនអនុវត្តទៅតាមវិធានការសុខាភិបាលចំពោះការធ្វើចត្តាឡីស័ក បុគ្គលគេចវេះមិនព្រមចូលសម្រាកព្យាបាល ឬមិនសហការផ្ដល់ការសម្ភាស និងទីតាំងដែលមិនសហការផ្ដល់ព័ត៌មានការស្រាវជ្រាវ និងទប់ស្កាត់នៃការរីករាលដាលជំងឺកូវីដ១៩ បន្ថែមពីអនុក្រឹត្យ ស្តីពី វិធានការចត្តាឡីស័កដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
លិខិតរបស់ទីស្តីការគណៈរដ្ឋមន្ត្រី បន្តថា ដើម្បីពង្រឹងប្រសិទ្ធភាពការងារទប់ស្កាត់ការរីករាលដាលនៃជំងឺកូវីដ១៩ក្នុងសហគមន៍ រដ្ឋាភិបាលអនុញ្ញាតឱ្យអនុវត្តនូវវិធានការច្បាប់បន្ថែមទៀតចំពោះបុគ្គលនិងទីតាំងដែលមិនសហការ ក្នុងនោះ ចំពោះជនបរទេសត្រូវបណ្ដេញចេញពីប្រទេសកម្ពុជា និងហាមចូលប្រទេសសារជាថ្មី។ ចំពោះជនជាតិខ្មែរ ត្រូវចាត់វិធានការតាមផ្លូវច្បាប់ ហើយចំពោះទីតាំងវិញ ត្រូវដកហូតអាជ្ញាបណ្ណនិងបិទអាជីវកម្មក្នុងទីតាំងតែម្ដង។
ប្រធានមជ្ឈមណ្ឌលប្រជាពលរដ្ឋខ្មែរ ដើម្បីអភិវឌ្ឍន៍ និងសន្តិភាព លោក យង់ គឹមអេង ចាត់ទុកការស្វែងរកជនបរទេសមិនឃើញថាជាហានិភ័យសម្រាប់កម្ពុជា។ លោកបន្តថា អាជ្ញាធរគួរតែធ្វើការផ្សព្វផ្សាយឬបង្ហាញអត្តសញ្ញាណជនបរទេសទាំងពីរនាក់ ដើម្បីឱ្យប្រជាពលរដ្ឋបានដឹង។
លោកថា៖ «ជាចំណុចខ្វះចន្លោះរបស់អាជ្ញាធរ ដែលយើងមានអាសយដ្ឋាន លេខទំទាក់ទំនងក្នុងការផ្ដល់ព័ត៌មានជូនគាត់ នេះជាបញ្ហាមួយសំខាន់។ នេះជារឿងមួយដែលអាចមានផលលំបាកសម្រាប់អ្នកដែលវិជ្ជមានហើយយើងរកមិនឃើញ គឺមានបញ្ហាធំហើយ»។
បើតាមក្រសួងសុខាភិបាល គិតចាប់តាំងពីថ្ងៃទី២០ ខែកុម្ភៈ ឆ្នាំ២០២១ អ្នកឆ្លងជំងឺកូវីដ១៩ ក្នុងព្រឹត្តិការណ៍២០កុម្ភៈ មានចំនួន២៣៤នាក់ហើយ។ ដោយឡែក ចំពោះចំនួនអ្នកឆ្លងជំងឺនេះសរុបនៅកម្ពុជាវិញ ក្រសួងថា គិតត្រឹមព្រឹកថ្ងៃទី២៦ ខែកុម្ភៈ ឆ្នាំ២០២១នេះ មានចំនួន៧៤១នាក់ ក្នុងនោះ អ្នកជាសះស្បើយ ចំនួន៤៧៧នាក់ និងកំពុងសម្រាកព្យាបាលនៅមន្ទីរពេទ្យ ចំនួន២៦២នាក់៕