រដ្ឋាភិបាលជប៉ុន ផ្តល់ថវិកា២,៩លានដុល្លារអាមេរិកបន្ថែមទៀតដល់គណៈកម្មការទន្លេមេគង្គ (MRC) ដើម្បីគាំទ្រដល់ការអនុវត្តផែនការយុទ្ធសាស្ត្រថ្មីរបស់ខ្លួន សំដៅលើកកម្ពស់ការងារតាមដាននិងព្យាករកម្រិតទឹកទន្លេមេគង្គ។
យោងតាមសេចក្តីប្រកាសព័ត៌មានរបស់ MRC នៅថ្ងៃទី២៦ ខែកុម្ភៈ ឆ្នាំ២០២១នេះ បានឱ្យដឹងថា ការផ្ដល់ជំនួយបន្ថែមរបស់ជប៉ុនដល់ MRC នេះ ធ្វើឡើងសម្រាប់រយៈពេល៤ឆ្នាំ ដោយគិតចាប់ពីឆ្នាំ២០២១ ដល់ឆ្នាំ២០២៤ ដោយរពឹងថា ថវិកានេះនឹងជួយបង្កើនសមត្ថភាពតាមដាននិងវាយតម្លៃបរិស្ថានទន្លេ និងសម្របទៅនឹងការប្រែប្រួលជាទូទៅរបស់ MRC និងប្រទេសជាសមាជិករបស់ខ្លួន រួមមាន ប្រទេសកម្ពុជា ឡាវ ថៃ និងវៀតណាម។
នាយកប្រតិបត្តិនៃលេខាធិការដ្ឋាន MRC លោកបណ្ឌិត អាន ពេជ្រហត្ថដា បានគូសបញ្ជាក់ក្នុងពិធីចុះហត្ថលេខាដែលបានប្រារព្ធនៅទីស្នាក់ការកណ្តាលនៃលេខាធិការដ្ឋាន MRC ក្នុងទីក្រុងវៀងចន្ទ នៅថ្ងៃនេះថា ថវិកាជំនួយថ្មីនេះ គឺផ្តល់ចំកន្លែងស្នូលនៃបញ្ហាដែលតំបន់ជួបប្រទះ ហើយរំពឹងថានឹងត្រូវប្រឈមនាពេលអនាគត។
សេចក្តីប្រកាសព័ត៌មានបញ្ជាក់ថា ជំនួយថ្មីទាំងនេះគឺជាជំនួយបន្ថែមលើថវិកា៣,៩លានដុល្លារអាមេរិក ដែលប្រទេសជប៉ុនបានផ្តល់ដល់ MRC កាលពីឆ្នាំមុន ដើម្បីធ្វើឱ្យប្រសើរឡើងនូវប្រព័ន្ធព្យាករណ៍ទឹកជំនន់និងភាពរាំងស្ងួត។
MRC បន្តថា កន្លងមក ជប៉ុនបានផ្តល់ថវិកាជំនួយជាង២១លានដុល្លារអាមេរិក ដើម្បីគាំទ្រដល់ការគ្រប់គ្រងទឹកជំនន់និងគ្រោះរាំងស្ងួត ប្រព័ន្ធធារាសាស្ត្រ ការប្រែប្រួលអាកាសធាតុ និងការគ្រប់គ្រងបរិស្ថាន។
សេចក្តីប្រកាសព័ត៌មានបានស្រង់ប្រសាសន៍ឯកអគ្គរដ្ឋទូតជប៉ុនប្រចាំនៅប្រទេសឡាវ លោក កៃហ្សូ តាកេវាកា (Keizo Takewaka) ក្នុងពិធីចុះហត្ថលេខានោះថា ថវិកាបន្ថែមនេះនឹងជួយបង្កើនសមត្ថភាពរបស់ MRC ក្នុងការផ្តល់ឱ្យសាធារណជននិងប្រទេសជាសមាជិករបស់ខ្លួននូវសេវាកម្មតាមដាននិងព្យាករណ៍ទឹកទន្លេឱ្យបានកាន់តែសុក្រឹត និងមានប្រសិទ្ធភាពខ្ពស់ជាងមុន។
បើតាម MRC ទន្លេមេគង្គ និងដៃទន្លេនេះ បានផ្តល់របរចិញ្ចឹមជីវិត សន្តិសុខស្បៀង និងសេវាប្រព័ន្ធអេកូឡូស៊ីដ៏សម្បូរបែបដល់ប្រជាជនប្រមាណ៧០លាននាក់ដែលរស់នៅតាមដងទន្លេមេគង្គក្រោម ខណៈបញ្ហាលំហូរទឹកទាបនៅដងទន្លេមេគង្គក្រោម កាលពីឆ្នាំ២០១៩ និងឆ្នាំ២០២០ បានធ្វើឱ្យបណ្តាប្រទេសតាមដងទន្លេមេគង្គក្រោមទាំងអស់ រងផលប៉ះពាល់ជាច្រើន ដែលក្នុងនោះជីវភាពរស់នៅរបស់ប្រជាជនត្រូវបានរំខាន៕