ក្រុមមន្ត្រីនៃមន្ទីររៀបចំដែនដីនៅខេត្តប៉ៃលិន ស្នើទៅរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដោះដូរតួនាទីប្រធានមន្ទីរ និងអនុប្រធានមន្ទីរទទួលបន្ទុកសុរិយោដីខេត្ត ដោយចោទថា អ្នកទាំង២នាក់នោះគ្មានសមត្ថភាពដឹកនាំ និងក្លែងបន្លំឯកសារសាធារណៈ។
ក្នុងលិខិតមួយដាក់ទៅក្រសួងរៀបចំដែនដី កាលពីថ្ងៃទី៨ ខែកុម្ភៈ ឆ្នាំ២០២១ ដែល វីអូឌី ទើបទទួលបាននៅថ្ងៃនេះ តំណាងមន្ត្រីរាជការ នៃមន្ទីររៀបចំដែនដីខេត្តប៉ៃលិន ចំនួន៩នាក់ បានរៀបរាប់ថា ពួកគេមិនពេញចិត្តនឹងការដឹកនាំរបស់ប្រធានមន្ទីររៀបចំដែនដីខេត្ត លោក សូ សុខុន និងអនុប្រធានមន្ទីរទទួលបន្ទុកសុរិយោដី លោក កែវ សុវត្ថិ នោះទេ ដោយសារពួកគេពុំមានជំនាញលើកិច្ចការសុរិយោដី និងធ្វើការងារប្រកាន់បក្ខពួកនិយម ខ្វះការចូលរួមមតិ មានការរើសអើង និងប្រើប្រាស់ថវិការដ្ឋមិនចំគោលដៅ ជាដើម។
អនុប្រធានការិយាល័យរៀបចំដែនដី នគរូបនីយកម្ម និងសំណង់ និងភូមិបាល នៅស្រុកសាលាក្រៅ លោក នួន ប៊ុនថុល ដែលចូលរួមផ្តិតមេដៃឱ្យមានការដោះដូរតួនាទីថ្នាក់ដឹកនាំមន្ទីររៀបចំដែនដីខេត្តនោះដែរ ប្រាប់ វីអូឌី នៅថ្ងៃសុក្រនេះថា អ្វីដែលធ្វើឱ្យមន្ត្រីក្រោមឱវាទមិនពេញចិត្តនិងមិនទុកចិត្តលើប្រធាននិងអនុប្រធានមន្ទីរទាំងពីររូបនោះ ដោយសារតែពួកគាត់តែងតែគប់គិតគ្នាចេញបណ្ណខុសប្រក្រតីជូនពលរដ្ឋ និងបានគប់គិតគ្នាប្រព្រឹត្តអំពើពុករលួយ ជាដើម។
លោកបន្ថែមថា៖ «ដោយសារតែទង្វើពួកគាត់ធ្វើខុសច្រើនហ្នឹងហើយ បានជំរុញឱ្យមន្ត្រីក្រោមឱវាទ ឱ្យគាត់ផុសផុលផ្តិតមេដៃតវ៉ាហ្នឹង ដើម្បីអី? គឺមិនចង់ឱ្យវាខុសធ្ងន់ទៅៗ ហើយក៏មិនចង់ឱ្យមន្ត្រីក្រោមឱវាទហ្នឹងទៅរងគ្រោះ រងសម្ពាធ ដោយសារតែថ្នាក់ដឹកនាំបន្សល់ទុកឱ្យហ្នឹងទេ។ ហើយអ្នកដែលរងគ្រោះជាងគេគឺពលរដ្ឋហ្នឹងឯង ដោយសារគាត់ទទួលបានដីទទួលបានបណ្ណមិនត្រឹមត្រូវ»។
ប្រធានមន្ទីររៀបចំដែនដី នគរូបនីយកម្ម និងសំណង់ខេត្តប៉ៃលិន លោក សូ សុខុន និងអនុប្រធានមន្ទីរទទួលបន្ទុកសុរិយោដី លោក កែវ សុវត្ថិ មិនអាចសុំការឆ្លើយតបចំពោះការលើកឡើងនេះបានទេ ដោយទូរសព្ទចូលគ្មានអ្នកទទួល។
កាលពីថ្ងៃទី៨ ខែកុម្ភៈ ឆ្នាំ២០២១ អគ្គនាយករដ្ឋបាល នៃក្រសួងរៀបចំដែនដី បានស្នើសុំយោបល់ពីលោក ជា សុផារ៉ា ដើម្បីចុះពិនិត្យនិងស៊ើបអង្កេតទៅលើថ្នាក់ដឹកនាំមន្ទីររៀបចំដែនដីខេត្តប៉ៃលិន ដែលកំពុងរងបណ្តឹងនេះ។
វីអូឌី មិនអាចសុំការឆ្លើយតបពីរដ្ឋមន្ត្រី លោក ជា សុផារ៉ា និងលោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ បានទេ នៅថ្ងៃនេះ។
ពាក់ព័ន្ធករណីនេះ នាយករងអង្គការការពារសិទ្ធិមនុស្សលីកាដូ លោក អំ សំអាត បានស្នើឱ្យក្រសួងរៀបចំដែនដី និងអាជ្ញាធរពាក់ព័ន្ធ ត្រូវបង្កើតគណៈកម្មការស៊ើបអង្កេតទៅលើករណីនេះឱ្យច្បាស់លាស់។ លោកថា ប្រសិនបើរកឃើញថាមានការជាប់ពាក់ព័ន្ធដូចការលើកឡើងរបស់មន្ត្រីថ្នាក់ក្រោមមែន ក្រសួងគួរចាត់វិធានការតាមផ្លូវច្បាប់។
លោកបន្ថែមថា៖ «រដ្ឋាភិបាលត្រូវតែអនុវត្តផ្លូវច្បាប់ ជាពិសេសតាមអនុសាសន៍របស់ប្រមុខរដ្ឋាភិបាលទៅលើការអនុវត្តអភិក្រមទាំង៥។ ប្រសិនរកឃើញមន្ត្រីណាដែលគាត់ចូលចំណុចណាមួយ ត្រូវយកអភិក្រមទាំង៥ហ្នឹងមកអនុវត្តពីលើច្បាប់ទៀត ដើម្បីធ្វើយ៉ាងម៉េចឱ្យមន្ត្រីហ្នឹងគឺជាអ្នកបម្រើរាស្ត្រ ជាអ្នកផ្តល់សេវាឱ្យរាស្ត្រ ឱ្យបានត្រឹមត្រូវ ដើម្បីចៀសផុតពីអំពើពុករលួយ បក្ខពួកនិយម និងភាពមិនប្រក្រតីផ្សេងៗទៀត»។
បើតាមលោក អំ សំអាត កន្លងមក រដ្ឋាភិបាលធ្លាប់ចាត់វិធានការផ្លូវច្បាប់ទៅលើប្រធានមន្ទីររៀបចំដែនដី នគរូបនីយកម្ម និងសំណង់ នៅតាមបណ្តាខេត្តមួយចំនួនផងដែរ ក្រោយមានបណ្តឹង និងស៊ើបអង្កេតរកឃើញមានកំហុស។
កាលពីថ្ងៃទី៣១ ខែកក្កដា ឆ្នាំ២០១៩ សាលាដំបូងរាជធានីភ្នំពេញ បានសម្រេចឃុំខ្លួនប្រធាន និងមន្ត្រីមន្ទីររៀបចំដែនដីខេត្តពោធិ៍សាត់ ចំនួន៣នាក់ផ្សេងទៀត នៅពន្ធនាគារព្រៃស ជាបណ្តោះអាសន្ន ដោយចោទចំនួន៣បទល្មើស រួមមាន បទវិតិក្រមតាមក្រមព្រហ្មទណ្ឌ បទរំលោភអំណាច និងបទសម្អាតប្រាក់៕
