អធិការខណ្ឌឬស្សីកែវ បានឱ្យដឹងថា កម្លាំងចម្រុះនៃគណៈបញ្ជាការឯកភាពខណ្ឌបានចុះបង្ក្រាប ដកហូតយកអាជ្ញាប័ណ្ណ និងបិទអាជីវកម្មទេសចរណ៍ ខារ៉ាអូខេ «អាត់ជួង» និងខារ៉ាអូខេ «រីករាយ២» ដោយថា បើកដំណើរការអំឡុងពេលឆ្លងរាលដាលមេរោគកូវីដ១៩។
អធិការនគរបាលខណ្ឌឬស្សីកែវ លោក ហ៊ាង ថារ៉េត ប្រាប់វីអូឌីនៅថ្ងៃនេះថា កម្លាំងចម្រុះ នៃគណៈបញ្ជាការឯកភាពខណ្ឌឫស្សីកែវ បានចុះបង្ក្រាបទីតាំងអាជីវកម្មទេសចរណ៍ ខារ៉ាអូខេ «អាត់ជួង» និងខារ៉ាអូខេ «រីករាយ២» ដែលប្រែក្លាយទៅជាភោជនីយដ្ឋាន ហើយលួចបើកដំណើរការកំឡុងពេលនៃការរាតត្បាតជំងឺកូវីដ១៩ (ព្រឹត្តការណ៍ សហគមន៍ ២០កុម្ភៈ) ស្ថិតនៅភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ កាលពីថ្ងៃ២៦ ខែកុម្ភៈម្សិលមិញ វេលាម៉ោង១០៖០០នាទីយប់ ។
ចំណែក នៅក្នុងកំណត់ហេតុរបស់ក្រុមចម្រុះគណៈបញ្ជាការឯកភាពខណ្ឌឬស្សីកែវ រវាងម្ចាស់អាជីវកម្ម កាល ពីម្សិលមិញ បានឱ្យដឹងថា ម្ចាស់អាជីវកម្មពិតជាបើកដំណើរការជាភោជនីយដ្ឋានប្រែក្លាយពីខារ៉ាអូខេ ក្នុងកំឡុងពេលវិបត្តិកូវីដ ក្នុងសហគមន៍២០កុម្ភៈ ឆ្នាំ២០២១ ប្រាកដមែន។ ករណីនេះ គណៈបញ្ជាការឯកភាពខណ្ឌសម្រេចដកហូតអាជ្ញាប័ណ្ណ និងបិទអាជីវកម្មចាប់ពីថ្ងៃ២៦ខែកុម្ភៈតទៅ។
ដោយឡែក ព័ត៌មានលម្អិតទាក់ទងនឹងមូលហេតុនាំឱ្យដកអាជ្ញាប័ណ្ណនោះ លោក ថារ៉េត ឱ្យទៅសួរអភិបាលខណ្ឌឬស្សីកែវវិញ។
វីអូឌីមិនអាចសុំការបំភ្លឺពីអភិបាលខណ្ឌឬស្សីកែវ លោក ជា ពិសី បានទេនៅថ្ងៃនេះ។
តំណាងម្ចាស់អាជីវកម្ម ខារ៉ាអូខេ «អាត់ជួង» លោក រ៉ុម ប៊ុនធឿន មានប្រសាសន៍ថា កាលពីម្សិលមិញ ហាងរបស់គាត់បើកបានតែ២កញ្ចុះ ឱ្យភ្ញៀវ៤ទៅ៥នាក់ អង្គុយញាំអីនៅទីនោះមែន ប៉ុន្តែលោកថា ពួកគាត់មិនបានបើកខារ៉ាអូខេ (KTV) នោះទេ។
លោកថា អាជ្ញាធរខណ្ឌចុះបិទ និងដកហូតអាជ្ញាប័ណ្ណបែបនេះ នឹងធ្វើឱ្យប៉ះពាល់ដល់បុគ្គលិកជិត៣០នាក់គ្មានការងារធ្វើ ហើយគ្មានប្រាក់ទ្រទ្រង់ជីវភាពជាដើម។
លោកមានប្រសាសន៍ថា៖ «ប៉ះពាល់ដល់បងប្អូនបុគ្គលិកដែលគាត់មកពីខេត្តឆ្ងាយធ្វើការ គាត់សង្ឃឹមកន្លែងទីតាំងយើង ក្រែងរកលុយបានថ្លៃបង់បន្ទប់ជួលខ្លះ ថ្លែងហុបចុកខ្លះ ឥឡូវចប់ហើយគ្មារកប្រាក់អ្វីបានទៀតទេ គេបិទនិងដកហូតអាជ្ញាប័ណ្ណ»។
វីអូឌី មិនអាចសុំការបំភ្លឺពីម្ចាស់អាជីវកម្មខារ៉ាអូខេ «រីករាយ២» លោក ភឿន សីហា បានទេនៅថ្ងៃនេះ។
តំណាងម្ចាស់អាជីវកម្ម ខារ៉ាអូខេ «អាត់ជួង» លោក រ៉ុម ប៊ុនធឿន បញ្ជាក់ថា នៅក្នុងហាងអាជីវកម្មទេសចរណ៍ ខារ៉ាអូខេ «អាត់ជួង» ដែលប្រែក្លាយទៅជាភោជនីយដ្ឋានកំឡុងពេលឆ្លងរាលដាលជំងឺកូវីដ មានកញ្ចុះទទួលភ្ញៀវហូបចុក និងផឹកស៊ី មានចំនួន៨កញ្ចុះ និងមានបន្ទប់ខារ៉ាអូខេ (KTV) ចំនួន២០បន្ទប់ផងដែរ។
សារជាសំឡេងដែលលោកនាយករដ្ឋមន្ត្រី ហ៊ុន សែន ផ្សព្វផ្សាយនៅយប់ថ្ងៃចន្ទទី២២ ខែកុម្ភៈ ឆ្នាំ២០២១ បញ្ជាក់ថា ការឆ្លងរាលដាលនៅក្នុងសហគមន៍ព្រឹត្តិការណ៍២០កុម្ភៈ មានលក្ខណៈធ្ងន់ធ្ងរជាងព្រឹតិ្តការណ៍«៣វិច្ឆិកា» និង «២៨វិច្ឆិកា» ឆ្នាំ២០២១។ ករណីនេះ លោកប្រកាសឱ្យបិទសាលារៀន ក្លឹបកំសាន្ត ភោជនីយដ្ឋាន ផ្សារទំនើប កោះពេជ្យ និងទីតាំងមួយចំនួនទៀតដែលពាក់ព័ន្ធនឹងព្រឹត្តិការ២០កុម្ភៈ ឆ្នាំ២០២១ មានប្រហែលជា៤០ទីតាំង។ នេះបើយោងតាមរបាយការណ៍នាយកដ្ឋានប្រយុទ្ធប្រឆាំងនឹងជំងឺឆ្លង។
បើតាមក្រសួងសុខាភិបាល គិតត្រឹមព្រឹកថ្ងៃទី២៧ ខែកុម្ភៈ ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ១៩ ចំនួន ៧៦៦នាក់ ក្នុងនោះ អ្នកព្យាបាលជាសះស្បើយចំនួន ៤៧៧នាក់ និងអ្នកដែលកំពុងសម្រាកនៅមន្ទីរពេទ្យចំនួន២៨៧នាក់៕