រដ្ឋាភិបាលកម្ពុជា បង្កើតសេចក្តីព្រាងច្បាប់ថ្មី ស្ដីពី វិធានការលើករណីរាលដាលជំងឺកូវីដ១៩និងជំងឺឆ្លងដទៃទៀត ដើម្បីប្រយុទ្ធនិងទប់ស្កាត់ការឆ្លងរីករាលដាលនៃជំងឺឆ្លងទាំងនោះ។
សេចក្តីព្រាងច្បាប់ថ្មីនេះមានឈ្មោះជាផ្លូវការថា «ច្បាប់ស្ដីពីវិធានការទប់ស្កាត់ការឆ្លងរីករាលដាលនៃជំងឺកូវីដ១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត»។
សេចក្ដីប្រកាសព័ត៌មានទីស្ដីការគណៈរដ្ឋមន្ត្រី លើកឡើងថា សេចក្ដីព្រាងច្បាប់ថ្មីនេះត្រូវបានអនុម័តដោយកិច្ចប្រជុំពេញអង្គគណៈរដ្ឋមន្ត្រី កាលពីថ្ងៃអាទិត្យ ទី២៨ ខែកុម្ភៈ ម្សិលមិញនេះ។
ទីស្តីការគណៈរដ្ឋមន្ត្រី បន្តថា សេចក្ដីព្រាងច្បាប់នេះកំណត់ពីវិធានការសុខាភិបាល វិធានការរដ្ឋបាល និងវិធានការផ្សេងៗទៀត ដែលត្រូវអនុវត្ត ដើម្បីប្រយុទ្ធនិងទប់ស្កាត់ការឆ្លងរីករាលដាលនៃជំងឺកូវីដ១៩ និងជំងឺឆ្លងកាចសាហាវផ្សេងទៀត ក្នុងពេលបច្ចុប្បន្ននិងពេលអនាគត។
ទីស្ដីការគណៈរដ្ឋមន្ត្រី កត់សម្គាល់ថា៖ «សេចក្ដីព្រាងច្បាប់នេះ សំដៅការពារអាយុជីវិតប្រជាពលរដ្ឋ សុខភាពសាធារណៈ និងសណ្ដាប់ធ្នាប់សាធារណៈ ព្រមទាំងកាត់បន្ថយបានជាអតិបរមានូវផលប៉ះពាល់នៃការឆ្លងជំងឺនេះ ចំពោះវិស័យសេដ្ឋកិច្ចនិងសង្គមកម្ពុជា»។
អ្នកនាំពាក្យរដ្ឋាភិបាលកម្ពុជា លោក ឯក ថា មានប្រសាសន៍ថា សេចក្ដីព្រាងច្បាប់នេះត្រូវបានស្នើឡើងដោយក្រសួងសុខាភិបាល។ ប៉ុន្តែលោកបដិសេធមិនឆ្លើយសំណួរលម្អិតលើសេចក្ដីព្រាងច្បាប់នេះឡើយ។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន មានប្រសាសន៍ថា សេចក្តីព្រាងច្បាប់ថ្មីនេះមានសារៈសំខាន់ចំពោះកម្ពុជា ដើម្បីទប់ស្កាត់ការឆ្លងរីករាលដាលនៃជំងឺកូវីដ១៩ ប៉ុន្តែលោកស្រីមិនពន្យល់លម្អិតពីកម្រិតទោសទណ្ឌដែលមានចែងក្នុងសេចក្តីព្រាងច្បាប់នោះទេ។
អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ថា លោកនឹងធ្វើអត្ថាធិប្បាយលម្អិតពីច្បាប់នេះទៅដល់សាធារណជននៅពេលដែលសភាអនុម័តរួច។
លោក ជិន ម៉ាលីន មានប្រសាសន៍ថា៖ «ច្បាប់នេះស្ថិតនៅសេចក្ដីព្រាងនៅឡើយ នៅពេលសភាអនុម័តរួច នឹងបកស្រាយអត្ថាធិប្បាយជូន»។
អ្នកនាំពាក្យរដ្ឋសភា លោក ឡេង ប៉េងឡុង ឱ្យដឹងថា រដ្ឋសភាបានទទួលសេចក្ដីព្រាងច្បាប់ស្ដីពី «វិធានការទប់ស្កាត់ការឆ្លងរីករាលដាលនៃជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត» នៅព្រឹកថ្ងៃទី០១ ខែមីនា។ លោកបន្តថា រដ្ឋសភាគ្រោងនឹងបើកកិច្ចប្រជុំអនុម័តក្នុងរយៈពេលដ៏ខ្លីខាងមុខនេះ។
លោក ឡេង ប៉េងឡុង បញ្ជាក់ថា៖ «រដ្ឋសភាបានទទួលសេចក្ដីព្រាងច្បាប់នេះនៅព្រឹកថ្ងៃចន្ទ ហើយនឹងដាក់ជូនសម្ដេចប្រធាន [រដ្ឋសភា] ពិនិត្យ។ គណៈអចិន្ត្រៃយ៍ ពិនិត្យនិងសម្រេចក្នុងសប្ដាហ៍នេះតែម្ដង ព្រោះច្បាប់នេះជាការប្រញាប់»។
កាលពីខែកុម្ភៈកន្លងទៅ រាជរដ្ឋាភិបាលកម្ពុជាបានចេញអនុក្រឹត្យចំនួន២រួចទៅហើយ ដើម្បីចាត់វិធានការទប់ស្កាត់ការឆ្លងរាលដាលនៃជំងឺកូវីដ១៩។ អនុក្រឹត្យទាំង២នេះ រួមមាន អនុក្រឹត្យស្តីពី វិធានការចត្តាឡីស័ក ដើម្បីទប់ស្កាត់ការឆ្លងរាលដាលនៃជំងឺកូវីដ១៩ និង អនុក្រឹត្យស្ដីពីវិធានការសុខាភិបាល ដើម្បីទប់ស្កាត់និងឆ្លើយតបការឆ្លងរាលដាលជាអន្តរជាតិនៃជំងឺឆ្លងទូទៅតាមច្រកចេញចូលព្រំដែន។
អនុក្រឹត្យទាំង២នេះចែងអំពីកាតព្វកិច្ច ការដាក់ទោសទណ្ឌ និងការផាកពិន័យ លើជនដែលអនុវត្តផ្ទុយពីការណែនាំរបស់ក្រសួងសុខាភិបាលនិងបទបញ្ជារបស់រដ្ឋាភិបាល។ អនុក្រឹត្យទាំង២ ចែងពីប្រាក់ពិន័យមានចាប់ពី ១ ០០០ ០០០ រៀល រហូតដល់ ៥០ ០០០ ០០០ រៀលទៅតាមកម្រិតនៃបទល្មើស។
នាយករងអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា លោកមិនទាន់បានឃើញខ្លឹមសារនៃសេចក្តីព្រាងច្បាប់ថ្មីនៅឡើយ។ លោកស្នើឱ្យរដ្ឋាភិបាលផ្សព្វផ្សាយជាសាធារណៈនូវសេចក្ដីព្រាងច្បាប់ថ្មី ដើម្បីធានាឱ្យមានការចូលរួមផ្តល់យោបល់ពីប្រជាពលរដ្ឋ។
លោកថា៖ «ច្បាប់កាលណាចេញទៅហើយ គឺមានវិសាលភាពនៃការអនុវត្ត មានភាពតឹងរ៉ឹង ដូច្នេះគួរតែមានការផ្សព្វផ្សាយជាសាធារណៈនូវសេចក្ដីព្រាងនេះ ដើម្បីផ្ដល់ឱកាសដល់អ្នកជំនាញនានាចូលរូមមតិប្រមូលធាតុផ្សំឱ្យច្រើន ឈានទៅបង្កើតច្បាប់ឱ្យបានល្អប្រសើរសម្រាប់ប្រជាពលរដ្ឋទូទៅ»។
ទីស្ដីការគណៈរដ្ឋមន្ត្រី បញ្ជាក់ថា សេចក្ដីព្រាងច្បាប់ ស្តីពី «វិធានការទប់ស្កាត់ការឆ្លងរីករាលដាលនៃជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត» គឺជាមូលដ្ឋានគតិយុត្តិគ្រប់ជ្រុងជ្រោយ ដើម្បីជួយដល់ការគ្រប់គ្រងស្ថានការណ៍នៃការឆ្លងរីករាលដាលនៃជំងឺកូវីដ១៩ និងជំងឺឆ្លងកាចសាហាវធ្ងន់ធ្ងរដទៃទៀត។ សេចក្តីព្រាងច្បាប់ថ្មីនេះមាន ៦ជំពូក និង ១៨មាត្រា ដែលមានចែងអំពីទោសប្បញ្ញត្តិនានាផង។
ទោះជាយ៉ាងណាក្ដី កម្រិតទោសទណ្ឌដែលមានចែងក្នុងសេចក្ដីព្រាងច្បាប់នេះ មិនទាន់ត្រូវបានទម្លាយជាសាធារណៈនៅឡើយទេ។
កាលពីឆ្នាំ២០២០ កម្ពុជាបានបង្កើតច្បាប់មួយរួចហើយ គឺច្បាប់ស្តីពីការគ្រប់គ្រងប្រទេសជាតិក្នុងភាពអាសន្ន ដោយលោកនាយករដ្ឋមន្ត្រី ហ៊ុន សែន អះអាងថា ជាការចាំបាច់ដើម្បីទប់ស្កាត់ចលនានានាក្នុងពេលដែលប្រឈមនឹងវិបត្តិកូវីដ១៩។ ច្បាប់នេះមានចំនួន ៥ជំពូក និង ១២មាត្រា ដែលមានចែងកម្រិតទោសទណ្ឌលើជនល្មើសដែលប្រព្រឹត្តខុសច្បាប់នេះ អាចជាប់ពន្ធនាគារពី ១ឆ្នាំ ដល់ ១០ឆ្នាំ៕
