អាជ្ញាធរខេត្តកោះកុង បានដាក់កំហិតរយៈពេល១ខែឱ្យអ្នកដែលចាក់ដីរំលោភចូលឆ្នេរសមុទ្រ ស្ថិតនៅស្រុកគិរីសាគរ កាយអាចម៍ដីចេញ បើមិនដូច្នេះទេ ពួកគេនឹងប្រឈមមុខចំពោះផ្លូវច្បាប់។
កាលពីថ្ងៃទី២១ ខែកុម្ភៈ ឆ្នាំ២០២១ ប្រជាពលរដ្ឋបានរាយការណ៍និងផ្សព្វផ្សាយអំពីសកម្មភាពចាក់ដីលុបឆ្នេរសមុទ្រជាច្រើនហិកតា នៅចំណុច «ពយតាឃួន» ស្ថិតក្នុងភូមិព្រែកខ្សាច់ ឃុំព្រែកខ្សាច់ ស្រុកគិរីសាគរ ខេត្តកោះកុង។
អភិបាលរងខេត្តកោះកុង លោក សុខ សុទ្ធី ប្រាប់ វីអូឌី នៅថ្ងៃចន្ទនេះថា អ្នកដែលចាក់ដីប៉ះពាល់ឆ្នេរសមុទ្រនោះ ជាពលរដ្ឋរស់នៅក្នុងឃុំនោះផ្ទាល់ មានឈ្មោះ ហួត ឃៀន, ហួត ង៉ែត និងឈ្មោះ ឈឹម ចាន់ឌី។ លោកបន្តថា សកម្មភាពចាក់ដីចូលសមុទ្រនេះ ធ្វើឡើងដោយពុំមានច្បាប់អនុញ្ញាតឡើយ និងបានប៉ះពាល់ឆ្នេរសមុទ្រប្រហែល៦០០ម៉ែត្រ។
លោក សុខ សុទ្ធី បន្ថែមថា ក្រោយរកឃើញមានកំហុស អាជ្ញាធរសម្រេចឱ្យអ្នកចាក់ដីរំលោភចូលសមុទ្រនោះ ត្រូវកាយដីចេញវិញឱ្យអស់ ដោយទុករយៈពេលយ៉ាងយូរ៣០ថ្ងៃ។
លោកបញ្ជាក់ថា៖ «សរុបមកវិញ គឺយើងសម្រេចឱ្យគាត់កាយអាចម៍ដីហ្នឹងចេញពីចំណីឆ្នេរវិញ។ បើគាត់មិនធ្វើតាម យើងនឹងប្តឹងទៅតុលាការ»។
មេឃុំព្រែកខ្សាច់ លោក រាម សារុំ ឱ្យដឹងថា ពលរដ្ឋទាំង៣នាក់នោះបានចាប់ផ្តើមអនុវត្តកាយដីនោះចេញវិញហើយ តាំងពីថ្ងៃទី២៧ ខែកុម្ភៈ រហូតមកដល់ថ្ងៃនេះ។ លោកថា ប្រហែលជា៤ទៅ៥ថ្ងៃទៀត អ្នកទាំងនោះនឹងអាចកាយដីដែលបានចាក់នោះចេញវិញអស់ហើយ។
លោកបញ្ជាក់ថា៖ «ពួកគាត់ [ពលរដ្ឋទាំង៣នាក់ដែលចាក់ដី] មិនបានជូនដំណឹងមកខ្ញុំមុនទេ បើប្រាប់មុន ខ្ញុំប្រាប់ទៅពួកគាត់វិញហើយថាត្រូវចាក់ប៉ុណ្ណាពីឆ្នេរ តែនេះគាត់មិនបានប្រាប់ខ្ញុំទេ។ តាំងពីថ្នាក់ខេត្ត គេឱ្យកាយវិញ ឥលូវគាត់កាយជិតរួចហើយ»។
វីអូឌី មិនអាចរកការឆ្លើយតបពីពលរដ្ឋទាំង៣នាក់ដែលរងការចោទថា បានចាក់ដីប៉ះពាល់ដល់ឆ្នេរសមុទ្រនោះបានទេ។
មន្ត្រីឃ្លាំមើលការរំលោភសិទ្ធិមនុស្សនៅអង្គការលីកាដូប្រចាំខេត្តកោះកុង លោក ប៉ែន វុទ្ធា មានប្រសាសន៍ថា ការដែលអាជ្ញាធរឱ្យកាយដីចេញវិញ ដោយពុំមានការដាក់ពិន័យនិងចាត់វិធានការច្បាប់នេះ នឹងមិនអាចទប់ស្កាត់ការរំលោភបំពានយកដីសមុទ្រពីសំណាក់ជនខិលខូចឬអ្នកមានលុយមានអំណាចបានឡើយ។
មន្ត្រីសិទ្ធិមនុស្សរូបនេះ ជំរុញអាជ្ញាធរពាក់ព័ន្ធត្រូវចាត់វិធានការឱ្យបានតឹងរ៉ឹងចំពោះអ្នកដែលហ៊ានរំលោភយកដីឆ្នេរសមុទ្រ ដើម្បីព្រមានទៅដល់អ្នកផ្សេងទៀត និងធានាពីប្រសិទ្ធភាពក្នុងការគ្រប់គ្រងឆ្នេរសមុទ្រសាធារណៈរបស់រដ្ឋ។
លោកបន្ថែមថា៖ «បើអាជ្ញាធរនៅតែប្រើវិធានការបែបហ្នឹងទៀត អ៊ីចឹង! អ្នកមានលុយមានអំណាចនៅតែអាចប្រើរូបភាពផ្សេងៗ ដើម្បីរំលោភយកសម្បត្តិសាធារណៈរបស់រដ្ឋឬតំបន់ឆ្នេរធ្វើសម្បត្តិឯកជនហើយ ពីព្រោះបើអាជ្ញាធរដឹង គ្រាន់តែឱ្យកាយដីចេញវិញហ្នឹង អ៊ីចឹងវិធានការហ្នឹង វាហាក់ដូចជាអត់មានប្រសិទ្ធភាព»។
កាលពីខែធ្នូ ឆ្នាំ២០១៩ លោកនាយករដ្ឋមន្ត្រី ហ៊ុន សែន បានណែនាំទៅលោក ជា សុផារ៉ា រដ្ឋមន្ត្រីក្រសួងរៀបចំដែនដី និងអភិបាលខេត្តជាប់មាត់សមុទ្រទាំង៤ ត្រូវការពារតំបន់ឆ្នេរឱ្យបានពីការរំលោភបំពានយកដីជាកម្មសិទ្ធិ ខណៈលោកបារម្ភថា បើតំបន់ឆ្នេរនៅតែរងការបំផ្លាញ នោះកម្ពុជាអាចនឹងត្រូវប្រឈមនឹងការដកចេញពីសមាជិកតំបន់ឆ្នេរស្អាតលើពិភពលោក។ បើតាមរបាយការណ៍ក្រសួងទេសចរណ៍ ឆ្នេរសមុទ្រកម្ពុជា មានប្រវែង៤៤០គីឡូម៉ែត្រ ស្ថិតនៅក្នុងខេត្តចំនួន៤ រួមមាន ខេត្តកំពត កែប កោះកុង និងខេត្តព្រះសីហនុ៕
