អាជ្ញាធរខេត្តបន្ទាយមានជ័យ ចាប់ផ្តើមបូមទឹកពីប្រភពនានាបញ្ចូលទៅក្នុង«ស្ទឹងមង្គលបូរី»ដែលអាជ្ញាធរអះអាងថាបានរីងដោយសារតែការធ្វើស្រែប្រាំងលើសពីការកំណត់។
អភិបាលស្រុកមង្គលបូរី លោក រ័ត្ន ដាស៊ីណង់ មានប្រសាសន៍នៅថ្ងៃទី០២ ខែមីនា ឆ្នាំ២០២១នេះថា ទឹកស្ទឹងមង្គលបូរី បានប្រឈមនឹងការរីងទឹកជាថ្មីទៀត ដោយសារតែប្រជាពលរដ្ឋមួយចំនួនធ្វើស្រែប្រាំងច្រើនហួសផែនការកំណត់។
លោកថា៖ «កាលពីមុន ប្រជាពលរដ្ឋធ្វើស្រែធម្មតា តែមួយរដូវ ដល់ឥលូវពួកគាត់បានចាប់ផ្ដើមធ្វើស្រែប្រាំង ហើយមួយឆ្នាំធ្វើស្រែរហូតទៅបីដង […] ប្រជាពលរដ្ឋគេគ្រោងឱ្យធ្វើតែ ១០ ០០០ហិកតាហ្នឹង ហើយគាត់ធ្វើឡើង ៣០ ០០០ ហិកតា បានទឹកមកពីណា? ម៉េចថារឿងអីមិនយកចិត្តទុកដាក់នោះ»។
ទោះយ៉ាងណា លោក រ័ត្ន ដាស៊ីណង់ បានបញ្ជាក់នៅថ្ងៃនេះ ក្នុងទំព័រហ្វេសប៊ុករបស់រដ្ឋបាលខេត្តបន្ទាយមានជ័យថា អាជ្ញាធរខេត្តនិងមន្ត្រីជំនាញធនធានទឹក បានអន្តរាគមន៍បូមទឹកពីប្រភពផ្សេងៗ ស្របពេលដែលទឹកស្ទឹងបវិល ខេត្តបាត់ដំបង ក៏បានហូរមកជាមួយគ្នាទៅកាន់ស្ទឹងមង្គលបូរីនេះផងដែរ។
ក្រៅពីនោះ លោកថា អាជ្ញាធរស្រុកក៏បានជួយជីកអណ្តូងនិងស្វែងរកប្រភពទឹកផ្សេងៗដើម្បីជួយដោះស្រាយបញ្ហាខ្វះទឹកជូនដល់ប្រជាពលរដ្ឋផងដែរ។
ប្រធានមន្ទីរធនធានទឹកខេត្តបន្ទាយមានជ័យ លោក យឹម ប៊ុនរ៉ុម ត្រូវបានស្រង់ប្រសាសន៍មកផ្សព្វផ្សាយក្នុងទំព័រហ្វេសប៊ុករបស់រដ្ឋបាលខេត្តដែរថា មន្ត្រីពាក់ព័ន្ធបានរៀបចំស្ថានីយបូមទឹកថ្មីមួយកន្លែងនៅចំណុចសង្កាត់អូរអំបិល ក្រុងសិរីសោភ័ណ ដោយប្រើប្រាស់ម៉ាស៊ីនបូមទឹកធំៗចំនួន៣គ្រឿង ដើម្បីនាំយកទឹកបង្ហូរទៅស្ទឹងមង្គលបូរីនេះ ចាប់តាំងពីថ្ងៃទី២៨ ខែកុម្ភៈមក។
អភិបាលខេត្តបន្ទាយមានជ័យ លោក អ៊ុំ រាត្រី ដែលបានចុះទៅពិនិត្យស្ថានភាពទឹកស្ទឹងមង្គលបូរីនៅថ្ងៃនេះ ក៏បានណែនាំទៅមន្ត្រីជំនាញ ពន្លឿនការងារបូមទឹកនេះ ដើម្បីឆ្លើយតបទៅនឹងតម្រូវការទឹកប្រើប្រាស់របស់ប្រជាពលរដ្ឋផងដែរ។ ក្រៅពីនោះ លោកបានណែនាំទៅអាជ្ញាធរឃុំ-ស្រុក ជួយការពារប្រភពទឹកនេះ ដោយចៀសវាងកុំឱ្យមានការបង្កបង្កើនផលស្រូវប្រាំងបន្ថែមទៀត ខណៈប្រភពទឹកនេះទុកប្រើសម្រាប់តែការប្រើប្រាស់ក្នុងជីវភាពប្រចាំថ្ងៃតែប៉ុណ្ណោះ ព្រោះរដូវប្រាំងនៅបន្តអូសបន្លាយរយៈពេលច្រើនខែទៀត។
ប្រជាពលរដ្ឋរស់នៅក្នុងភូមិ-ឃុំគយម៉ែង ស្រុកមង្គលបូរី លោក ហួត តាំ បានប្រាប់ វីអូឌី នៅថ្ងៃអង្គារម្សិលមិញថា ទឹកស្ទឹងមង្គលបូរី បានរីងស្ងួតអស់រយៈពេលជិតកន្លះខែមកហើយ ហើយនៅតែប្រមាណមួយសប្តាហ៍ទៀត អាចនឹងរីងស្ងួតដល់បាតស្ទឹងតែម្តង ប្រសិនបើមិនមានការអន្តរាគមន៍ជួយដោះស្រាយទេនោះ។ លោកបន្តថា ទឹកស្ទឹងរីងស្ងួតនេះបានធ្វើឱ្យប្រជាពលរដ្ឋជួបបញ្ហាប្រឈមក្នុងជីវភាពប្រចាំថ្ងៃ និងត្រូវចំណាយប្រាក់ដើម្បីទិញទឹកយកមកប្រើប្រាស់ជាដើម។
លោកនិយាយថា៖ «កាលពីដើម ទឹកស្ទឹងយើងនៅមាន ប្រជាពលរដ្ឋយើងងាយស្រួលក្នុងការបានទឹកប្រើប្រាស់ ដល់ឥលូវ [ពីរបីឆ្នាំចុងក្រោយ] រីងអស់ហើយ វាក៏យ៉ាប់ដែរ ត្រូវទិញទឹកគេប្រើ […] ចំពោះបញ្ហាទឹកដែលត្រូវទិញយកមកប្រើប្រាស់ ក៏មានតម្លៃថ្លៃ ដែលតម្លៃក្នុងមួយស៊ីទែនមានចាប់ពី ២០ ០០០ រៀល ទៅ ២៥ ០០០រៀល ក្នុងចំណុះ ២០០០លីត្រ»។
បើតាមលោក ហួត តាំ មូលហេតុដែលទឹកស្ទឹងមង្គលបូរីរីងស្ងួតបណ្តាលឱ្យខ្វះខាតទឹកប្រើប្រាស់នេះ ដោយសារកត្តាប្រជាពលរដ្ឋធ្វើស្រែប្រាំងច្រើនពិតមែន។
មេឃុំគយម៉ែង លោក ឡា រស្មី មានប្រសាសន៍ថា ក្នុងស្រុកមង្គលបុរីនេះ មិនមានប្រភពទឹកឬអាងស្តុកទឹកនោះទេ គឺមានតែប្រភពទឹកស្ទឹងមង្គលបុរីនេះប៉ុណ្ណោះ។
លោកថា៖ «អត់មានប្រភពទឹកឬអាងទឹកសម្រាប់ស្តុបសម្រាប់បញ្ចេញទៅធ្វើស្រែប្រាំងទេ ដូចថា មន្ទីរធនធានទឹក គេថា ឱ្យ[ពលរដ្ឋនៅ]មង្គលបុរីធ្វើស្រែប្រាំងតែ ២០០ ០០០ហិកតា អ៊ីចឹងអាចថាសំយោគសម្រាប់ទឹកស្ទឹងទៅប៉ុណ្ណឹង។ វាអាច បងប្អូនបង្កបង្កើនផលបានហើយ នឹងអាចសល់ទឹកប្រើប្រាស់»។
ប្រធានសម្ព័ន្ធសហគមន៍កសិករកម្ពុជា លោក ថេង សាវឿន ធ្លាប់មានប្រសាសន៍ថា បើសិនជាស្ថាប័នពាក់ព័ន្ធ ជាពិសេសមន្ទីរធនធានទឹកខេត្ត មិនជួយអន្តរាគមន៍រឿងនេះឱ្យបានទាន់ពេលវេលាទេ នឹងធ្វើឱ្យប្រជាពលរដ្ឋរងគ្រោះកាន់តែធ្ងន់ធ្ងរចំពោះបញ្ហាខ្វះទឹកនេះ។
លោកមានប្រសាសន៍ថា៖ «កាលណាអត់មានទឹកសម្រាប់ដាំដុះហើយ គាត់បាត់បង់មុខរបរ ធ្វើឱ្យពួកគាត់ធ្លាក់ខ្លួនក្រីក្រ មិនមានមុខរបរ មិនមានប្រាក់ចំណូលហូបចុក ទាំងអាហារទៀត អាចប្រឈមខ្លាំង ហើយនៅពេលអត់មានមុខរបរ អត់មានចំណូលនៅក្នុងសហគមន៍ គាត់នឹងចំណាកស្រុក នៅពេលគាត់ចំណាកស្រុក រងការកេងប្រវ័ញ្ចផ្សេងៗទៀត»៕