មន្ត្រីជាន់ខ្ពស់ក្រសួងមហាផ្ទៃ ឱ្យដឹងថា ក្រោយការរឹតបន្តឹងច្រករបៀងតាមព្រំដែនរយៈពេលជាង២សប្តាហ៍មកនេះ សមត្ថកិច្ចបានចាប់បញ្ជូនខ្លួនមេខ្យល់ដែលនាំពលករឆ្លងដែនខុសច្បាប់ជាង១០០នាក់បញ្ជូនទៅតុលាការ និងពលករប្រមាណ១៤០០នាក់ត្រូវបញ្ជូនទៅធ្វើចត្តាឡីស័ក ដើម្បីតាមដានសុខភាព។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ឱ្យដឹងនៅថ្ងៃអង្គារនេះថា អ្នកដែលត្រូវចាប់ឃាត់ខ្លួនភាគច្រើនជាអ្នកដែលឆ្លងដែនខុសច្បាប់មកពីប្រទេសថៃ ខណៈអ្នកឆ្លងដែនតាមច្រកព្រំដែនជាប់ប្រទេសវៀតណាមមានតិចតួចប៉ុណ្ណោះ។
លោកថា៖ «មេខ្យល់យើងឃាត់ខ្លួនបានជាង១០០នាក់ អានេះខ្ញុំគិតចាប់ពីថ្ងៃទី១៣កុម្ភៈមក»។
កាលពីខែមុន លោកនាយករដ្ឋមន្ត្រី ហ៊ុន សែន បានបញ្ជាឱ្យពង្រាយកងកម្លាំងមានសមត្ថកិច្ចនៅតាមខ្សែបន្ទាត់ព្រំដែនជាប់ប្រទេសថៃនិងវៀតណាម ដើម្បីទប់ស្កាត់កុំឱ្យពលរដ្ឋចំណាកស្រុកទៅធ្វើការនៅក្រៅប្រទេសឬវិលចូលកម្ពុជាវិញ ទាំងមិនបានតាមដានសុខភាពឬធ្វើចត្តាឡីស័ករយៈពេល១៤ថ្ងៃ តាមសេចក្តីណែនាំរបស់ក្រសួងសុខាភិបាល។
បើតាមក្រសួងសុខាភិបាល គិតត្រឹមថ្ងៃអង្គារម្សិលមិញ មនុស្សចំនួន៣៤០នាក់ហើយត្រូវបានរកឃើញថាឆ្លងជំងឺកូវីដ១៩ ខណៈចំនួនអ្នកឆ្លងសរុបនៅកម្ពុជាមានចំនួន៨៤៤នាក់ ក្នុងនោះអ្នកជាសះស្បើយចំនួន៤៧៨នាក់ និងអ្នកកំពុងសម្រាកព្យាបាលចំនួន៣៦៦នាក់៕
